Дэлхий нийтээр..
ЭЗБХ: Зээлийн хэлэлцээрийн төслийг зөвшилцөхийг дэмжив
Улсын Их Хурлын Эдийн засгийн байнгын хорооны 2025 оны есдүгээр сарын 29-ний өдрийн хуралдаанаар Монгол Улс, Европын сэргээн босголт, хөгжлийн банк хооронд байгуулах “Зүрх судасны үндэсний төв байгуулах төсөл”-ийн Зээлийн хэлэлцээрийн төслийг зөвшилцөхөөр хэлэлцэж, энэ талаар Улсын Их Хурлын гишүүн, Засгийн газрын гишүүн, Эрүүл мэндийн сайд Ж.Чинбүрэн танилцуулав. Засгийн газрын 2024-2028 оны үйл ажиллагааны хөтөлбөр, Монгол Улсын хөгжлийн 2025 оны төлөвлөгөөнд Зүрх судасны үндэсний төвийг байгуулахаар тусгасан. Энэ хүрээнд Засгийн газар Зүрх судасны үндэсний төв байгуулах төслийг Европын сэргээн босголт, хөгжлийн банкны 34.9 сая ам.долларын зээл болон Люксембургийн Их Гүнт улсаас олгох 22.5 сая евро буюу 26.4 сая ам.долларын буцалтгүй тусламжийн хамтарсан санхүүжилтээр хэрэгжүүлэхээр төлөвлөн хэлэлцээр хийхээр болсон байна. Европын сэргээн босголт, хөгжлийн банкнаас санал болгож буй зээлийн хөрөнгө нь баталгаат овернайт санхүүжилтийн хувьсах хүү (SOFR) дээр 1.6 хувийн нэмэгдэлтэй, 4 жил үндсэн төлбөрөөс чөлөөлөгдөх, 18 жилийн хугацаатай гэлээ.
Төслийн хүрээнд 120 ортой тусгай зориулалтын зүрх судасны эмнэлгийн барилгыг шинээр барьж, тоног төхөөрөмжөөр бүрэн ханган ашиглалтад оруулах бөгөөд төсөл хэрэгжсэнээр зүрх судасны төрөлжсөн, нарийн мэргэжлийн тусламж үйлчилгээний хүртээмжийг хоёр дахин нэмэгдүүлж, жил бүр өсөн нэмэгдэж байгаа зүрх судасны өвчлөл нас баралтын хэмжээг бууруулах ач холбогдолтой хэмээн сайд танилцууллаа.
Зээлийн хэлэлцээрийн төслийн танилцуулгатай холбогдуулан Улсын Их Хурлын гишүүн Р.Батболд, М.Бадамсүрэн, Б.Тулга, Д.Үүрийнтуяа, Б.Уянга, Г.Очирбат, Б.Заяабал, П.Батчимэг, Р.Сэддорж нар асуулт асууж салбарын сайд болон ажлын хэсгийг гишүүдээс хариулт, мэдээлэл авав. Тухайлбал, Монголын талаас хөрөнгө оруулалт хийх эсэхийг тодруулсан асуултад Ж.Чинбүрэн сайд хариулахдаа “Монголын талаас хөрөнгө оруулалт хийхгүй. Европын сэргээн босголт, хөгжлийн банкны зээл болон Люксембургийн Их Гүнт улсын буцалтгүй тусламжийн санхүүжилтээр 15646 м2 талбайтай, 8 давхар 119 ортой эмнэлэг байгуулна. 80 энгийн ор, эмчилгээний 16 ор, эрчимт эмчилгээний 8 ор, мэс заслын 8 өрөөтэй байх ба зөвхөн шигдээс, харвалтыг эмчлэхээс гадна зүрх шилжүүлэн суулгах хагалгааг хийх боломжтой гэж төлөвлөж байна. Нийт санхүүжилтийн 52 орчим хувь нь барилгын хөрөнгө оруулалт байх бол үлдсэн нь тоног төхөөрөмжид зарцуулгадах тооцоотой байгаа” гэв. Эмч нарыг чадавхжуулах чиглэлд төслийн хөрөнгө оруулалтаас төсөвлөгдөх эсэхийг тодруулахад Улсын III төв эмнэлгийн зүрх судасны салбар бол 24 жилийн турш Люксембургийн Их Гүнт улстай хамтран ажиллаж хүний нөөцийн бэлтгэл ажлыг хангалттай гүйцэтгэсэн гэдэг хариултыг сайд өгсөн. Үүний зэрэгцээ 21 аймаг, дүүргүүдтэй цахимаар хамтран ажиллах систем бий болгосноор ачааллтыг 56 хувиар бууруулаад байгаагаа хэлсэн. Төслийн санхүүжилтийн тодорхой хувийг хүний нөөцийг чадавхжуулах чиглэлээр зарцуулах юм байна. Барилгын төсөвт өртөг нэмэгдэх эсэх, эхлэх, дуусах хугацааг тодруулахад “2026 онд эхлээд 2032 онд ашилалтад оруулахаар төлөвлөсөн. ТЭЗҮ болон зураг төслийг өндөр нарийвчлалтай хийсэн учраас төсөвт өртөгт их өөрчлөлт орохгүй гэж тооцож байна. 66 метр өргөн, 23.5 метр өндөртэй барилга Улсын III төв эмнэлгийн хашаан дотор баригдана, менежментийн хувь нэг удирдлагатай байна” гэж хариулсан.
Түүнчлэн гишүүд зээлийн хэлэлцээртэй холбоотой санхүүгийн зардлуудыг нарийвчлалтай, тодорхой тооцоололтойгоор танилцуулахыг Сангийн яамнаас шаардахыг зэрэгцээ зээлийн эргэн төлөлтийн нөхцөлтэй холбоотой тооцооллыг мэдээллийг тодруулж байсан. Эмнэлгийг Улсын III төв эмнэлгийн хашаан дотор барих нь нягтрал өндөртэй орчинд дахин нягтрал үүсгэх талаар тооцсон эсэхийг, тус төвд ажиллах мэргэжилтэн, хүний нөөцийн асуудлыг давхар тооцох саналуудыг гаргаж, гадаадын зээл, тусламжийн ашиглалтыг эрчимжүүлж, үр өгөөжтэй байлгах чиглэлд холбогдох талууд анхаарал хандуулж ажиллахыг гишүүд сануулж байв.
Ийнхүү гишүүд Зээлийн хэлэлцээрийн төсөлтэй холбогдуулан асуулт асууж, хариулт аван, холбогдуулан байр сууриа илэрхийлсний дараа санал хураалт явуулахад Байнгын хорооны хуралдаанд оролцсон гишүүдийн 60 хувь нь дэмжив. Монгол Улс, Европын сэргээн босголт, хөгжлийн банк хооронд байгуулах “Зүрх судасны үндэсний төв байгуулах төсөл”-ийн Зээлийн хэлэлцээрийн төслийг зөвшилцөхийг дэмжсэн талаарх санал, дүгнэлтээ Аюулгүй байдал, гадаад бодлогын байнгын хороонд хүргүүлэхээр болов.
Дэлхий нийтээр..
ОХУ Павел Дуровыг терроризмыг дэмжсэн хэрэгт буруутгалаа
ОХУ-ын Холбооны аюулаас хамгаалах алба (ФСБ) Telegram платформыг үүсгэн байгуулагч Павел Дуровыг терроризмыг дэмжсэн хэрэгт буруутгаж, олон улсын хэмжээнд эрэн сурвалжлах шийдвэр гаргаснаа мэдэгдлээ.
ФСБ-ын мэдээлснээр, Telegram-д байршуулсан зарим суваг, чатботыг устгаагүйгээс Украины тусгай алба болон террорист, хэт даврагч бүлэглэлүүд ОХУ-ын нутаг дэвсгэрт хорлон сүйтгэх ажиллагаа, террорист халдлага, цахим залилан зохион байгуулахад ашигласан гэж үзэж байгаа аж. Түүнчлэн ийм үйл ажиллагааны улмаас хүний амь эрсэдсэн гэж мөрдөн шалгах байгууллага буруутгажээ.
ФСБ мөн Telegram дахь танилцах үйлчилгээний чатботоор дамжуулан иргэдийг террорист үйл ажиллагаанд элсүүлсэн хэрэг илэрсэн бөгөөд 2025 оны долоодугаар сараас хойш ийм хэрэгт холбогдуулан 46 хүнийг саатуулсан гэж мэдэгдсэн байна.
Павел Дуров ОХУ-д төрсөн ч 2014 онд тус улсыг орхиж, одоо Дубайд амьдардаг. Тэрээр Франц, АНЭУ-ын иргэншилтэй бөгөөд Оросын эрх баригчид хувийн нууц, үг хэлэх эрх чөлөөг хязгаарлах зорилгоор зохиомол хэрэг үүсгэсэн гэж мэдэгдээд байна. Хэрэв буруутай нь тогтоогдвол түүнд бүх насаар нь хорих ял оноох боломжтой юм.
Энэ нь ОХУ 2022 онд Украинд цэргийн ажиллагаа эхлүүлснээс хойш цахим орчинд тавих хяналтаа эрчимжүүлж буй бодлогын хүрээнд авсан ээлжит арга хэмжээ гэж ажиглагчид үзэж байна. Үүний зэрэгцээ ОХУ төрийн дэмжлэгтэй MAX мессенжерийг өргөн нэвтрүүлэх бодлого хэрэгжүүлж байгаа ч төрийн байгууллагууд Telegram-ийг идэвхтэй ашигласаар байгаа юм.
Дэлхий нийтээр..
Японд болсон хүчтэй газар хөдлөлтийн дараах аврах ажиллагаа үргэлжилж байна
Японы өмнөд хэсгийн Күмамото мужид болсон 7.1 магнитудын хүчтэй газар хөдлөлтийн улмаас амиа алдагсдын тоо 13-д хүрээд байна. Олон хүн сураггүй хэвээр байгаа тул аврагчид худалдааны төв, орон сууц болон үйлдвэрийн барилгуудад эрэн хайх ажиллагааг үргэлжлүүлж байгаа аж.
Газар хөдлөлтийн улмаас Кашима хот дахь "Aeon Mall" худалдааны төвийн хоёрдугаар давхар нурж, олон хүн барилгын нурангид дарагдсан байна. Мөн цаасны үйлдвэрийн байгууламжид хүмүүс гацсан тул Японы Өөрийгөө хамгаалах хүчний алба хаагчид, гал сөнөөгчид, онцгой байдлын албаныхан аврах ажиллагааг цаг нартай уралдан явуулж байна.
Японы Ерөнхий сайд Санаэ Такайчи аврагдахыг хүлээж буй хүмүүс байгаа учраас бүх боломжит хүчийг дайчлан ажиллаж байгааг онцолжээ.
Газар хөдлөлтийн дараа Кюшүгийн хурдны галт тэрэгний хөдөлгөөн болон зарим нисэх буудлын үйл ажиллагааг түр зогсоосон байна. Мөн 36,900 орчим өрх цахилгаангүй, 9,500 өрх хийн хангамжгүй болж, 9,000 гаруй хүн түр байрлах төвүүдэд нүүлгэн шилжүүлэгдээд байна.
Эрх баригчид хүчтэй дараах чичиргээ, хөрсний гулгалтын эрсдэл өндөр хэвээр байгааг анхааруулж, иргэдийг болзошгүй аюулаас сэрэмжтэй байхыг уриалжээ.
Дэлхий нийтээр..
xAI Миннесота мужийн шинэ хуулийг эсэргүүцэн шүүхэд ханджээ
Илон Маскийн үүсгэн байгуулсан xAI компани АНУ-ын Миннесота мужийн хиймэл оюунаар бодит хүмүүсийн хуурамч нүцгэн зураг бүтээх технологийг хориглосон шинэ хуулийг эсэргүүцэн холбооны шүүхэд нэхэмжлэл гаргажээ.
Миннесота мужийн хууль энэ оны тавдугаар сард батлагдсан бөгөөд наймдугаар сарын 1-нээс хэрэгжиж эхлэхээр товлогдсон байна. Уг хууль нь хиймэл оюуны тусламжтайгаар бодит хүмүүсийн зөвшөөрөлгүйгээр хуурамч нүцгэн зураг, дүрс бичлэг бүтээх боломж олгодог технологийг хязгаарлах зорилготой бөгөөд АНУ-д ийм төрлийн анхны зохицуулалтад тооцогдож байна.
Харин xAI компани шүүхэд гаргасан нэхэмжлэлдээ зөвшөөрөлгүйгээр ийм төрлийн дүрс бүтээж түгээхийг хориглохыг эсэргүүцэхгүй ч шинэ хууль нь үүнээс хэтэрч, хууль ёсны болон зөвшөөрөлтэй контент хүртэл хамарч, хиймэл оюуны үйлчилгээ үзүүлэгчдэд нэг зөрчил тутамд 500 мянган ам.долларын торгууль ногдуулах боломжтой гэж үзжээ. Мөн үйлчилгээ үзүүлэгчид хууль зөрчлөөс урьдчилан сэргийлэхийн тулд чин шударгаар ажилласан тохиолдолд хамгаалах зохицуулалт байхгүй гэж мэдэгдсэн байна.
Миннесота мужийн Ерөнхий прокурор Кит Эллисон уг хуулийг хамгаалж, хиймэл оюунаар хүмүүсийн зөвшөөрөлгүйгээр хуурамч нүцгэн зураг бүтээх нь хүний нэр төр, сэтгэл зүй болон хувийн амьдралд ноцтой хохирол учруулдаг гэж мэдэгджээ.
xAI компани Грок хиймэл оюуны үйлчилгээнийхээ ашиглалтын нөхцөлд хүний хувийн нууцыг зөрчих, зөвшөөрөлгүйгээр хүний дүр төрхийг өөрчилж бэлгийн шинжтэй зураг бүтээхийг хориглодог бөгөөд ийм төрлийн зөрчил илэрвэл хэрэглэгчийн эрхийг хаах зэрэг арга хэмжээ авдаг гэж шүүхийн баримтдаа дурдсан байна.
-
Дэлхий нийтээр..2026/03/19
Хог шатааж, эрчим хүч үйлдвэрлэх төслийн газар чөлөөлөлт үргэлжилж байна
-
Үйл явдал2019/09/25
“1000 анхдагч илгээлтийн эздийн чуулга” уулзалт болно
-
Үйл явдал2024/12/20
Өнөөдөр цахилгаан хязгаарлаж болзошгүй газрууд
-
Дэлхий нийтээр..2021/07/26
Ерөнхий сайд Л.Оюун-Эрдэнэ Япон Улсын Эдийн засгийн сэргээн босголт “Ковид...