Тод мэдээ
“Хааны эрэлд-2025” 24 орны цэрэг дайчид оролцож байна
Энх тайвны төлөө тив дэлхийн өнцөг булан бүрээс ирсэн 24 орны төрийн далбаа “Тавантолгой” дахь Зэвсэгт хүчний Сургалтын нэгдсэн төвд 2025 оны зургааугаар сарын 14-ний өдөр зэрэгцэн мандаж, “Хааны эрэлд-2025” энхийг дэмжих ажиллагааны олон улсын сургууль нээлтээ хийсэн.
Тус сургуулийн нээлтийн ажиллагаанд УИХ-ын дэд дарга Б.Пүрэвдорж, Зэвсэгт хүчний Жанжин штабын дарга хошууч генерал С.Ганбямба болон БХЯ, ЗХЖШ-ын удирдлага, төрийн цэргийн болон хууль сахиулах байгууллагын дарга нар, төрлийн цэргийн командлагч, удирдах газрын дарга нар, Монгол Улсад суугаа Элчин сайдууд, цэргийн атташе нар тэргүүтэй хүндэт зочид болон 24 орны цэрэг дайчид, хэвлэл мэдээллийн байгууллагын төлөөлөл оролцлоо.
УИХ-ын дэд дарга Б.Пүрэвдорж тус сургуулийн нээлтийн ажиллагааны үеэр хэлсэн үгэндээ “Дэлхийн улс орнууд энх тайван, тогтвортой байдлыг бэхжүүлэх талаар ихээхэн хүчин чармайлт гарган аливаа зөрчил, маргаантай асуудлыг улс төр-дипломатын аргаар, эв зүйгээр шийдвэрлэхийг эрмэлзэж байгаа боловч олон улсын аюулгүй байдлын нөхцөл улам бүр ээдрээтэй, тодорхой бус, урьд өмнө тохиолдож байгаагүй шинж чанартай болж буй энэ үед улс орнуудын эв санааны нэгдэл, хамтын хариуцлага, энхийг эрхэмлэх үзэл урьд урьдаас илүү чухал болж байна. “Хааны эрэлд” олон улсын сургуулийн үйл ажиллагаа нь энхийг дэмжих ажиллагааны олон улсын хамтын ажиллагааг гүнзгийрүүлж, улс орнуудын хоорондын харилцан итгэлцэл, ойлголцлыг бэхжүүлэхэд чухал гүүр болж ирсэн. Энэ сургуулийн цар хүрээ, хамрах оролцоо, агуулга, хөтөлбөр жилээс жилд өргөжин тэлж, дэлхий нийтийн энх тайвны төлөөх бодит хувь нэмрийн илэрхийлэл болсоор байна” гэдгийг онцлон тэмдэглэлээ.
Мөн тэрээр даян дэлхийн энхийн төлөө зорилгод нэгдэн Монгол эх оронд морилон саатсан гадаадын цэргийн алба хаагчдад сургуульдаа хамтран оролцож, мэдлэг, дадлага, ур чадвар, туршлагаа арвижуулахын зэрэгцээ нүүдэлчин соёл иргэншлийн хосгүй өвийг өнөө хүртэл уламжлан хадгалж үлдсэн монгол туургатны зан заншил, ахуй соёл, түүх цадигтай танилцаж, амьдралдаа үргэлжид дурсагдах гэгээн бүхнийг сэтгэлдээ тээн эх орондоо буцаж, улс орнуудын найрамдал, эв санааны нэгдэл, нөхөрлөлийн гүүр, эрхэм дотны анд нөхөд болохыг ерөөв.
Монгол Улс болон Америкийн Нэгдсэн Улсын батлан хамгаалах салбарын хамтын ажиллагааны хүрээнд хоёр талын хамтарсан сургууль хэлбэрээр анх зохион байгуулагдсанаас хойш өдгөө олон улсын статустай болон өргөжиж, дэлхийн 70 гаруй орны 20 мянга орчим цэргийн алба хаагчийг хамруулаад байгаа уг сургууль нь оролцогч улс орнуудын энхийг дэмжих ажиллагааны чадавхыг нэмэгдүүлэх, найрамдал нөхөрлөл, хамтын ажиллагаа, цэргийн итгэлцлийг бэхжүүлэхэд үнэтэй хувь нэмэр оруулдаг ач холбогдолтой.
Тод мэдээ
Алба хаагчид 614 иргэний амь нас, 116.9 тэрбум төгрөгийн эд хөрөнгийг авран хамгаалжээ
Улсын хэмжээнд он гарсаар хоёрдугаар сарын байдлаар 774 удаагийн гамшиг, аюулт үзэгдэл, ослын дуудлага, мэдээлэл бүртгэгдлээ.
Дуудлагын дагуу төв, орон нутгийн Онцгой байдлын байгууллагын алба хаагчид үүрэг гүйцэтгэн, 614 хүний амь нас, 116.9 тэрбум төгрөгийн өмч хөрөнгийг авран хамгааллаа.
Тохиолдсон гамшиг, аюулт үзэгдэл, ослын 619 нь гал түймэр, 134 нь хүний үйл ажиллагаатай холбоотой осол /зам тээврийн осол, төөрсөн, сураггүй болсон, өндрөөс унах, мөс цөмрөх/, 14 нь геологийн гаралтай аюулт үзэгдэл, 6 нь биологийн гаралтай аюулт үзэгдэл, 1 нь ус цаг уурын гаралтай аюулт үзэгдэл байна гэж ОБЕГ-аас мэдээллээ.
Тод мэдээ
COP17 бага хурлын бэлтгэл ажлын явцыг хэлэлцэж, холбогдох дэд хороодод чиглэл өглөө
Тод мэдээ
Хууль бусаар мод бэлтгэсэн гэмт хэргийг илрүүлж, шүүхэд шилжүүлжээ
Цагдаагийн байгууллагаас 2025 оны 10 дугаар сарын 11-ний өдөр Өвөрхангай аймгийн Хархорин сумын нутаг дэвсгэрт иргэн Л.Б нь шинэс төрлийн 16 ширхэг, 1.291 шоо метр модыг тээврийн хэрэгсэл ашиглан хууль бусаар бэлтгэж, байгаль орчинд 391,888 төгрөгийн хохирол учруулсан гэмт хэргийг илрүүлж, мөрдөн шалгах ажиллагааг явуулан шүүхэд шилжүүлэх саналтай прокурорын байгууллагад шилжүүлсэн.
Тус гэмт хэргийг үйлдсэн иргэн Л.Б нь Монгол Улсын Эрүүгийн хуулийн 24.6 дугаар зүйлийн 2 дахь хэсгийн 2.3-т зааснаар Өвөрхангай аймгийн Хархорин сум дахь сум дундын шүүхээс 1 жилийн хугацаагаар тэнсэх ял оногдуулж, гэмт хэрэг үйлдэхэд ашигласан техник хэрэгслийг улсын орлого болгосон.
Иймд иргэдийг Хүрээлэн байгаа орчны эсрэг гэмт хэрэг, зөрчлийн талаар Цагдаагийн байгууллагын 102 болон 70191070 тусгай дугаарын утсанд мэдээлж, хамтран ажиллахыг Экологийн цагдаагийн албанаас уриаллаа.
