Өнөөдөр
УИХ-ын дарга Г.Занданшатар бизнес эрхлэгчидтэй уулзаж, эдийн засгийг эрчимтэй өсгөх талаар санал солилцлоо
Монгол Улсын Их Хурлын дарга Г.Занданшатар (2020.01.11) бизнес эрхлэгчдийн төлөөлөлтэй уулзалт хийлээ. Уулзалтаар “Салхитын мөнгөний ордын үр өгөөж” болон Монголын Үндэсний худалдаа, аж үйлдвэрийн танхим (МҮХАҮТ)-аас эдийн засгийг эрчимжүүлэх, системтэй загварчлалын үндсэн дээр хөгжүүлэх саналуудаа танилцуулж, хэлэлцүүлэг өрнүүлсэн юм.
УИХ-ын дарга Г.Занданшатар уулзалтыг нээж хэлсэн үгэндээ, “Монгол улсын хувьд эдийн засгийг эрчимжүүлэн, цар хүрээг нэмэгдүүлэх, хүртээмжтэй өсөлтийг дэмжихэд Эдийн засгийн өсөлтийн экспоненциал загвараар улсын эдийн засгийг хөгжүүлэх боломжтой. Энэ хөгжлийн загвараар хөгжих хамгийн гол урьдач нөхцөл нь төр, хувийн хэвшил хамтран томоохон төслүүдийг цаг алдалгүй эхлүүлэн, дараа дараагийн өсөлтийг дэмжих хэрэгцээ шаардлагатай байна. Төрийн зүгээс хувийн хэвшлийн санал санаачлагуудыг сонсдог ч тухайн чиглэлийн мэргэжлийн холбоодын нэгдсэн байр суурьгүй байдлаас үүдэн шийдэлд хүрэхэд хүндрэл дагуулдаг. Иймээс төр, хувийн хэвшлийн хамтын ажиллагааг шинэ шатанд гаргахаар УИХ-аас Мэргэжлийн холбоодын тухай хуулийг төслийг хэлэлцэж байна. Энэ хууль батлагдсанаар тухайн салбарын мэргэжлийн холбоод төрийн бодлогод тусгах саналаа нэгдсэн байдлаар гаргаж, хамтын шийдвэр гаргадаг болох юм” хэмээн онцлов.
Салхитын мөнгөний ордын үр өгөөжийн талаар “Эрдэнэс силвер ресурс” ТӨХК-ийн гүйцэтгэх захирал Т.Мөнхбаяр товч танилцуулав. Тэрбээр, “Тус ордын геологийн нийт нөөцийн хэмжээ 2,5 сая тонн бөгөөд мөнгө 808 тонн (цэврээр), алт 181 тонн (цэврээр) нөөцтэй. Хүдрийн дундаж агуулга 500-600 грамм гэж тооцсон. Цаашид хөгжих нөөц боломжтой. Хөгжүүлэлтийн үйл ажиллагааг явуулж байна. Баяжуулах үйлдвэрийн хүчин чадлыг нэмэгдүүлж таван жилийн дотор 1 ихнаяд гаруй төгрөгийн цэвэр ашигтай ажиллана гэж тооцоолж байгаа” гэдгээ танилцуулав.
МҮХАҮТ-ын ахалсан эдийн засагч, математикчид, судалгааны мэргэжилтнүүдийн баг 2019 онд улс орны эдийн засгийг эрчимтэй хөгжүүлэх, улстөрийн нөхцөл, төр засгийн тогтворгүй байдлаас үл хамаарах хөгжлийн цогц загварыг боловсруулахаар ажиллажээ.
Судалгааг төр, хувийн хэвшлийн хамтын ажиллагааны механизмаар эдийн засгийн үр өгөөж бүхий салбарууд, орд газар түшиглэсэн томоохон төслүүд, Улаанбаатар болон 21 аймгийн бүсчлэл гэсэн гурван чиглэлд хийсэн байна.
Энэ талаар МҮХАҮТ-ын дарга Т.Дүүрэн танилцуулахдаа “Бид сүүлийн 30 жилд 15 удаагийн сонгууль явуулж, 18 Засгийн газар сольсон байна. Тэр хэрээр улс төрийн тогтворгүй нөхцөл байдал үүссэн. Энэ нь эргээд эдийн засагт нөлөөлж байна. Цаашид энэ хэвээрээ байвал 2025 он гэхэд эдийн засаг 13 тэрбум ам.доллараар өснө. Харин бидний дэвшүүлж буй аргачлалаар бол 30 тэрбум ам.доллараар өсөх бүрэн боломж байна. Хувийн хэвшилд суурилсан, тэр дундаа манлайлал нь ил тод болсон хөгжлийн загварыг бид санал болгож байна. Ингэснээр цөөн хэдэн бүлэглэл үр ашгийг хүртэх биш 1,3 сая ажлын байр бүрдүүлж буй хувийн хэвшлийн салбарын тэгш оролцоо бий болох юм” гэв.
Уулзалт хэлэлцүүлэгт оролцогчид өөрсдийн байр суурийг илэрхийлж, бизнесийн таатай тогтвортой орчныг бүрдүүлэх, Мэргэжлийн холбоодын тухай, Хөдөлмөрийн тухай, МҮХАҮТ-ын тухай, Өрсөлдөөний тухай зэрэг нэн шаардлагатай хуулиудын яаралтай батлах шаардлагатай байгааг хэлж байлаа. Мөн тэтгэврийн зээлийг нэг удаа тэглэх асуудал болон Салхитын мөнгөний ордын талаар асууж тодрууллаа.
“Авлигачдын халаасанд байсан мөнгийг ард түмний мэдэлд аваад, үр ашигтай ашиглаж болохын байна гэдгийг мэргэжлийн судлаач, эрдэмтэд судалгаа тооцооллыг нь хийсэн. Тэтгэврээ барьцаалсан иргэдэд орлого байхгүй болж байна. 6 хүртэлх сая төгрөгийн зээлийг 330 мянган төгрөгийн тэтгэвэр авдаг иргэнд өгөх боломжтой байдаг. Тэтгэвэр барьцаалсан зээлийн өсөлт 8,9 дүгээр сард оюутны сургалтын төлбөр төлөхөд, 1,2 дугаар сард сар шинийн баяр болоход нэмэгддэг нь судалгаагаар гарсан. Үнэндээ энэ зээлийн мөнгө эргээд бизнесийн орчинд л эргэлддэг. Боломжтой хүмүүс зээл авахгүй. Энэ бол бэлэн мөнгө тарааж байгаа хэрэг биш. Үүгээр бид хоёр том шинэчлэлийг хийж байгаа юм. Нэгдүгээрт, өмнө нь хийж чадахгүй байсан тэтгэврийн реформыг хийнэ. Нийгмийн даатгалын сангаас ил, далд хууль бус үйлдлүүд явсаар ирсэн. Инфляцтай уялдуулж тэтгэврээ нэмж, зарлагаа хэт хяналтгүй өсгөснөөс болж алдагдалд хүрч, хоосорсон. Тиймээс тэтгэврийн сангийн шинэчлэл хийгдэх бололцоогүй болсон. Хоёрдугаарт, хүртээмжтэй эдийн засгийн өсөлтийг хангах зарчмаар Үндэсний баялгийн сан байгуулж байгаа. Үүний эхлэл бол Салхитын мөнгөний ордын үр өгөөж юм. Эрдэнэс МЖЛ гэдэг бол Үндэсний баялгийн сан болно гэсэн үг. Энэ хоёр реформыг Үндсэн хуулийн нэмэлт, өөрчлөлттэй уялдуулаад хэрэгжүүлнэ.
Монгол Улсын Үндсэн хуулийн нэмэлт, өөрчлөлтөөр бодлогын тогтвортой байдлыг бий болгохыг зорьсон. Төрийн тогтвортой байдлыг дагаад төсөв, эдийн засаг, хөрөнгө оруулалтын орчин сайжирна. Ингэснээр бизнес эрхлэгчдэд таатай нөхцөл бүрдэнэ. Хөгжлийн урт хугацааны логик дэс дараалалтай, тогтвортой төрийн бодлогыг хэрэгжүүлж эхэлсэн” хэмээн УИХ-ын дарга Г.Занданшатар хариуллаа.
Уулзалтын төгсгөлд МҮХАҮТ-ын Ерөнхийлөгч О.Амартүвшин бизнес эрхлэгчдийн саналуудыг нэгтгэсэн эдийн засгийг эрчимжүүлэх хөгжлийн загварыг хэрэгжүүлэх саналуудаа УИХ-ын дарга Г.Занданшатарт гардуулан өглөө.
Тэрбээр төр, хувийн хэвшлийн хамтын ажиллагааг бүхий л талаар дэмжиж ажиллахаа илэрхийллээ.
Өнөөдөр
Манба Дацан хийдийн Зурхайч, АУ-ы магистр Д.Сайнсайхан: Төрсөн өдрийн төөрөгт хүний зан чанар, сэтгэл зүй гардаг
- Бурханы сургаалын мөн чанар юу вэ?
- Энэ асуултын хариултыг төөрөг хувь тавилангийн зурхайтай холбон хариулъя гэж бодож байна. Би өдөр болгон хүний зан чанар, төөрөг хувь тавилангийн зурхай зурж байна, үр дүн ч сайн гарч байна.
Бурхан багш “Алтыг яаж шинжилдэг шиг шинжлээд миний шашинд ороорой” гэж хэлсэн байдаг шүү дээ. Тодруулбал, Бурханы шашинд хүн өөрийгөө таньж мэдээд, муу сэтгэл, нисваанисаа арилгаж, төгс гэгээрэлд хүрэх тухай сургадаг.
Өнөөдөр хүн бүр жаргалтай, бас амар амгалан амьдрахыг хүсдэг ч зовлонгийн шалтгаан нь өөрийгөө таньж мэдэж олоогүйд байгаа юм. Өөрийгөө таниагүй, хувь заяагаа мэдэхгүй хүн энэ ертөнцийн учрыг олж чадахгүй. Хамгийн ойр байх заяаны ханиа хүртэл олохгүй “Миний заяаны хань хаана байгаа бол. Ямар хүн байна вэ, хэдэн жилийн дараа учрах бол” гэж ирдэг. Гэвч бид Ванга биш - хүний хувь тавиланг зөгнөнө гэхээс илүүтэйгээр үндэслэлтэй, бодит үнэнд нийцсэн шинжлэх ухаанд тулгуурласан зүйлийг судлах хэрэгтэй.
Монголчуудын “Дэмбэрлийн зурхай буюу төөрөг зурхай” бол хамгийн шинжлэх ухаанч, хүний төрсөн од гараг эрхэсийн астрологид маш сайн үнэнд суурилсан зурхай юм.
- Тэгэхээр төрсөн өдрийн төөрөг зурхай нь Бурханы сургаалын “Өөрийгөө танин мэдэх” үзэлтэй холбогддог байх уу?
- Тийм шүү. Гэхдээ зурхайг тайлж тайлбарлах нь чухал. Олон жилийн судалгаа, туршлага дээр үндэслэж тайлбарлаж өгдөг. Төрсөн өдрийн төөрөг нь тухайн хүний хувь заяаг тодорхойлдог. Тэр утгаараа монголчууд эртнээс “Төрсөн өдрийн төөрөг, гарсан өдрийн гараг” гэж ярьж ирсэн. Үнэндээ мэдэхгүй явах нь хамгийн том аюултай. Тэгэхээр эцэг эхчүүд хүүхдээ багаас нь төөргийг нь зуруулчихвал зөв чиглэлд өсгөж хүмүүжүүлэх боломжтой. Хоёрт, хүн өөрийн төөргийг мэдэх нь амьдралынхаа алдаа, саадыг засах эхлэл болдог.
Бас хүн өөрийн төөргийг мэдэх нь амьдрал дахь алдаа, саадыг засах эхлэл. Нэг сонин зүйл сонирхуулахад “Жендэрийн асуудал” хөндөж байгаа биш шүү, ойлгоорой. Эмэгтэй хүнийг доод, эрэгтэй хүнийг дээд заяатай гэж ярьдаг нь төрсөн өдрийн төөргөөс нь харахад тодорхой юм. Нэг сард төрсөн нийт эрэгтэй хүмүүс 9 өдөр нь өндөр сайн заяанд төрөх магадлалтай байхад, эмэгтэй хүнд зөвхөн 3 өдөр байгаа юм. Тэгвэл муу заяанд төрөх магадлалтай эрэгтэй хүн 3 өдөр төрж байхад эмэгтэй хүн 12 өдөр төрөх магадлалтай байх. Тухайлбал, өвдөж зовдог, сэтгэл зүй тогтворгүй, ханийн заяа муу, аж амьдрал тэгширдэггүй гэхчилэн. Тэгэхээр төрсөн өдрийн гараг эрхэс, астралогийн нөлөө хувь заяа, зан чанарт шууд нөлөөлдөг юм. Энийг би олон жилийн энэхүү зурхайг зурсан туршлага, ажиглалтаас харж байгаа учраас үнэн гэж баттай мэдээд хэлж байгаа юм.
- Засаж залруулж болох уу?
- Бололгүй яах вэ, өдрийн төөргийн нөлөөг номоор засах боломжтой. Энэ бол хатуу нөлөө учраас зөвхөн хүний хичээл зүтгэлээр засагддаггүй зүйл. Тийм учраас өдрийн төөргийн хатууг бага залуу насандаа мэдэх тусмаа эрт засаж залруулаад явах боломжтой.
- Тийм үү. Эндээс үүдээд асуухад “Өндөр заяатай” хүмүүсийн тухай яриа сонсож байлаа?
- Маш өндөр заяатай хүмүүс гэж байна аа. Ийм заяанд төрсөн хүмүүсийн хувьд дундаж амьдрал гэж байдаггүй юм. Харж байхад нэг бол хамгийн сайн амьдарна, эсвэл хамгийн муу амьдардаг эрсдэлтэй. Ийм хүнтэй гэр бүл болсноор энэ үйлийг нь хамт эдэлнэ. Тийм болохоор төрсөн өдрийн өндөр заяатай энэ хүмүүсийг багад нь төөргийн зурхайг нь зуруулан, засаж залруулбал мөн л хамгийн сайнаар амьдрах боломжтой. Ийм өндөр заяатай хүмүүс над дээр ирнэ л дээ. Тэдний тал хувь нь өөрөө ирэх бөгөөд хэдийнээ амжилтанд хүрсэн, сайн яваа хүмүүс байдаг. Гэтэл нөгөөг нь ойр тойрны хүн нь амьдрал нь болохгүй байна гэж дагуулж, асууж их ирдэг. “маш их санаа зовоож байна” гэж ярих жишээний.
- Төөрөг, зан чанар хоёр холбоотой юу?
- Төрсөн өдрийн төөрөгт хүний зан чанар, сэтгэл зүй гардаг. Тэгэхээр өөрийгөө таньсан хүн өөрийгөө удирдаж чадна. Иймээс ээж аавууд хүүхдийн төөргийг зуруулснаар зан чанарт тохируулан зөв харьцаж, мууг нь засаж, сайн талыг нь дэвжээж зөв харьцана гэсэн үг. Ингэснээр нэгд үр хүүхдээ зөв хүн болж төлөвшүүлэх. Хоёрт, ээж аав нар үр хүүхэдтэйгээ яаж зөв харьцана тийм хүнтэй үр хүүхэд нь сууж амьдардаг. Тиймээс хүүхдээ зөв харж, зөв чиглүүлэх нь хамгийн том хөрөнгө оруулалт юм.
Хүүхэд нас бага гэлтгүй гэр доторх бүхнийг чихээрээ сонсож, нүдээрээ хараад бүхнийг мэдэрдэг. Тэндээс мэдэрсэн зүйлээр ирээдүйн амьдралаа бүтээдэг байх нь л дээ. Гэр бүлийн талаар олон ч хүнтэй уулзаж ярилцаж байна. Ер нь хүн далд ухамсраараа амьдралаа шийддэг. Хэдийгээр эрдэм боловсрол чухал ч, зөв хүмүүжил, зөв төлөвшилгүй хүн сайхан амьдралд хүрдэггүй. Тиймээс төөрөг зурхай бол амьдралын заавар биш, харин өөрийгөө танин мэдэх, хувь тавилангаа ухаарах гарын авлага юм.
-Ярилцсанд баярлалаа.
Өнөөдөр
Ойрын хоногуудад ихэнх нутгаар өдөртөө дулаарна
Малчид, иргэд, тээвэрчдэд зориулсан мэдээ: Ойрын хоногуудад ихэнх нутгаар өдөртөө дулаарна.
2025 оны аравдугаар сарын 31-ний 08 цагаас 20 цаг хүртэл: Нутгийн зүүн хэсгээр солигдмол үүлтэй. Хэрлэн, Онон, Улз, Халх голын хөндийгөөр ялимгүй цас орно. Бусад нутгаар багавтар үүлтэй, цас орохгүй.
Салхи ихэнх нутгаар баруун хойноос секундэд 5-10 метр, говь, тал, хээрийн нутгаар секундэд 12-14 метр хүрч ширүүснэ. Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Туул, Тэрэлж голын хөндийгөөр 0-5 хэм, говийн бүс нутгийн өмнөд хэсгээр 11-16 хэм, бусад нутгаар 5-10 хэм дулаан байна.
УЛААНБААТАР ХОТ ОРЧМООР: Үүлшинэ. Цас орохгүй. Салхи баруунаас секундэд 5-10 метр. 3-5 хэм дулаан байна.
БАГАНУУР ОРЧМООР: Үүлшинэ. Цас орохгүй. Салхи баруун хойноос секундэд 6-11 метр. 3-5 радус дулаан байна.
ТЭРЭЛЖ ОРЧМООР: Үүлшинэ. Цас орохгүй. Салхи баруун хойноос секундэд 5-10 метр. 3-5 хэм дулаан байна.
2025 оны арваннэгдүгээр сарын 01-нээс 05-ныг хүртэлх
цаг агаарын урьдчилсан төлөв
Арваннэгдүгээр сарын 01-нд зүүн аймгуудын нутгийн зарим газраар, 02-нд Монгол-Алтайн уулархаг нутаг болон Дархадын хотгороор ялимгүй цас, 03-нд Хөвсгөл, Хэнтийн уулархаг нутаг, Сэлэнгэ, Хараа, Ерөө, Онон, Улз голын хөндийгөөр цас орно. Салхи ихэнх нутгаар секундэд 4-9 метр, 2, 3-нд нутгийн зарим газраар секундэд 12-14 метр хүрч ширүүснэ. Ихэнх нутгаар өдөртөө дулаарч Дархадын хотгор, Хангай, Хөвсгөлийн уулархаг нутаг, Хүрэлбэлчир орчмоор шөнөдөө 15-20 хэм хүйтэн, өдөртөө 0-5 хэм дулаан, Монгол-Алтай, Хэнтийн уулархаг нутаг, Идэр, Тэс, Туул, Тэрэлж голын хөндийгөөр шөнөдөө 8-13 хэм хүйтэн, өдөртөө 4-9 хэм дулаан, говийн бүс нутгийн өмнөд хэсгээр шөнөдөө 2 хэмийн хүйтнээс 3 хэмийн дулаан, өдөртөө 13-18 хэм дулаан, бусад нутгаар шөнөдөө 4-9 хэм хүйтэн, өдөртөө 7-12 хэм дулаан байна. 3-нд нутгийн хойд хэсгээр бага зэрэг сэрүүснэ.
Өнөөдөр
УИХ: Өнөөдөр хуралдах ажлын хэсгүүд
Монгол Улсын Их Хурлын ажлын хэсгүүдийн өнөөдрийн /2025.10.31/ хуралдааны товыг та бүхэнд хүргэж байна.
|
Д/Д |
ХУРАЛДААН |
ХЭЛЭЛЦЭХ АСУУДАЛ |
ЦАГ |
ТАНХИМ |
|
1 |
Төсвийн байнгын хороо |
Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүдийг хэлэлцүүлэгт бэлтгэх үүрэг бүхий ажлын хэсгийн хуралдаан |
11.00 |
“Үндсэн хууль” |
|
2 |
Төсвийн байнгын хороо |
Монгол Улсын 2026 оны төсвийн тухай хуулийн төсөлтэй хамт өргөн мэдүүлсэн хууль, тогтоолын төслүүдийг хэлэлцүүлэгт бэлтгэх үүрэг бүхий ажлын хэсгийн хуралдаан |
13.00 |
“Үндсэн хууль” |
