Тод мэдээ
МҮОНРТ Эрүүл мэндийн яамтай хамтарч ажиллана
МҮОНРТ-ийн Ерөнхий захирал А.Бүрэнбаатар, Эрүүл мэндийн яамны Сайд С.Чинзориг нар 2023 оны гуравдугаар сарын 09-ний өдөр хамтын ажиллагааны санамж бичигт гарын үсэг зурлаа.
Энэхүү санамж бичгийн зорилго нь талуудын хөгжилд шаардлагатай төсөл хөтөлбөр хэрэгжүүлэх, шинэ технологи, инновацийн хамтын ажиллагаа, түншлэлийг өргөжүүлэхэд оршиж байна. Уг санамж бичиг энэ сарын 15-наас нэг жилийн хугацаатай үргэлжлэх бөгөөд МҮОНРТ нь эрүүл мэндийн чиглэлээр тогтсон цагтай болж, эрүүл мэндийг дэмжих үйл ажиллагаанд нийгмийн бүхий л салбарын оролцоог хангах юм.
Ингэхдээ иргэдийн нас, хүйс, эрүүл мэндийн эрсдэлд суурилсан боловсрол олгох, эрүүл зан үйл төлөвшүүлэх, өвчлөлөөс урьдчилан сэргийлэх тухай мэдээ мэдээлэл, контент, нэвтрүүлэг, сурталчилгаа бэлтгэх аж.
Хамтын ажиллагааны санамж бичигт гарын үсэг зурахад Эрүүл мэндийн сайдын зөвлөх Ц.Эрдэмбилэг, Төрийн нарийн бичгийн даргын албан үүргийг түр орлон гүйцэтгэгч С.Төгсдэлгэр, Төрийн захиргааны удирдлагын газрын даргын албан үүргийг түр орлон гүйцэтгэгч Б.Янжмаа, Нийтийн эрүүл мэндийн газрын даргын албан үүргийг түр орлон гүйцэтгэгч Д.Баярболд, Нийтийн эрүүл мэндийн газрын Урьдчилан сэргийлэлт, хяналт зохицуулалтын хэлтсийн дарга Б.Туяа, Эрүүл мэндийн сайдын хэвлэл, мэдээлэл хариуцсан зөвлөх Н.Сарангэрэл, Нийгмийн эрүүл мэндийн үндэсний төвийн захирал С.Өнөрсайхан, МҮОНРТ-ийн Стратеги, хамтын ажиллагааны газрын захирал З.Бадрал, Гадаад харилцааны мэргэжилтэн Ч.Энхжаргал нар байлцсан юм.
Энэ үеэр дараах эрхмүүдээс тодруулга авсан юм.
А.Бүрэнбаатар: Эрүүл мэндийн боловсролыг иргэдэд олгоход анхаарна
МҮОНРТ-ийн Ерөнхий захирал.
-Хамтын ажиллагааны гол зорилго нь Эрүүл мэндийн яамнаас явуулж байгаа бодлого, шийдвэрийг сурталчлах, эрүүл мэндийн боловсролыг иргэдэд олгоход анхаарна. Эрүүл мэндийн яамны зүгээс бидэнтэй хамтарч ажиллахдаа “Бодлогын дэмжлэг үзүүлье” гэсэн учраас өнөөдөр санамж бичигт гарын үсэг зурлаа. Манай улсад зонхилон тохиолдож байгаа өвчлөлийн шалтгаан нь иргэд эрүүл мэндийн боловсрол тааруу байгаагаас улбаатай. Мөн буруу дадал зуршил, хоол хүсний зохисгүй хэрэглээ зэргээс үүдэж таргалалт ихэсч байна. Энд суурин амьдралын соёл ч нөлөөлж байгаа. Тиймээс дээрх өвчлөлийг хэн нэгэн туссаны дараа эмчлэх биш урьдчилан сэргийлэхэд нь дэм болох юм. Хэрвээ өвдсөн тохиолдолд яаж эмчлэх талаар ч мэдлэг мэдээлэл олгоно. Ингэхдээ иргэдийнхээ хамгийн амархан ойлгох байдлаар нь хүргэнэ.
-С.Чинзориг: Иргэдээ өвчилсний дараа эмчлэх биш урьдчилан сэргийлэхэд нь мэдлэг түгээнэ
Эрүүл мэндийн яамны Сайд.
-Олон улсын туршлагаас судлахад нийгмийн эрүүл мэнд, анхан шатны тусламж үйлчилгээнд их анхаардаг. Харин манай улсын хувьд энэ талд нэлээн орхигджээ. Тиймээс бид иргэдээ өвчилсний дараа эмчлэх биш урьдчилан сэргийлэх үүднээс мэдлэг, мэдээлэл түгээх, нийгмийн эрүүл мэндийн боловсрол олгох зайлшгүй шаардлагатай юм. Өнөөдрийн санамж бичгийн агуулга үндсэндээ энэ. Дараа нь иргэд аливаа өвчлөлөөс хэрхэн урьдчилан сэргийлэхээ МҮОНРТ-тэй хамтран бэлтгэх контентуудаас харж болно. Ер нь олон улсын байгууллагуудаас харахад хүний эрүүл мэндийн 10-15 хувь нь тухайн улсын нь эрүүл мэндийн байгууллагатай холбоотой. Үлдсэн 85-90 хувь нь хувь хүн өөрөөс нь шалтгаалдаг гэсэн байдаг.
Тод мэдээ
Монгол Улсын Ерөнхий сайд Г.Занданшатар ОХУ-ын Ерөнхийлөгч В.В.Путинд бараалхлаа
Монгол Улсын Ерөнхий сайд Г.Занданшатар ОХУ-ын Ерөнхийлөгч В.В.Путинд бараалхлаа. Уулзалтын эхэнд Ерөнхий сайд Г.Занданшатар ОХУ-тай уламжлалт, сайн хөршийн найрсаг харилцаагаа улам бүр гүнзгийрүүлэн хөгжүүлэх нь Монгол Улсын гадаад бодлогын тэргүүлэх чиглэл болохыг дурдав.
Тод мэдээ
“Хог шатааж эрчим хүч гаргах үйлдвэр” жилд 8000 цаг ажиллаж, 35 МВт эрчим хүч үйлдвэрлэнэ
Төр, хувийн хэвшлийн түншлэлийн тухай хуулиар Монгол Улсын хэмжээнд анх удаа хэрэгжих томоохон бүтээн байгуулалтын нэг “Хог шатааж эрчим хүч гаргах үйлдвэр” барих түншлэлийн гэрээг өнгөрөгч сард байгуулсан. Төслийн гүйцэтгэгчээр Рэншоу Сычуань эрчим хүчний хөрөнгө оруулалт, байгаль орчныг хамгаалах ХХК шалгарсан юм.
Өдөрт 1500 тонн хог шатаах хүчин чадалтай үйлдвэрийг Хан-Уул дүүргийн 12 дугаар хороо, Морингийн даваанд 10 га газарт барих хөрөнгө оруулалтын хэмжээ 206.5 сая ам.доллар байх бөгөөд бүтээн байгуулалтыг 30 сарын хугацаанд гүйцэтгэж, 28 жилийн дараа төрд шилжүүлнэ. Тус үйлдвэр нь жилд 8000 цаг ажиллаж, 35 МВт хүчин чадал бүхий цахилгаан эрчим хүч түгээнэ.
Нийслэлийн хэмжээнд гурван төвлөрсөн хогийн цэгт нийлүүлж буй нийт хог хаягдлын 11.4 хувийг дахин боловсруулж, 88.6 хувийг булж устгаж байна. Хогийг булж устгах арга нь метан хийг ихээр ялгаруулдаг, байгаль орчинд сөрөг нөлөө ихтэй. Тиймээс хогийг булж устгахгүйгээр шатаах аргаар эрчим хүч гаргаж авах дэвшилтэт технологи бүхий “Хог шатааж эрчим хүч гаргах үйлдвэр”-ийг барих юм.
Сүүлийн жилүүдэд “Urban mining” гэдэг ойлголт дэлхийн хотуудад дэлгэрч байна. Энэ нь өмнөх жилүүдэд булсан хогийг буцаан ухаж, шатаан эрчим хүч үйлдвэрлээд байгаль экологио 100 хувь сэргээх ойлголт юм. Тус төсөл нь Монгол Улсад экологийн чухал ач холбогдолтой. Шатаах үйлдвэрт зөвхөн Улаанбаатар хотын хог хаягдлыг шатаагаад зогсохгүй, Төв аймгийн Зуунмод хот, Алтанбулаг, Сэргэлэн сумдын хогийг үнэ төлбөргүй шатаана. Мөн Улаанчулуут, Цагаандавааны хогийн цэгүүдэд ойрын 10 жилд дарагдсан хогийг ухаж авч, шатаан байгаль экологио бүрэн цэвэрлэнэ.
Тод мэдээ
Хром, хар тугалгын бохирдол зөвшөөрөгдөх хэмжээнээс 3-9 дахин их илэрч байна
Цаг уур, орчны шинжилгээний газрын харьяа Байгаль орчин, хэмжил зүйн төв лаборатори Нийслэлийн 9 дүүргийн 100 гаруй цэгт хөрсний сорьц авч агро химийн болон хүнд металлын 16 төрлийн бохирдуулах бодисын хэмжээг MNS стандарт аргачлалын дагуу тодорхойлж байна.
2020-2024 онуудын хүнд металлын хяналт шинжилгээний дүнгээр Цинк, Стронци тогтвортой бууралттай, Хар тугалаг, Хром, Цайр өсөх хандлагатай, Зэс, Кобальтын агууламж бага зэрэг хэлбэлзэлтэй, Мөнгөн ус, Bорын агууламж 2024 онд бараг тэг болж буурсан байна.
Хром, хар туглагын бохирдол Монгол Улсын хөрсний эрүүл ахуй MNS5850:2019 стандартаас 3-9 дахин их илэрч байгаа ба Харгиа арьс ширний үйлвэрийн орчим, Цагаан чулуутын хогийн цэгийн орчим, ДЦС-3 орчимд стандарт хэмжээнээс их, бусад цэгүүдэд стандарт хэмжээнээс даваагүй ч, байгалийн Фон хэмжээнээс өндөр агууламжтай байна гэж Цаг уур, орчны шинжилгээний газраас мэдээллээ.
