Малчид, иргэд, тээвэрчдэд зориулсан мэдээ: 24, 25-нд нутгийн баруун хагаст, 26-нд нутгийн хойд хагаст бороо, дуу цахилгаантай аадар бороо орно.

2026 оны зургаадугаар сарын 24-ний 08 цагаас 20 цаг хүртэл: Нутгийн баруун хагаст үүлэрхэг, бусад нутгаар солигдмол үүлтэй. Баруун аймгуудын ихэнх нутаг, төвийн аймгуудын нутгийн баруун хойд, зүүн аймгуудын нутгийн зүүн өмнөд хэсгээр бороо, дуу цахилгаантай аадар бороо орно. Бусад нутгаар бороо орохгүй.

Салхи нутгийн баруун хэсгээр баруун өмнөөс баруун хойш эргэж, бусад нутгаар баруун хойноос секундэд 5-10 метр, Алтайн салбар уулс болон говь, талын нутгаар секундэд 12-14 метр хүрч ширүүснэ. 

Монгол-Алтай, Хангай, Хөвсгөлийн уулархаг нутаг, Завхан голын эх, Хүрэн бэлчир орчмоор 12-17 хэм, Их нууруудын хотгор, Сэлэнгийн сав газар, говийн бүс нутгийн өмнөд хэсэг, Дорнодын тал нутгаар 24-29 хэм, бусад нутгаар 19-24 хэм дулаан байна.

УЛААНБААТАР ХОТ ОРЧМООР: Багавтар үүлтэй. Бороо орохгүй. Салхи баруунаас секундэд 5-10 метр. Өдөртөө 21-23 хэм дулаан байна.

БАГАНУУР ОРЧМООР: Багавтар үүлтэй. Бороо орохгүй. Салхи баруунаас секундэд 6-11 метр. Өдөртөө 20-22 хэм дулаан байна.

ТЭРЭЛЖ ОРЧМООР: Багавтар үүлтэй. Бороо орохгүй. Салхи баруунаас секундэд 4-9 метр. Өдөртөө 19-21 хэм дулаан байна.

2026 оны зургаадугаар сарын 25-наас
2026 оны зургаадугаар сарын 29-нийг хүртэлх
цаг агаарын урьдчилсан төлөв

25-нд баруун аймгуудын нутгийн зүүн, төвийн аймгуудын нутгийн баруун болон өмнөд хэсэг, говийн аймгуудын нутгийн зарим газраар, 26-нд төвийн аймгуудын нутгийн ихэнх нутаг, баруун, говь болон зүүн аймгуудын нутгийн зарим газраар, 27, 28-нд нутгийн зарим газраар бороо, дуу цахилгаантай аадар бороо орно. Салхи ихэнх хугацаанд секундэд 5-10 метр, борооны өмнө түр зуур ширүүснэ. Ихэнх нутгаар бага зэрэг дулаарч Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Туул, Тэрэлж, Хэрлэн голын хөндийгөөр шөнөдөө 5-10 хэм, өдөртөө 17-22 хэм, Их нууруудын хотгор, Алтайн өвөр говиор шөнөдөө 18-23 хэм, өдөртөө 28-33 хэм, бусад нутгаар шөнөдөө 10-15 хэм, өдөртөө 22-27 хэм дулаан байна. 

Монгол Улсын Шадар сайд Н.Номтойбаярын Бүгд Найрамдах Турк Улсад хийж буй ажлын айлчлалын хүрээнд 2026.06.22 БНТУ-ын Дотоод хэргийн яамны харьяа Гамшиг, онцгой байдлын удирдлагын газар (AFAD)-ын дарга Али Хамза Пехливан, Худалдааны сайд Өмер Болат, Туркийн Барилгачдын холбооны Удирдах зөвлөлийн гишүүд болон контрактор компаниудын төлөөлөлтэй тус тус албан уулзалт хийлээ.

Шадар сайд Н.Номтойбаяр БНТУ-ын Дотоод хэргийн яамны харьяа Гамшиг, онцгой байдлын удирдлагын газрын дарга Али Хамза Пехливантай уулзах үеэрээ гамшгийн эрсдэлийг бууруулах, гамшгийн удирдлагын чадавхыг бэхжүүлэх, мэдээллийн технологид суурилсан орчин үеийн шийдлүүдийг нэвтрүүлэх чиглэлээр хамтын ажиллагаагаа өргөжүүлэх асуудлаар санал солилцов.

Тодруулбал, Турк Улсын AFAD байгууллагын гамшгийн удирдлагын нэгдсэн мэдээллийн сан, мэдээллийн технологид суурилсан удирдлагын тогтолцоо нь гамшгийн эрсдэлийг шуурхай үнэлэх, хариу арга хэмжээг оновчтой зохион байгуулахад өндөр үр дүнтэй туршлага болж байгааг онцолж, энэхүү туршлагаас суралцах сонирхолтой буйгаа илэрхийллээ.

Мөн онцгой байдлын байгууллагын алба хаагчдыг AFAD-ийн Зарлан мэдээллийн төвийн үйл ажиллагаанаас туршлага судлуулах, гамшгаас урьдчилан сэргийлэх, эрэн хайх, аврах ажиллагаа болон гамшгийн хор уршгийг арилгах үйл ажиллагаанд агаараас тандалт, үнэлгээ хийх зориулалттай дэвшилтэт технологийн дрон нийлүүлэх чиглэлээр хамтарсан төсөл, хөтөлбөр хэрэгжүүлэх боломжийн талаар онцоллоо.

Шадар сайд Н.Номтойбаяр БНТУ-ын Худалдааны сайд Өмер Болаттай уулзах үеэрээ Монгол Улс “Эдийн засгийн тусгай бүсийн тухай” хуулийн төслийг боловсруулж буй талаар танилцуулж, хөрөнгө оруулалтын тогтвортой орчин бүрдүүлэх, нэг цонхны үйлчилгээг нэвтрүүлэх, татварын уян хатан зохицуулалт бий болгох чиглэлээр хэрэгжүүлж буй шинэчлэлийн талаар санал солилцов.

Талууд эдийн засгийн тусгай бүсийн эрх зүйн орчныг бүрдүүлэх нь худалдаа, үйлдвэрлэл, хөрөнгө оруулалтын хамтын ажиллагааг өргөжүүлэх чухал суурь болохыг онцолж, хоёр улсын бизнес эрхлэгчдийн хамтын ажиллагааг дэмжих чиглэлээр хамтран ажиллахаа тодотгож байна.

Мөн Шадар сайд Н.Номтойбаяр БНТУ-ын Анкара хотноо Туркийн Барилгачдын холбоо (TCA)-ны Удирдах зөвлөлийн гишүүд болон контрактор компаниудын төлөөлөлтэй уулзаж, Хархорум хотын төлөвлөлт, хот байгуулалтын төсөл, зам тээвэр, дэд бүтцийн салбарын хамтын ажиллагааны боломжийн талаар хэлэлцэв.

Уулзалтаар Туркийн барилгын компаниудыг Монгол Улсад хэрэгжүүлэх томоохон төсөл, хөтөлбөрүүдэд оролцуулах, тээвэр логистик, төмөр зам болон дэд бүтцийн чиглэлээр хамтын ажиллагааг өргөжүүлэх боломжийн талаар санал солилцлоо.

Талууд Монгол, Туркийн стратегийн түншлэлийг худалдаа, хөрөнгө оруулалт, дэд бүтцийн салбарын бодит төсөл, хөтөлбөрөөр өргөжүүлэн хөгжүүлэхийн төлөө хамтран ажиллахаа илэрхийллээ.

Өнгөрсөн хугацаанд Онцгой байдлын байгууллага гамшиг, аюулт үзэгдэл, осол, эрсдэлээс ард иргэдээ хамгаалах, аюулгүй орчинд амьдрах нөхцөлийг бүрдүүлэхээр нөөц бололцоогоо дайчлан, гамшгаас хамгаалах бодлогын шинэчлэлийг хэрэгжүүлж байгаад талархал илэрхийллээ.

Ажилтан, алба хаагчдын найдвартай ар тал, түшиг тулгуур болсон гэр бүл, үр хүүхдүүдэд нь төрийн нэрийн өмнөөс талархал илэрхийлж, эрүүл энх, аз жаргал, сайн сайхан бүхнийг хүсэн ерөөлөө.  

Үндэсний сөрөн тэсвэрлэх стратегийг бусад байгууллагатай хамтран боловсруулж, хэрэгжүүлэхэд Онцгой байдлын байгууллагын манлайлал, хүчин чармайлт чухал болохыг тэмдэглэлээ.

Манай оронд тохиолдсон аюулт үзэгдэл, ослын 80 орчим хувь нь хүний санамсар болгоомжгүй үйлдлээс үүдэлтэй.

Иймээс ард иргэдээ соён гэгээрүүлэх, аюул, эрсдэлээс урьдчилан сэргийлэх бэлтгэл, бэлэн байдлыг хангах, иргэний үүргээ биелүүлэхэд нь чиглүүлэх, мэргэжлийн дэмжлэг үзүүлэх шаардлагатайг хэллээ.

Цаашид гамшигтай тэмцэх, эрэн хайх, аврах, гамшгийн хор уршгийг арилгах, хойшлуулшгүй сэргээн босгох чадавхыг дээшлүүлэх, ард иргэдийн итгэлийг хүлээсэн, орчин үеийн мэргэжлийн байгууллага болгон бэхжүүлэх үйлсийг бүх талаар дэмжихээ илэрхийллээ.  

Хиймэл оюун, цахим шилжилт, тоон өгөгдөл, сансрын болон орон зайн мэдээллийн технологи ашиглах, гал унтраагч робот, нисгэгчгүй нисэх төхөөрөмж зэрэг дэвшилтэт технологи нэвтрүүлэх, алба хаагчдын хөдөлмөрийн нөхцөлийг хөнгөвчлөн, аюулгүй ажиллагааг хангах чиглэлээр шуурхай ажиллахыг санууллаа.

Техник, тоног төхөөрөмж, автомашин, аврах ажиллагааны багаж хэрэгслийг өндөр бүтээмжтэй ашиглах, гамшигтай тэмцэх, эрэн хайх, аврах, гал унтраах ажиллагааг алдаа мадаггүй, шуурхай гүйцэтгэх мэдлэг, ур чадвараа тасралтгүй дээшлүүлэхийг Зэвсэгт хүчний Ерөнхий командлагч үүрэг болголоо.

22 жилийн өмнө Гал түймэртэй тэмцэх газар, Улсын иргэний хамгаалалтын газар, Улсын нөөцийн газрыг нэгтгэж гамшиг, ослоос урьдчилан сэргийлэх, авран хамгаалах, хойшлуулшгүй сэргээн босгох үйл ажиллагааг удирдан зохион байгуулах чиг зорилго бүхий Онцгой байдлын албыг байгуулсан юм.

Жил бүрийн 06 дугаар сарын 20-ны өдөр Онцгой байдлынхан үндэсний аюулгүй байдал, улс орны тогтвортой хөгжил, ард иргэдийн аюулгүй байдлыг хангах үүргээ хэрхэн гүйцэтгэж байгаагаа иргэд, олон нийтэд тайлагнадаг.   

Мөн үе үеийн алба хаагчдын үйлс, амжилт, гавьяаг алдаршуулан, эх орон, ард түмнийхээ төлөө алтан амиа зольсон баатруудаа хүндэтгэн дурсдаг юм. 

Өнгөрсөн хугацаанд 87 орчим мянган гамшиг, аюулт үзэгдэл, ослын үед үүрэг гүйцэтгэж, 50 орчим мянган хүний амь нас, 3 орчим их наяд төгрөгийн эд хөрөнгийг авран хамгаалжээ.

Албаны хэмжээнд тусгай зориулалтын хувцасны хангалт 64.4, техник, тоног төхөөрөмжийн хангалт 57.7 хувьтай байгааг 80 хувьд хүргэхээр төлөвлөжээ.

Онцгой байдлын байгууллага гамшгаас хамгаалах үндэсний чадавхыг бэхжүүлэхэд бодлого, үйл ажиллагаагаа чиглүүлж байна.

Франц Улстай хамтран Агаараас аврах ажиллагааны нэгж байгуулж, гал унтраах тусгай зориулалтын автомашинаар анги, салбараа хангасан. Мөн анх удаа  дотооддоо нисгэгч, инженер, техникийн ажилтнуудаа бэлтгэж, агаараас эрэн хайх, аврах ажиллагааг бие даан гүйцэтгэдэг болжээ. 

Азийн хөгжлийн банктай хамтран хэрэгжүүлж буй төслийн дүнд гамшгийн аюулыг эрт сэрэмжлүүлэх тогтолцоо бүрдэж, гамшигтай тэмцэх техник, тоног төхөөрөмжийн хангалт нэмэгдэн, бүх шатны байгууллага, орон нутгийн удирдлага, иргэд, олон нийтийн гамшгаас хамгаалах бэлэн байдал дээшилж, оролцоо сайжирна гэж үзэж байна.

Холбогдох хуулиудад нэмэлт, өөрчлөлт оруулснаар гамшгаас хамгаалах удирдлага, зохицуулалт, төлөвлөлт, сургалт, бэлэн байдал, санхүүжилтийн тогтолцоо шинэ шатанд гарч, төр, хувийн хэвшил, иргэдийн оролцоонд тулгуурласан гамшгийг сөрөн тэсвэрлэх үндэсний чадавх бэхжих юм.

Монгол Улсын Ерөнхийлөгч У.Хүрэлсүх Онцгой байдлын ерөнхий газрын ахмад ажилтан, бэлтгэл хурандаа, Үндэсний батлан хамгаалахын их сургуулийн багш, доктор, профессор Пүрэвийн Цэдэвт Гавьяат багш, Онцгой байдлын ерөнхий газрын Ахмадын хорооны Удирдах зөвлөлийн гишүүн, бэлтгэл хурандаа Оргийн Ганхуягт Үйлчилгээний гавьяат ажилтан цол хүртээлээ.

Мөн нэр бүх ажилтан, алба хаагчдыг төрийн дээд одон, медалиар шагналаа. Дархан-Уул аймгийн Онцгой байдлын газрын Эрэн хайх, аврах ангийн Аврах бүлгийн аврагч, нохой хөтлөгч, ахлах ахлагч Энхбаярын Банзрагч, Онцгой байдлын ерөнхий газрын дэргэдэх 111 дүгээр ангийн Аврах ажиллагааны мэргэжилтэн, ахмад Жүгдэрийн Цолмонбаатар нарыг Шударга журам медалиар шагналаа.

Дорнод аймгийн Онцгой байдлын газрын Эрэн хайх, аврах ангийн аврагч-химичин, ахлах ахлагч Даваажавын Төрмөнхөд Онцгой байдлын байгууллагын анхны сайдын нэрэмжит шагнал гардууллаа.