Тод мэдээ
ОНРТ-ийн Үндэсний зөвлөлд нэр дэвшигчдээс сонголт хийх ажлын хэсэг байгууллаа
Олон нийтийн радио, телевизийн хуулийн 21 дүгээр зүйлийн 21.1 дэх хэсэгт “Үндэсний зөвлөл нь олон нийтийн ашиг сонирхлыг төлөөлөх орон тооны бус байгууллага бөгөөд 15 гишүүнтэй байна” гэж заасан.
Үндэсний зөвлөлийн гишүүний бүрэн эрхийн хугацаа нь 6 жил байх бөгөөд ял шийтгэлгүй, иргэний нийгмийн төлөөллөөс санал болгосон Монгол Улсын иргэнийг гишүүнээр томилох хуулийн зохицуулалттай.
Монгол Улсын Их Хурал нь олон нийтийн радио, телевизийн удирдах дээд байгууллага болох Үндэсний зөвлөлийн гишүүнд долоон хүнийг нэр дэвшүүлэх эрхтэй бөгөөд Улсын Их Хурлаас нэр дэвшүүлж томилсон долоон гишүүний гуравынх нь бүрэн эрхийн хугацаа 2025 оны 04 дүгээр сарын 19-ний өдөр дуусгавар болсон байна.
Олон нийтийн радио, телевизийн хуулийн 21 дүгээр зүйлийн 21.6 дахь хэсэгт заасны дагуу холбогдох төрийн бус байгууллагууд “…эрх зүй, гадаад харилцаа, сэтгүүл зүй, эрүүл мэнд, боловсрол, биеийн тамир, спорт, байгаль орчин, хөдөлмөр, нийгмийн хамгааллын чиглэлээр үйл ажиллагаа явуулдаг төрийн бус байгууллагууд тухайн чиглэлээр мэргэшсэн хүний нэрийг Улсын Их Хуралд” санал болгох хуулийн зохицуулалттай юм.
Мөн тус хуулийн 21 дүгээр зүйлийн 21.7 дахь хэсэгт “Энэ хуулийн 21.5-д заасан байгууллага, албан тушаалтан төрийн бус байгууллагуудын саналаас сонголт хийн Yндэсний зөвлөлийн гишүүнд нэр дэвшүүлж, Улсын Их Хуралд өргөн мэдүүлнэ” гэсний дагуу Улсын Их Хуралд холбогдох төрийн бус байгууллагуудаас ирүүлсэн саналаас сонголт хийх үүрэг бүхий Ажлын хэсэг байгуулах шаардлага гарсан байна.
Түүнчлэн, Монгол Улсын Их Хурлын хяналт шалгалтын тухай хуулийн 30 дугаар зүйлийн 30.1.1 дэх заалт, Олон нийтийн радио, телевизийн тухай хуулийн 21 дугаар зүйлийн 21.8 дахь хэсэгт Үндэсний зөвлөлийн гишүүнд нэр дэвшигчийг Улсын Их Хурал нэр дэвшигчийн сонсгол хийсний үндсэн дээр хэлэлцэж, зөвлөлийн гишүүнээр томилохоор тус тус заасан тул Төрийн байгуулалтын байнгын хороо холбогдох төрийн бус байгууллагуудаас ирүүлсэн саналаас сонгон шалгаруулалт хийх үүрэг бүхий Ажлын хэсэг байгуулах тогтоолын төслийг боловсруулсныг Улсын Их Хурлын Төрийн байгуулалтын байнгын хорооны 2025 оны арванхоёрдугаар сарын 09-ний өдрийн хуралдаанд Байнгын хорооны дарга Ц.Сандаг-Очир танилцуулав.
Тогтоолын төслүүдтэй холбогдуулан асуулт гараагүй бөгөөд тус ажлын хэсгийг УИХ-ын гишүүн Б.Баярбаатараар ахлуулан байгуулж, УИХ-ын гишүүн Э.Болормаа, А.Ганбаатар, Ц.Идэрбат, Г.Уянгахишиг, Ч.Лодойсамбуу нар бүрэлдэхүүнд нь ажиллахаар тогтлоо.
Тод мэдээ
Түр хамгаалах байр болон нэг цэгийн үйлчилгээний төвүүдэд ажлын хэсэг ажиллаж байна
Түр хамгаалах байр болон нэг цэгийн үйлчилгээний төвүүдэд ажлын хэсэг ажиллаж байна.
Гэр бүл, хөдөлмөр, нийгмийн хамгааллын яамны ТНБД-ын тушаалаар байгуулагдсан ажлын хэсэг нийслэлийн хэмжээнд үйл ажиллагаа явуулж буй түр хамгаалах байр, нэг цэгийн үйлчилгээний төвийн өнөөгийн нөхцөл байдал, тулгамдсан асуудал, төрөлжүүлэн зохион байгуулах хэрэгцээ, шаардлагыг судалж, дүн шинжилгээ хийх зорилгоор Гэр бүлийн газрын дарга Ц.Мөнхзулаар ахлуулан ажиллаж байна.
Тод мэдээ
“Хоёрдугаар тойрог зам” төслийн трассыг инженерийн шийдэл, байгаль орчин, эдийн засгийн үр ашгаар нь сонгожээ
Улаанбаатар хотын авто замын сүлжээг өргөтгөж, жилээс жилд нэмэгдэж буй төвийн бүсийн түгжрэлийг бууруулах зорилготой “Шинэ тойрог зам” төсөл хэрэгжиж эхэлсэн.
Тус төсөл нь нийт 50 гаруй километр үргэлжлэх бөгөөд хотын захын бүсүүдийг холбосон тээврийн шинэ коридор болж, ирэх 10-20 жилийн хөдөлгөөний эрчмийг даах чадвартай инженерийн иж бүрэн шийдэл байх юм.
Төслийн хүрээнд Нэгдүгээр болон Хоёрдугаар тойрог замыг цогцоор нь төлөвлөсөн.
Үүнээс “Шинэ их тойруу” хэмээн тодотгож буй “Хоёрдугаар тойрог” зам нь 21.6 км урттай байхаар зураг төсөл нь гарчээ. Хоёрдугаар тойрог зам төсөл нь хотын баруун болон зүүн захын бүсүүдийг Туулын хурдны зам, Нэгдүгээр тойрог зам зэрэг гол тээврийн коридоруудтай шууд холбосноор төвийн замын ачааллыг 50 хувь багасгана.
“Хоёрдугаар тойрог зам” төслийн урьдчилсан ТЭЗҮ болон зураг төслийг БНХАУ-ын Гуандун мужийн "Зам, тээврийн төлөвлөлт, зураг төслийн хүрээлэн групп" ХХК боловсруулсан. Инженерийн шийдлээс гадна байгаль орчин, эдийн засгийн үр ашгийг нэн тэргүүнд чухалчилж замын трассыг сонгосон байна. Тухайлбал, байгалийн нөөц газар, чийглэг бүс, усны эх үүсвэрийн хамгаалалтын бүс зэрэг “улаан шугам”-ыг тойрч, байгаль орчинд үзүүлэх сөрөг нөлөөллийг хамгийн бага түвшинд байлгахаар төлөвлөсөн байна. Мөн хог хаягдал бүхий цэг, ашиглагдаагүй хуучин коридоруудыг трасст оруулснаар газар чөлөөлөлтийн зардлыг бууруулж, төсвийн хэмнэлт гаргахын зэрэгцээ хотын өнгө үзэмжид сөргөөр нөлөөлдөг хэсгүүдийг дэд бүтцээр дамжуулан сэргээх боломжийг тусгажээ.
Тээврийн нарийвчилсан судалгаанд үндэслэн газарзүйн онцлогт тохирсон гүүр, нүхэн гарц, налуу муруйн шийдлүүдийг сонгосон нь өндөр далан болон гүн ухмал хэсгүүдийг багасгаж, барилгын ажлын хүндрэлийг шийдвэрлэсэн онцлогтой. Төслийн маршрутын баруун чиглэл нь 22-ын товчооноос эхлэн Тахилтын авто зам, Найрамдлын зам, Нарангийн гудамжны төгсгөл, Улаан чулуутын хогийн цэг орчмоор дайран өнгөрч Баянхошууны уулзварт хүрч Нэгдүгээр тойрог замтай нийлнэ. Харин зүүн чиглэлийн маршрут нь Баянзүрх дүүргийн 24 дүгээр хороо буюу Сэтгэцийн эрүүл мэндийн төв орчмоос Улиастай, Гачууртын чиглэлд үргэлжилж, эцэстээ Туулын хурдны замтай огтлолцохоор төлөвлөжээ.
“Шинэ их тойруу” төсөл нь Улаанбаатар хотыг олон төвт хот болон хөгжихөд чухал түлхэц болж, захын хорооллын иргэдийн амьдрах орчин, тээврийн хүртээмжийг сайжруулах гол хөшүүрэг болох юм. Урьдчилсан тооцооллоор төсөл хэрэгжсэнээр нийслэлийн авто замын хөдөлгөөний түгжрэлийг 23 орчим хувиар бууруулна.
Тод мэдээ
Дональд Трамп: АНУ-ын татвар төлөгчдөд цагаачид санхүүгийн дарамт учруулахгүй, өөрсдөө санхүүгийн чадавхтай, бие даасан байх шаардлагатай
АНУ-ын татвар төлөгчдөд цагаачид санхүүгийн дарамт учруулахгүй, өөрсдөө санхүүгийн чадавхтай, бие даасан байх шаардлагатай гэж АНУ-ын Ерөнхийлөгч Дональд Трамп онцолсон. Төрийн департамент нь өндөр эрсдэлтэй гэж үнэлэгдсэн улс орнуудаас шинээр ирэх цагаачдыг улсын халамжид хамрагдахаас сэргийлэх үүднээс холбогдох дүрэм, журмыг хянан шинэчилж байна.
2026 оны 1-р сарын 21-ний өдрөөс эхлэн Төрийн департамент дараах улс орны иргэдийн цагаачлалын виз олголтыг тодорхойгүй хугацаагаар зогсоолоо. Үүнд:
Афганистан, Албани, Алжир, Антигуа ба Барбуда, Армени, Азербайжан, Бахамын Арлуудын Хамтын Нөхөрлөл, Бангладеш, Барбадос, Беларусь, Белиз, Бутан, Босни ба Херцеговина, Бразил, Бирм (Мьянмар), Камбож, Камерун, Кабо-Верде, Колумб, Кот-д’Ивуар, Куба, Бүгд Найрамдах Ардчилсан Конго Улс, Доминика, Египет, Эритрей, Этиоп, Фижи, Гамби, Гүрж, Гана, Гренада, Гватемал, Гвиней, Гаити, Иран, Ирак, Ямайка, Йордан, Казахстан, Косово, Кувейт, Киргизстан, Лаос, Ливан, Либери, Ливи, Молдов, Монгол, Монтенегро, Марокко, Непал, Никарагуа, Нигери, Хойд Македон, Пакистан, Бүгд Найрамдах Конго Улс, ОХУ, Руанда, Сент-Китс ба Невис, Сент-Люсиа, Сент-Винсент ба Гренадин, Сенегал, Сьерра-Леоне, Сомали, Өмнөд Судан, Судан, Сири, Танзани, Тайланд, Того, Тунис, Уганда, Уругвай, Узбекистан, Йемен улсууд багтсан.
