Үйл явдал
Цаг агаарын байдлаас хамааран ургамлын хөнөөлт шавж, өвчний гаралт ихсэх төлөвтэй байна
Газар тариалангийн үйлдвэрлэл эрхлэгчид ургамал хамгааллын арга хэмжээг авч хэрэгжүүлэхдээ дараах асуудалд анхаарч ажиллахыг зөвлөж байна.
Цаг агаарын байдлаас хамааран ургамлын хөнөөлт шавж, өвчний гаралт ихсэх төлөвтэй байна.
Иймд ургамал хамгааллын арга хэмжээг авч хэрэгжүүлэхийн өмнө хэрэглэх бодисуудын нийлэмжтэй байдалд үндэслэн нэг удаагийн арга хэмжээгээр таримлын хөнөөлт организмтэй тэмцэх нь эдийн засгийн ихээхэн ач холбогдолтой юм.
Үүнд: Хог ургамлын эсрэг төрөл зүйлээс нь хамааарч 2,4-Д / нийлмэл 2-этилгексилийнэфир/, флорасулам, трибенурон-метил, метсульфурон-метил, феноксапроп-П-этил агуулсан бодис,
Өвчний эсрэг тебуконазол, пропиконазол, ципроконазол агуулсан,
Хөнөөлт шавжийн эсрэг имидаклоприд, альфациперметрин агуулсан бодисуудаас сонгон хэрэглэх боломжтой.
Ургамал хамгааллын бодис (УХБ) хэрэглэх үед дараах аюулгүй ажиллагааны зааврыг мөрдөж ажиллана уу гэж Хүнс, хөдөө аж ахуй, хөнгөн үйлдвэрийн яамнаас мэдээллээ.
- Пестицидтэй ажиллахын өмнө ерөнхий дүрэм, журам, зөвлөмжтэй танилцаж, тэдгээрийг чанд мөрдөж, хэрэгжилтэд хяналт тавих.
- Ургамал хамгааллын бодистой ажиллахдаа хөдөлмөрийн эрүүл ахуйн стандартыг дагаж мөрдөх;
- Ажил эхлэхийн өмнө ойр орчимд хүүхэд, амьтан байгаа эсэхийг шалгах;
- Усны эх үүсвэрийг бохирдуулах эрсдэлээс зайлсхийх;
- Бүтээгдэхүүний хаяг шошгон дээрх мэдээллийг, ялангуяа хэрэглэх тун ба аюулгүй байдлын шаардлагыг дагаж мөрдөх.
- Шаардлагатай тунг тусгай тохируулгын хэмжих хэрэгслийг ашиглах.
- Гал тогооны хэрэгсэл, хоолны савыг хэрэглэхгүй байх;
- Ажил дууссаны дараа тоног төхөөрөмж, хоосон савыг сайтар цэвэрлэж, угаах;
- Шүрших уусмал бэлтгэх, ашиглах үед хэрэглэсэн багаж хэрэгслийг хүүхэд, амьтан хүрэхгүй газар байлгах;
- Хуурайшилттай газар тамхи татах, шүдэнз зурах гал гаргахаас болгоомжлох
- Ургамал хамгааллын бодисын савыг бусдад худалдахгүй, тараахгүй байх
- Ургамал хамгааллын бодисын сав, баглаа боодлыг зохих журмын дагуу устгах арга хэмжээг авах;
Үйл явдал
Наймдугаар сарын 15-наас автомашиныг улсын дугаарын тэгш, сондгойгоор хөдөлгөөнд оролцуулна
Хичээлийн шинэ жилийн бэлтгэл болон НҮБ-ын Цөлжилттэй тэмцэх тухай конвенцын талуудын XVII бага хурал (COP17)-ын үеэр нийслэлийн замын хөдөлгөөний ачааллыг бууруулах зорилгоор автомашиныг улсын дугаарын тэгш, сондгойгоор хөдөлгөөнд оролцуулах зохицуулалт хэрэгжүүлэхээр болжээ.
Тодруулбал, 2026 оны наймдугаар сарын 15-наас есдүгээр сарын 12-ны өдрийг дуустал өдөр бүр 07:00-21:00 цагийн хооронд Улаанбаатар хотын хэмжээнд бүсчлэлгүйгээр улсын дугаарын тэгш, сондгойгоор замын хөдөлгөөнд оролцуулна.
Үүнд:
- Наймдугаар сарын 16, 18, 20, 22, 24, 26, 28, 30, есдүгээр сарын 2, 4, 6, 8, 10, 12-ны өдрүүдэд улсын дугаарын сүүлийн орон тэгш тоо (0, 2, 4, 6, 8)-оор төгссөн тээврийн хэрэгсэл хөдөлгөөнд оролцоно.
- Наймдугаар сарын 15, 17, 19, 21, 23, 25, 27, 29, 31, есдүгээр сарын 3, 5, 7, 9, 11-ний өдрүүдэд улсын дугаарын сүүлийн орон сондгой тоо (1, 3, 5, 7, 9)-оор төгссөн тээврийн хэрэгсэл хөдөлгөөнд оролцох юм.
Харин есдүгээр сарын 1-ний өдөр хичээлийн шинэ жилийн нээлттэй холбоотойгоор бүх тээврийн хэрэгслийг замын хөдөлгөөнд оролцуулахаар зохицуулжээ.
Үйл явдал
Багануур дүүрэгт гал түймрийг алсаас илрүүлэх өндрийн камер ашиглалтад орлоо
Гамшгийн эрсдэлийг бууруулах нийслэлийн зөвлөлийн 2026 оны үйл ажиллагааны төлөвлөгөөний хүрээнд нийслэлийн хэмжээнд 13 байршилд тусгай зориулалтын өндрийн камер суурилуулахаар төлөвлөсний дагуу Багануур дүүрэгт анхны камерыг суурилуулж, ашиглалтад орууллаа.
Тус камер нь хиймэл оюун ухаанд суурилсан дэвшилтэт технологиор галын дөл, утааг алсын зайнаас бодит цагийн горимоор илрүүлэх боломжтой. Ингэснээр ой, хээрийн болон объектын гал түймрийн талаарх мэдээллийг холбогдох байгууллагад шуурхай дамжуулж, гал түймрийг эрт илрүүлэх, хохирлыг бууруулах нөхцөл бүрдэх юм.
Нийслэлийн Онцгой байдлын газрын мэдээлснээр цаашид төлөвлөгөөний дагуу бусад байршилд өндрийн камерыг үе шаттайгаар суурилуулна.
Үйл явдал
Шатахууныг улсын дугаарын тэгш, сондгойгоор олгож байна
Өчигдөр шөнийн 00:00 цагаас эхлэн шатахууныг автомашины улсын дугаарын тэгш, сондгойгоор олгож, нэг удаагийн цэнэглэлтийг 50 мянган төгрөгөөр хязгаарлах зохицуулалт хэрэгжиж байна. Тус зохицуулалт наймдугаар сарын 15-ны өдрийг хүртэл үргэлжлэх бөгөөд шатахууны нөөцийг жигд хуваарилах зорилготой.
Өнөөдөр таны автомашины улсын дугаар тэгш тоогоор төгссөн бол шатахуун авах боломжтой юм.
Сануулахад:
- 0, 2, 4, 6, 8 буюу Улсын дугаар нь тэгш тоогоор төгссөн автомашин эзэмшигчид 8 дугаар сарын 4, 6, 8, 10, 12, 14-ний өдрүүдэд,
- 1, 3, 5, 7, 9 буюу Улсын дугаар нь сондгой тоогоор төгссөн автомашин эзэмшигчид 8 дугаар сарын 5, 7, 9, 11, 13, 15-ны өдрүүдэд шатахуун авна.
Иргэд, жолооч та бүхэн хуваарийн дагуу шатахуун түгээх станцуудаар үйлчлүүлнэ үү.
