Тод мэдээ
Сүхбаатарчууд Ерөнхий сайдаа багаар нь дэмжихээ илэрхийллээ
УИХ-ын ээлжит сонгуулийн VI тойрог, Зүүн бүсийн Дорнод, Сүхбаатар, Хэнтий аймагт Ерөнхий сайд Л.Оюун-Эрдэнээр ахлуулан Монгол Ардын Намаас нэр дэвшигчид өнөөдөр /2024-06-12/ Сүхбаатар аймгийн Баруун-Урт хотод сурталчилгаагаа эхлүүллээ.
МАН-ыг үндэслэгч, Их жанжнаараа овоглосон сүхбаатарчууд нэр дэвшигчдийг төв талбайдаа халуун дотноор угтан авч, Д.Сүхбаатарын хөшөөнд Ерөнхий сайд Л.Оюун-Эрдэнэ цэцэг өргөж, хүндэтгэл үзүүлсэн юм. Нэр дэвшигчдийн уулзалт эхлэх болоход хэсэг хугацаанд тодорхойгүй шалтгаанаар цахилгаан тасарч, төв талбайд цугларсан иргэд, сонгогчдыг багагүй чилээсэн юм. Үүнийг тус аймагт сүүлийн арав гаруй жилд Ардчилсан нам засаглаж байгаатай холбон тайлбарлах хүмүүс ч цөөнгүй байв.
Сүхбаатарчууд бол төрийн их тахилгат “Алтан овоо”, эрийн хийморийг сэргээсэн “Шилийн богд” шигээ уужим сэтгэлтэй ард түмэн гэдгийг Ерөнхий сайд онцлоод “Намайг Сүхбаатар аймагт ирэх бүрд ийм явдал болдог. Гэхдээ надад нэг зан байдаг. Энэ бол Сэцэн ханчуудын зан. Ингэх тусам улам хурцлагддаг. Тийм учраас би энэ тойрогт нэр дэвшиж байгаа юм. Сүхбаатар аймагт заавал Ардын Намаас нэр дэвшиж байгаа долоон хүн багаараа ялах ёстой” гэсэн юм.
Мөн тэрбээр зөвхөн орон нутагт ч бус улс орны хэмжээнд ардчилал танигдахааргүй болсон, С.Зоригийн мөрөөдсөн ардчилал гажуудсан. Ардчилал бол улсынхаа төв талбай, Зоригийн хөшөө, ногоон байгууламжийг булаах, хүн эрүүдэн шүүх эрх ямба, хэн нэгний хувийн өмч огт биш гээд Сүхбаатар аймагт ч шударга ёс алдагдсан гэж үзэхээр байгааг Ерөнхий сайд хатуухан шүүмжлэв. Ялангуяа системийн авлига бол хорт хавдар болчихсон учраас зайлшгүй реформ хийх цаг нь болсон. Энэ удаагийн сонгуульд МАН-ын дарга жагсаалтын эхэнд бичигдэлгүй, тойрогт нэр дэвшиж байгаа нь ч реформ. Энэ удаагийн сонгуульд авлигачид ялах уу, ард түмэн ялах уу, Монгол Улс урагшлах уу, ухрах уу гэдгийг шийдэх түүхэн онцлогтой гэдгийг тэрбээр зарим жишээгээр тайлбарлав.
Мөн энэ удаагийн сонгуульд хамт нэр дэвшихээр Сэцэн хандаа ирсэн Ухнаагийн Отгонбаяр, Пүрэв-Очирын Анужин, Мөнгөнцогийн Ганхүлэг, Лхагвасүрэнгийн Соронзонболд, Мягмарсүрэнгийн Бадамсүрэн, Цагаанхүүгийн Идэрбат нарыг өөрийнхөө багт тохиолдоор нэгтгээгүй, харин зүүн бүс нутгийн хөгжилд ирэх дөрвөн жилд тус тусдаа үүрэг, оролцоотой ажиллахаар ирснийг сүхбаатарчуудад дэлгэрэнгүй танилцуулав.
Монголын Ардын Намын 2024-2028 оны мөрийн хөтөлбөрийн гол цөм нь Бүсчилсэн хөгжлийн бодлого. Энэ дагуу зүүн бүсэд түүхэн аялал жуулчлалыг хөгжүүлэх хүрээнд Дорнод, Сүхбаатар, Хэнтий аймгийн түүхэн дурсгалт газруудыг холбосон тусгай бүсийг төр, хувийн хэвшлийн түншлэлийн хүрээнд байгуулах, Хэнтий, Сүхбаатар аймагт эцсийн бүтээгдэхүүн үйлдвэрлэх хүнд үйлдвэрлэл технологийн парк байгуулах хувийн хэвшлийг дэмжих, Сүхбаатар аймагт дулааны станцын хүчин чадлыг өргөтгөн дулаан хангамжийн системийг байгуулах, Эрээнцав, Бичигт, Сүмбэр боомтын зэрэглэлийг ахиулж, нэвтрүүлэх хүчин чадлыг нэмэгдүүлэх, бүсийн эмнэлэг байгуулах, Боловсролын салбарт улсын хэмжээнд шинээр ерөнхий боловсролын сургуулийн барилгын төсөл хэрэгжүүлэх зэрэг нийгэм, эдийн засаг, эрүүл мэндийн олон талт бодлого, зорилтыг мөрийн хөтөлбөрт тусгаж ирэх дөрвөн жилд хэрэгжүүлэх гэж байгааг, мөн өнгөрсөн хугацаанд Засгийн газар, УИХ-аас төсөв, хөрөнгийг нь шийдвэрлэсэн томоохон бүтээн байгуулалт, хөрөнгө оруулалтыг Ерөнхий сайд дурдлаа.
Шинэ 30 жилийг шинэ тогтолцоогоор эхлүүлэхээр Сэцэн хан нутгаа, сүхбаатарчуудаа зорьж ирсэн учраас Ерөнхий сайдаа бүтэн багаар нь дэмжиж, түүхэн сонголт хийхээ сүхбаатарчууд илэрхийлж байв.
Ардын намын ялалт АРД ТҮМНИЙ ЯЛАЛТ болж, наран ургах зүгийн Сэцэн ханчууд онцгой үүрэг гүйцэтгэнэ гэдэгт итгэлтэй байгаагаа Ерөнхий сайд, МАН-ын дарга Л.Оюун-Эрдэнэ уулзалтын төгсгөлд хэллээ.
Тод мэдээ
Авто замыг хааж, шинэчилнэ
Энхтайваны өргөн чөлөөний авто замыг шинэчлэх ажлын хүрээнд БГД-ийн 6, 8, 19 дүгээр хороо, 10 дугаар хорооллын "МТ" ШТС-ын уулзвараас "Төмөр замын дээд сургууль"-ийн уулзвар хүртэлх авто замыг тавдугаар сарын 17-ны өдрийн 23:00 цагаас тавдугаар сарын 19-ний өдрийн 06:00 цаг хүртэл хааж, шинэчилнэ.
Иймд иргэд, жолооч та бүхэн бусад замыг сонгон хөдөлгөөнд оролцоно уу.
Тод мэдээ
Ерөнхийлөгчийн ивээл дор 37 дахь удаагийн “Номын баяр” болно
Энэ сарын 16-18-ны өдрүүдэд жанжин Д.Сүхбаатарын талбайд “Илүү их уншья” уриатай “Номын баяр”-ыг 37 дахь удаагаа Ерөнхийлөгчийн ивээл дор зохион байгуулах гэж байна.
Монгол Улсын Ерөнхийлөгчийн 158 дугаар зарлиг, Нийтээр тэмдэглэх баярын болон тэмдэглэлт өдрүүдийн тухай хуулийн дагуу Үндэсний бичиг соёл, номын өдрүүдийг 5 болон 9 дүгээр сарын гурав дахь долоо хоногийн бямба, ням гарагт тэмдэглэдэг юм.
Номын баяр нь ард иргэд, хүүхэд, залууст ном унших соёл, дадал хэвшүүлэх, номтой нөхөрлөх эерэг хандлага бий болгох, зохиолч, туурвигч, идэвхтэн бичигчид, ном, хэвлэлийн салбар, нийтийн уншлагыг дэмжин сурталчлах зорилготой.
Баярын үеэр номын үзэсгэлэн, монголын болон дэлхийн шилдэг ном, бүтээлийн худалдаа, шинэ номын нээлт, зохиолч-уншигчдын уулзалт, дотоод, гадаадын хэвлэлийн газруудын болон номын маркетинг-борлуулалтын уулзалт, “Байгаль экологийн 50 ном”-ын танилцуулга, хүүхдэд зориулсан номын хөтөлбөр зэрэг үйл ажиллагаа болно.
Дэлхий нийтэд, тэр дундаа манай улсад сөргөөр нөлөөлж байгаа уур амьсгалын өөрчлөлт, цөлжилт, байгаль орчны доройтлын улмаас устах аюулд орсон амьтдын нэг нь Алтайн өвөр говьд амьдардаг мазаалай баавгай юм.
50 гаруйхан тоо толгой үлдээд байгаа мазаалайг хамгаалах, өсгөн үржүүлэх ажлыг эрчимжүүлэх, олон нийтийн анхаарлыг хандуулах зорилгоор энэ удаагийн баярт Ерөнхийлөгчийн Тамгын газар “Үндэсний бахархалт амьтан мазаалай” сэдвээр оролцоно.
Мөн Ерөнхийлөгчийн санаачилсан “Тэрбум мод”, “Хүнсний хангамж, аюулгүй байдал”, “Эрүүл монгол хүн”, “Цагаан алт” үндэсний хөдөлгөөн, хөтөлбөр болон байгаль орчны чиглэлээр хэрэгжиж буй төслийн үр дүнгийн талаар нийтэд мэдээлэл, зөвлөгөө, өгөхөөр төлөвлөж байна.
Баярын үеэр НЗДТГ “Номын грант” шагналаа нийслэлийн хүүхэд, залуусын дунд номын соёлыг түгээн дэлгэрүүлэх үйлсэд оруулсан хувь нэмэр, ном, бүтээлүүдийг олны хүртээл болгож сурталчлан таниулсан, хотын хөгжлийн төлөө туурвисан бүтээл зэргийг шалгуур болгож 3 сая төгрөгийн тэтгэлэг олгоно.
“Номын сайн нөхөр” уралдааны хүрээнд “Шилдэг ном”, “Шилдэг хэвлэлийн газар”, “Шилдэг уншигч-насанд хүрэгч”, “Шилдэг номын сан”, “Шилдэг уншигч хүүхэд” (Ахлах, дунд, бага анги), “Шилдэг уншигч анги”-ийг тодруулна.
Хүүхдүүдийн дунд номын тэмдэглэл хөтлөх, зурагт хуудас, подкаст бэлтгэх болон уншлагын аян зарлаж, шалгарсан хүүхдүүдийг ч урамшуулах болжээ. Мөн “Д.Нацагдорж” тэмдэгтэн хүүхдүүдийг шалгаруулна.
Номын баяр жилээс жилд өргөжин тэлж,дунджаар 300,000 гаруй уншигч ирж, 200 гаруй хэвлэн нийтлэгч, 300-аад зохиолч, орчуулагч, редактор, зураач, эх зохиогч, эрдэмтэн судлаач тогтмол оролцдог.
Энэ удаагийн баярт ОХУ, БНХАУ, БНСУ-аас зохиолч, хэвлэн нийтлэгчид оролцох юм.
“Номын баяр”-ыг “Номын соёлт ертөнц” ТББ санаачлан, Ерөнхийлөгчийн Тамгын газар, Байгаль орчин, уур амьсгалын өөрчлөлтийн яам, Соёл, спорт, аялал жуулчлал, залуучуудын яам, Нийслэлийн Засаг даргын Тамгын газар, Нийслэлийн Соёл, урлагийн газар хамтран зохион байгуулна.
Тод мэдээ
Монгол Улс руу чиглэсэн кибер халдлагын 70 хувь нь Засгийн газрыг “онилдог”
Онц чухал мэдээллийн дэд бүтэцтэй байгууллагуудын удирдлага, мэргэжилтнүүдийн дунд кибер аюулгүй байдлын сургалтыг Цахим хөгжил, инновац, харилцаа холбооны яамнаас өнөөдөр /2025.05.15/ зохион байгууллаа.
Монгол Улс руу чиглэсэн кибер халдлагын 70 хувь нь Засгийн газар, түүний харьяа агентлаг руу, 11 хувь нь УИХ-ын харьяа байгууллагууд руу, 14 хувь нь эрүүл мэндийн салбарын байгууллагууд руу, 1 хувь нь хууль сахиулах байгууллага руу хандсан байдаг.
2024 оны байдлаар ОХУ-аас хамгийн олон буюу 128 сая гаруй, АНУ-аас 65 сая гаруй, БНХАУ-аас 50 сая гаруй сэжигтэй хандалт манай улс руу хийгдсэн байна. Энэ нь төрийн мэдээлэл болон хүний хувийн эмзэг мэдээллийг олзлох, хулгайлах зорилтот халдлага байх магадлал өндөр гэдгийг илтгэсэн тоо баримт юм.
Кибер орчны аюулгүй байдал нь үндэсний аюулгүй байдлын салшгүй нэг хэсэг бөгөөд улс орны нийгэм, эдийн засаг, аюулгүй байдал, төрийн үйл ажиллагааны тасралтгүй байдлыг хангаж байдаг онц чухал мэдээллийн дэд бүтцүүд кибер халдлагад өртөх бодит эрсдэл нэмэгдэж байна.
Энэ бол ганц Монгол Улсад төдийгүй олон улсад тулгарч буй сорилт. Иймд Монгол Улс кибер орчны аюулгүй байдлыг хангаж, хамгаалах бодлого зохицуулалтаа шат дараатайгаар боловсруулж, цахим засаглалын багц хуулиа батлуулан хэрэгжүүлж байна. Уг хуулиудын хэрэгжилтийг хангахад холбогдох байгууллагуудын чадавх, ур чадварыг нэмэгдүүлэх, хамтран ажиллах итгэлцлийг бий болгох зорилгоор дээрх сургалтын ач холбогдол оршиж байна.
Ташрамд дурдахад, Монгол Улсын хэмжээнд онц чухал мэдээллийн дэд бүтэцтэй 216 байгууллага бий. Хоёр, гуравдугаар шатлалын эрүүл мэндийн байгууллага, банк, санхүүгийн байгууллага, харилцаа холбоо, мэдээллийн технологийн үйлчилгээ эрхлэгчид, хилийн боомтын хяналт, удирдлагын систем болон улсын хилээр нэвтэрч байгаа зорчигч, тээврийн хэрэгслийн бүртгэл, мэдээлэл хариуцсан байгууллага, стратегийн ач холбогдол бүхий ашигт малтмалын ордыг ашиглах үйл ажиллагаа эрхлэгч зэргийг онц чухал мэдээллийн дэд бүтэцтэй байгууллагад тооцдог гэж Цахим хөгжил, инновац, харилцаа холбооны яамнаас мэдээллээ.
