Тод мэдээ
ЭЗБХ: Зарчмын зөрүүтэй 100 орчим саналаар санал хураав
Монгол Улсын Их Хурлын Эдийн засгийн байнгын хороо 2023 оны дөрөвдүгээр сарын 25-ны өдрийн хуралдаанаараа Төмөр замын тээврийн тухай болон Аялал жуулчлалын тухай хуулийн шинэчилсэн найруулгын төслүүд, тэдгээртэй хамт өргөн мэдүүлсэн хуулийн төслүүдийн анхны хэлэлцүүлгийг хийлээ.
Төмөр замын тээврийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцүүлэгт бэлтгэх Ажлын хэсгийн танилцуулгыг Улсын Их Хурлын гишүүн Ж.Бат-Эрдэнэ танилцууллаа. Тус Ажлын хэсэг хуулийн төслүүдийг хэлэлцүүлэгт бэлтгэж, зарчмын зөрүүтэй саналын томъёоллыг энэ оны гуравдугаар сарын 28 болон дөрөвдүгээр сарын 4-ний өдрүүдэд Байнгын хорооны хуралдаанд танилцуулж хэлэлцүүлсэн байна. Улсын Их Хурлын чуулганы дөрөвдүгээр сарын 6-ны өдрийн хуралдаанаар төслүүдийг хэлэлцэх үед Байнгын хорооны даргын гаргасан горимын саналаар анхны хэлэлцүүлэгт буцаахаар шийдвэрлэсэн юм.
Улсын Их Хурлын гишүүн, Ажлын хэсгийн ахлагч Ж.Бат-Эрдэнэ, тус Ажлын хэсэг болон ажлын дэд хэсгүүд удаа дараа хуралдаж, хэд хэдэн зарчмын зөрүүтэй санал бэлтгэснийг танилцуулав. Ажлын хэсэг, нийтийн зориулалттай төмөр зам, тусгай зориулалтын төмөр зам гэсэн нэр томьёог нийтийн төмөр зам, үйлдвэрлэлийн зориулалттай төмөр зам гэж тус тус өөрчлөх, Хилийн тухай хуулиар тодорхойлсон хилийн бүсэд төмөр замын суурь бүтэц барихтай холбоотойгоор төсөлд тусгасан зохицуулалтыг хилийн зурвас газарт гэж өөрчлөх, мөн төмөр замын суурь бүтцийг төр хувийн хэвшлийн түншлэлээр барих тохиолдолд уг суурь бүтцийг төрийн өмчлөлд шилжүүлэх хугацаа, нөхцөлийг гэрээнд зайлшгүй тусгах бөгөөд энэ хугацаанд суурь бүтцийн үйлчилгээ үзүүлэгч нь тээвэрлэлтийн үйл ажиллагааг давхар эрхлэж болох зохицуулалт төсөл тусгах зарчмын зөрүүтэй санал бэлтгэсэн байна.
Байнгын хорооны хуралдаанаар Ажлын хэсгийн бэлтгэсэн зарчмын зөрүүтэй саналуудаар санал хураахад хуралдаанд оролцсон Улсын Их Хурлын гишүүдийн олонх дэмжсэн тул хуулийн төслүүдийн анхны хэлэлцүүлгийг хийсэн талаарх Эдийн засгийн байнгын хорооны санал, дүгнэлтийг Улсын Их Хурлын чуулганы нэгдсэн хуралдаанд танилцуулж, хэлэлцүүлэхээр боллоо.
Дараа нь Байнгын хорооны хуралдаанаар Аялал жуулчлалын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийв. Төслүүдийг хэлэлцүүлэгт бэлтгэх Ажлын хэсгийн танилцуулгыг Улсын Их Хурлын гишүүн Х.Ганхуяг танилцууллаа. Тэрбээр танилцуулгадаа, Аялал жуулчлалын тухай хуулийн шинэчилсэн найруулгын төсөл болон нэмэлт, өөрчлөлт оруулах 12 хуулийн төслийг Засгийн газраас өргөн мэдүүлснийг хэлэлцэх, эсэх асуудлыг Улсын Их Хурлын чуулганы нэгдсэн хуралдаанаар 2022 оны 12 дугаар сарын 8-нд хэлэлцэн дэмжсэн. Төслийг хэлэлцүүлэгт бэлтгэх Ажлын хэсэг Эдийн засгийн байнгын хорооны хуралдаанд энэ сарын 11-нд дэлгэрэнгүй танилцуулга хийсэн хэмээн дурдлаа. Тус хэлэлцүүлгийн үеэр Аялал жуулчлалын тухай хуулийн шинэчилсэн найруулгын төсөлтэй хамт мэдүүлсэн Нэмэгдсэн өртгийн албан татварын тухай хуульд нэмэлт өөрчлөлт оруулах тухай хуулийн төсөлд Засгийн газраас санал авах шаардлагатай гэж үзэж, хэлэлцүүлгийг хойшлуулсан байна.
Хуулийн төслүүдийг хэлэлцүүлэгт бэлтгэсэн талаарх танилцуулгатай холбогдуулан Улсын Их Хурлын гишүүн Н.Ганибал, Т.Энхтүвшин нар асуулт асууж, Ажлын хэсгийн ахлагч, Улсын Их Хурлын гишүүн Х.Ганхуягаас хариулт авлаа. Улсын Их Хурлын гишүүд аялал жуулчлалын сан, отог, отоглох цэгийн талаарх зохицуулалтууд, аялал жуулчлалын компанид газар олгох, хил орчимд аялал жуулчлал хөгжүүлэхтэй холбоотой бодитой зохицуулалт орсон эсэх, хөтөч, аялал жуулчлалын сургууль болон агаарын тээврийн хүчин чадлын талаар асуулт асууж, байр сууриа илэрхийлсэн юм.
Ажлын хэсэг Аялал жуулчлалын тухай хуулийн шинэчилсэн найруулгын төслийн талаарх зарчмын зөрүүтэй 67, найруулгын гурав, хамт өргөн мэдүүлсэн хуулийн төслүүдийн талаарх зарчмын зөрүүтэй 23, нийт 93 зарчмын зөрөөтэй саналын томьёолол бэлтгэжээ.
Байнгын хорооны дарга Ц.Цэрэнпунцаг хуралдааныг удирдан зарчмын зөрүүтэй санал нэг бүрээр санал хураалт явуулав. Байнгын хорооны хуралдаанд оролцсон Улсын Их Хурлын гишүүдийн олонх зарчмын зөрүүтэй саналуудын ихэнхийг дэмжлээ. Аялал жуулчлалын тухай хуулийн шинэчилсэн найруулгын төслийн хамт өргөн мэдүүлсэн Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хуулийн төсөлд, орон нутгийн агаарын тээврийн, олон улс, орон нутгийн нисэх буудлын болон иргэний агаарын хөлгийн түрээсийн үйлчилгээг нэмэгдсэн өртгийн албан татвараас чөлөөлөхөөр тусгасныг Байнгын хорооны хуралдаанд оролцсон гишүүдийн олонх дэмжсэнгүй. Энэ талаар Улсын Их Хурлын гишүүн Н.Ганибал, Ажлын хэсгийн гишүүн Ш.Адьшаа, Сангийн сайд Б.Жавхлан нар эсрэг саналтай байсан бол Улсын Их Хурлын гишүүн Т.Энхтүвшин, Ажлын хэсгийн ахлагч Х.Ганхуяг, Зам, тээврийн хөгжлийн сайд С.Бямбацогт нар дэмжсэн байр суурь илэрхийлсэн юм.
Санал хураалт дууссаны дараа хуулийн төслүүдийг хэлэлцсэн талаарх Эдийн засгийн байнгын хорооны санал, дүгнэлтийг Улсын Их Хурлын чуулганы нэгдсэн хуралдаанд оруулахаар шийдвэрлэлээ гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв.
Тод мэдээ
Ерөнхийлөгч У.Хүрэлсүх хоккейн үндэсний шигшээ багийн тамирчдыг хүлээн авч уулзлаа
Монгол Улсын Ерөнхийлөгч Ухнаагийн Хүрэлсүх хоккейн үндэсний шигшээ багийн дасгалжуулагч, тамирчдыг хүлээн авч уулзаж, баяр хүргэлээ.
Хоккейн үндэсний шигшээ баг 2024 оны 04 дүгээр сарын 15-20-ны өдрүүдэд Кувейт Улсад болсон Хоккейн дэлхийн аварга шалгаруулах IV дивизионы тэмцээнээс алтан медаль хүртсэн.
Мөн залуучуудын шигшээ баг 2024 оны 04 дүгээр сарын 21-30-ны өдрүүдэд Узбекистан Улсад болсон Азийн аварга шалгаруулах тэмцээнээс хүрэл медаль хүртсэн юм.
Монгол Улсын Ерөнхийлөгч Монголын хоккейн холбооны удирдлага болон Үндэсний шигшээ багийн багш, дасгалжуулагч нарт баяр хүргэж, тив, дэлхийн тавцанд Төрийн далбаагаа мандуулсанд ард түмний нэрийн өмнөөс талархал илэрхийлэв.
Цаашид бэлтгэл сургуулилтаа чанартай хийж, зохион байгуулалтаа сайжруулан амжилтаа ахиулна гэдэгт итгэлтэй байгаагаа хэллээ.
Монголын хоккейн холбооны ерөнхийлөгч, Сангийн сайд Б.Жавхлан хоккейн холбоо нь 60 гаруй жилийн түүхтэй гэдгийг дурдаж, Монгол Улсад анх удаа олон улсын стандартад нийцсэн битүү дээвэртэй Спортын ордон баригдсан үеэс хоккейн спортын хөгжлийн шинэ 60 жилийн түүх бичигдэж эхэлсэн гэдгийг онцоллоо.
Дэлхийн аварга шалгаруулах IV дивизионы тэмцээнээс анх удаа алтан медаль хүртэж, III дивизионд тоглох эрхээ авсан нь Үндэсний шигшээ багийн тамирчид, дасгалжуулагч нарт урам, итгэл өгсөн гэдгийг тодотгов.
Хоккейн үндэсний шигшээ баг нь 17-41 насны тамирчдаас бүрддэг бөгөөд Залуучуудын шигшээ баг 2024 оны 09 дүгээр сард БНХАУ-д болох Азийн аварга шалгаруулах цомын тэмцээнд оролцох бэлтгэлээ хангаж байна.
Хоккейн тамирчид Бөмбөгтэй хоккейн дэлхийн аварга шалгаруулах тэмцээнээс 2017 онд мөнгөн медаль, Дэлхийн аварга шалгаруулах тэмцээнээс 2023 онд мөнгөн медаль, Азийн аварга шалгаруулах тэмцээнээс 2018, 2018 онд алтан медаль, 2023 онд хүрэл медаль хүртэж байсан юм.
Тод мэдээ
Хануйн голын 109.15 у/метр гүүрийг ашиглалтад оруулахад бэлэн боллоо
2024 онд авто замын салбарт улсын төсөв, гадаадын зээл, төр хувийн хэвшлийн түншлэлийн хөрөнгө оруулалтаар нийт 1100 км авто зам, 243 у/метр гүүрийг байнгын ашиглалтад оруулахаар төлөвлөсөн.
Энэ хүрээнд улсын төсвийн хөрөнгө оруулалтаар хэрэгжиж буй Архангай аймгийн Хайрхан сумын Хануйн голын 109.15 у/м төмөрбетон гүүрийн барилга угсралтын ажил 96 хувиийн гүйцэтгэлтэй байна.
Тухайн гүүрийн барилга угсралтын ажлыг гэрээт хугацаанаасаа өмнө хүлээлгэн өгөхөөр төлөвлөлөө.
Гүүрийн захиалагчаар Зам, тээврийн хөгжлийн яам, өдөр тутмын техник технологийн хяналтыг “Зам, тээврийн хөгжлийн төв” ТӨҮГ, гүйцэтгэгчээр “Эвт-Уул” ХХК ажиллаж байна хэмээн Зам тээврийн хөгжлийн төв ТӨҮГ-аас мэдээллээ.
Тод мэдээ
Гурван ээлжээр хичээллэх эрсдэл үүссэн сургуулиудын барилгыг өргөтгөх хөрөнгө оруулалт хийнэ
Засгийн газрын ээлжит хуралдаан 2024 оны тавдугаар сарын 15-нд боллоо. Монгол Улсын 2024 оны төсөвт батлагдсан улсын төсвийн хөрөнгө оруулалтаар хэрэгжиж байгаа гурван ээлжтэй сургууль, ачаалал өндөртэй байршилд байгаа сургууль болон цэцэрлэг, дотуур байрны зарим төсөл, арга хэмжээний гүйцэтгэлд анхаарч төсвийн ерөнхийлөн захирагчийн хуулиар батлагдсан дүнд багтаан зохицуулалт хийхийг Боловсрол, шинжлэх ухааны сайд Л.Энх-Амгалан, Сангийн сайд Б.Жавхлан нарт даалгалаа.
Хот байгуулалтын норм, стандартын дагуу цэцэрлэг, ерөнхий боловсролын сургуулийн зориулалтаар газар чөлөөлөх, норм дүрмийн дагуу олгоогүй тохиолдолд буцаан хурааж авах, шинээр ашиглалтад орж буй хотхон, хорооллуудыг ашиглалтад ороход цэцэрлэг, ерөнхий боловсролын сургуулийн асуудлыг шийдвэрлээгүй тохиолдолд ашиглалтад орох хугацааг хойшлуулах, үүнд хяналт тавих зорилгоор улсын комиссын бүрэлдэхүүнд орон нутгийн Боловсрол, шинжлэх ухааны газраас төлөөлөл багтаах, шинээр баригдаж буй хотхон, хорооллуудад газар чөлөөлж, сургууль, цэцэрлэгийн зориулалтаар нийслэл, тухайн орон нутгийн боловсрол, шинжлэх ухааны газарт эзэмших эрхийг шилжүүлэх ажлыг зохион байгуулахыг аймаг, нийслэлийн Засаг дарга нарт үүрэг болголоо.
Сургуулийн хүртээмж, ачааллаас шалтгаалан бий болсон гурван ээлжээр хичээллэж байгаа сургуулийн тоог бууруулахаар 11 байршилд 5980 хүүхдийн хүчин чадалтай сургуулийн төсөл, арга хэмжээг шинээр, 40,350 хүүхдийн хүчин чадалтай 86 төсөл, арга хэмжээ 2024 онд он дамжин шилжин хэрэгжиж байна.
“Гурван ээлжээр хичээллэх эрсдэл үүссэн сургуулиудын барилгыг өргөтгөх, хөрөнгө оруулалт хийх, барилга угсралтын ажлыг дуусгахад шаардлагатай санхүүжилтийг гаргаж арга хэмжээ авахыг даалгалаа” гэж Л.Энх-Амгалан сайд ярилаа.
-
Тод мэдээ2023/12/01
Л.Оюун-Эрдэнэ: Монгол Улсад авлигын дагнасан шүүх зайлшгүй шаардлагатай гэж Ерөн...
-
Тод мэдээ2020/11/06
Төмөр замын ачаа тээвэрлэлт өсч, зорчигч тээвэрлэлт буурчээ
-
Тод мэдээ2020/09/18
"Соёлын цаг нөлөөллийн аяныг эхлүүллээ"
-
Чөлөөт бүс2020/06/17
Гол, усны аюулаас урьдчилан сэргийлэхийг анхааруулж байна
Сэтгэгдэл