Бидэнтэй нэгдэх

Тод мэдээ

Хөдөлмөрийн гэрээний 1 жилийн автомат сунгалтад Монгол Улсын 849 иргэн хамрагдана

Огноо:

,

Сэтгүүлч:

БНСУ-ын Засгийн газраас хөдөлмөрийн гэрээгээр ажиллаж байгаад 2021 оны 4 сарын 13-аас гэрээний хугацаа нь дуусч байгаа иргэдийн визийг 1 жилээр сунгах шийдвэр гаргасантай холбогдуулан Монгол Улсын Хөдөлмөр, нийгмийн хамгааллын яамны харьяа БНСУ дахь ХНХҮТ-ийн дарга Д.Баярмандах хөдөлмөрийн гэрээт иргэддээ хандан мэдээлэл хийлээ. Д.Баярмандах даргын хийсэн мэдээллийг хүргэж байна.

“БНСУ-ын Засгийн Газраас Ковид-19 цар тахлаас болж хилээр орж гарахад хүндрэлтэй байгаа гадаад ажилчид болон ажиллах хүчний хомстлоос үүдэн жижиг дунд үйлдвэр, хөдөө аж ахуй, загас ан агнуурын салбарт тулгарч буй хүнд нөхцлийг шийдвэрлэх зорилгоор 2021 оны 4 сарын 13-аас 12 сарын 31-ний хооронд Солонгос улсад оршин сууж буй болон хөдөлмөр эрхлэх зөвшөөрлийн хугацаа дуусч байгаа гадаад ажилчдын оршин суух болон хөдөлмөр эрхлэх зөвшөөрлийн хугацааг 1 жилээр сунгахаар шийдвэрлэв. Энэхүү шийдвэр нь Гадаад ажилчдын хөдөлмөр эрхлэлтийн тухай хуульд өнгөрсөн 3 сард нэмэлт өөрчлөлт оруулсантай холбогдон гарсан шийдвэр юм.

Засгийн газраас Гадаад ажилчдын бодлогын хороог хуралдуулж хөдөлмөр эрхлэх зөвшөөрлийн хугацаа нь  2021 оны 4 сарын 13-аас 12 сарын 31-ний хооронд дуусч байгаа E-9, H-2 визтэй иргэдийн оршин суух болон хөдөлмөр эрхлэх зөвшөөрлийн хугацааг 1 жилээр сунгах шийдвэр гаргажээ.

Иймд энэхүү 1 жилийн сунгалтад хөдөлмөр эрхлэх зөвшөөрөл олгох тогтолцооны дагуу хөдөлмөрийн гэрээний 3 жил болон 4 жил 10 сарын хугацаа нь дуусч буй гэрээт ажилчид хамрагдана.

Үүнд,

- E-9 визтэй хөдөлмөрийн гэрээт ажилчдын хувьд  оршин суух болон хөдөлмөр эрхлэх зөвшөөрлийн хугацааг 50 хоногоор автоматаар сунгасантай адилаар хугацаа дуусвал 1 жилээр сунгаж байгаа.

- Айлчлан ажиллах виз H-2-ын хувьд хөдөлмөрийн хэлтсээс тусгай заалтын ангилалд хамрагдах тухай бичгийг үндэслэн 1 жилийн сунгалт хийгдээ байна.

Мөн Тогтвортой нөхцлөөр дахин ирж ажиллаад 4 жил 10 сарын гэрээний хугацаа нь дээрх 2021 оны 4 сарын 13-аас 12 сарын 31-ний хооронд дуусч байгаа иргэдийн виз ч 1 жилээр сунгагдаж байгаа юм.

Харин энэхүү сунгалтад гэрээний хугацаа нь 2021 оны 4 сарын 13-ны өдрөөс өмнө дууссан, Ковид цар тахлын улмаас хилийн хоригоос болж нутаг буцаж чадалгүй оршин суух хугацааны түр сунгалт хийлгэн хил нээгдэхийг хүлээж буй иргэд хамрагдахгүй ажээ.

Та бүхэн виз сунгагдсан эсэхээ www.hikorea.go.kr вэбсайт руу нэвтрэн 체류만료일조회 цэс рүү орж гадаад паспортын дугаар, төрсөн он сар өдөр гэсэн мэдээллээ оруулж улсынхаа нэрийг сонгоод шалгах боломжтой.

Энэ талаарх асууж лавлах зүйл байвал БНСУ-ын Хөдөлмөр эрхлэлт, хөдөлмөрийн яамны Гадаад ажилчдыг хариуцсан хэлтсийн мэргэжилтэн У Жи Ёньтой 044-202-7145 дугаарын утсаар холбогдон лавлаж болно.

БНСУ-ын Хөдөлмөр эрхлэлт, хөдөлмөрийн сайд Ли Жэ Габ “Ковид-19 цар тахлаас болж гадаадаас ажиллах хүч хилээр орж гарахад хүндрэлтэй нөхцөлд жижиг дунд үйлдвэр, хөдөө аж ахуй, загас ан агнуурын салбарт ажиллах хүч авч ажиллуулахад нэн хүндрэлтэй энэ цаг үед гадаад ажилчдын хөдөлмөр эрхлэх хугацааг 1 жилээр сунгах шийдвэр нь цаг үеэ олсон ба гадаад ажиллах хүч болон ажил олгогч нарын хувьд хүндрэлтэй, ажиллах хүчний хомстолтой байгаа энэ цаг үед бага ч болов хувь нэмэртэй байгаасай хэмээн хүсэж байна” гэдгээ илэрхийлсэн байна.

Хууль зүйн сайд Пак Бом Гэ “Энэ удаагийн гаргасан шийдвэр нь ажиллах хүч хомстолтой байгаа жижиг дунд үйлдвэр, хөдөө аж ахуй, газар тариалан эрхлэх салбаруудад тус дэмтэй байх гэж найдахын сацуу цар тахлын нөхцөл байдал намжвал шинээр ирэх гэрээт ажилчдын хувьд аль болох хурдан ирж ажил хөдөлмөрөө эрхлэн хэвийн байдалдаа эргэн орохыг хүсч байна” гэв.

БНСУ-д Е-9 болон Н-2 визтэй 70 000 – 110 000 гэрээт ажилчид дээрх сунгалтад хамрагдахаас Монгол Улсын 849 хөдөлмөрийн гэрээт иргэд оршин суух болон хөдөлмөр эрхлэх зөвшөөрлийн хугацаагаа 1 жилээр сунгуулахаар болжээ гэж БНСУ дахь Хөдөлмөр, нийгмийн хамгааллын үйлчилгээний төвөөс мэдээллээ.

Дэлгэрэнгүй унших
сурталчилгаа
Монгол Улсын Их Хурлын 2020 оны сонгуулийн санал хураалт дуусах хүртэл сайтын сэтгэгдэл бичих талбарыг түр хаасан тул хүлцэл өчье. TODOTGOL.MN сайтын редакц

Тод мэдээ

Богд уулын аяллын маршрутыг тохижуулах төслийг танилцуулав

Огноо:

,

Өнгөрсөн дөрөвдүгээр сард Нийслэлийн Засаг дарга бөгөөд Улаанбаатар хотын захирагч Д.Сумъяабазар болон холбогдох албаныхан иргэдийн ихээр зорчдог Богдхан уулын аяллын маршруттай танилцаж, тохижилт, бүтээн байгуулалтын ажил хийх үүрэг өгсөн юм. Энэ дагуу энэ сарын 7-нд болсон Засаг даргын зөвлөлийн хурлаар Зайсан-Богдхан уул чиглэлийн аяллын маршрутыг есөн байршилд тохижуулах ажлын танилцуулгыг хийлээ.

Зайсан-Дугуй цагаан-Баруун ширээт чиглэлд амралтын өдрүүдэд зуны улиралд 3000-4000 иргэн, өвлийн улиралд 1000-2000 иргэн ууланд тогтмол алхдаг гэсэн тоон үзүүлэлт байдаг аж.

Тиймээс Улаанбаатар хотын иргэд, оршин суугчдын эрүүл, аюулгүй орчинд амьдрах нөхцөлийг бүрдүүлэх, нийтийн биеийн тамир, уулын явган алхалтыг дэмжих, тусгай хамгаалалттай газар нутгийн байгалийн унаган төрх алдагдахаас хамгаалах, зөв боловсон эко аяллыг цогцоор нь хөгжүүлж, Богд хан эко парк бий болгохоор зорьж буй аж.

Одоо байгаа явган зам нь хөлийн явдлаар хад чулуу нь ил гарсан, бороо, цасны шавар болон байнгын сүүдэртэй хэсгүүдэд мөстөж гулгаа үүссэн эрсдэлүүд өндөр байгаа учраас тодорхой хэсгүүдэд эрсдэлийг бууруулах хүрээнд байгалийн материалыг ашиглан хэсэгчилсэн засвар хийх юм байна.

Мөн ууланд алхагчдад чухал хэрэгцээтэй зүйлийн нэг нь ус бөгөөд тодорхой төвлөрсөн цэгүүдэд ус уух цэгүүдийг төлөвлөх шаардлагатай байгаа гэлээ. Түүнчлэн иргэдийн амрах цэгүүдийг шинэчилж, өндөрлөг цэгт хот болон байгалийн үзэгдэх орчныг харах боломжийг бүрдүүлэх юм байна.

Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Богдхан уулын аяллын маршрутыг тохижуулах ажлыг чанарын өндөр түвшинд хийх хэрэгтэй”-г анхааруулаад олон улсын стандарт,  Хот, тосгоны төлөвлөлт, барилгажилтын норм ба дүрмийг баримтлан тохижилтын ажлаа хийх ёстой гэлээ. Мөн урин дулааны улирал эхэлж буйтай холбогдуулан тохижилтын ажлаа шуурхай хийхийг үүрэг болгов.

Дэлгэрэнгүй унших

Тод мэдээ

Урамшуулал олгох журмын төслийг буцаав

Огноо:

,

Нийслэлийн Засаг даргын зөвлөлийн хурал энэ сарын 7-ны өдөр цахимаар болж, Хог хаягдлыг ангилах, цуглуулах, тээвэрлэх, хадгалах, дахин ашиглах, дахин боловсруулах, сэргээн ашиглах, устгах, булшлах, экспортлох үйл ажиллагаа эрхэлсэн болон байгаль орчинд ээлтэй, хаягдалгүй технологи нэвтрүүлсэн иргэн, аж ахуйн нэгж, байгууллагад эдийн засгийн урамшуулал олгох журам батлах тухай асуудлыг хэлэлцлээ.

Иргэн, аж ахуйн нэгжүүдэд мөнгөн болон кредит онооны системээр дамжуулан эдийн засгийн урамшуулал олгох тухай танилцуулгыг Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр хийсэн юм.

Тухайлбал, өдөр тутмын амьдрал, үйлдвэрлэл, үйлчилгээндээ байгаль орчинд ээлтэй хаягдалгүй технологи нэвтрүүлсэн, хог хаягдлаа эх үүсвэр дээр багасгасан, үйлчилгээний хураамжийг тогтмол төлдөг иргэн, аж ахуйн нэгж, байгууллагад кредит онооны системээр дамжуулан эдийн засгийн урамшуулал олгох юм. Харин хог хаягдлыг ангилах, цуглуулах, тээвэрлэх, хадгалах, дахин ашиглах, дахин боловсруулах, сэргээн ашиглах, устгах, булшлах, экспортлох үйл ажиллагаа эрхэлдэг иргэн, аж ахуйн нэгж, байгууллагад мөнгөн урамшуулал олгох аж.

Хэлэлцэж буй асуудалтай холбогдуулан зөвлөлийн гишүүд саналаа хэлсэн бөгөөд Нийслэлийн Засаг дарга дээрх журмын төслийг бусад хууль, тогтоомжтой уялдуулж, илүү сайжруулах, зөвлөлийн гишүүдийн саналыг тусган, боловсронгуй болгож, дараагийн хуралд танилцуулахыг үүрэг болголоо.

Дэлгэрэнгүй унших

Тод мэдээ

Хог хаягдлын олон нийтийн байцаагч ажиллуулах, мөнгөн урамшуулал олгох журмыг шинэчилнэ

Огноо:

,

Нийслэлийн Засаг даргын зөвлөлийн хурал цахимаар болж, хэд хэдэн асуудал хэлэлцлээ. Хурлын эхэнд Хог хаягдлын олон нийтийн байцаагч ажиллуулах, мөнгөн урамшуулал олгох журмыг шинэчлэн батлах тухай хэлэлцсэн бөгөөд журмын төслийг Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр танилцууллаа. Журмын гол зорилго нь Улаанбаатар хотын иргэдийн эрүүл, аюулгүй орчинд ажиллаж, амьдрах таатай нөхцөлийг бүрдүүлэх, тухайн нутаг дэвсгэрт хог хаягдлын олон нийтийн байцаагч ажиллуулж, хог хаягдлын чиглэлээр гарсан хууль, тогтоомжийг сурталчлах, биелэлтийг хангуулах, хяналт тавих, зөрчил дутагдлыг арилгуулахад оршиж буй юм.

Өнөөдрийн байдлаар Улаанбаатар хотын нийт 88 хороонд хог хаягдлын олон нийтийн байцаагч ажиллаж байгаа юм. Үүнээс Сонгинохайрхан дүүрэгт 43, Баянгол дүүрэгт 25, Сүхбаатар дүүрэгт 20 байцаагч ажиллаж байна. Хог хаягдлын олон нийтийн байцаагч нарын жилийн цалинд 595 сая төгрөг зарцуулдаг.

Хог хаягдлын олон нийтийн байцаагч нар хууль, тогтоомжийг сурталчлах үүрэгтэй ч тэр бүр сургалтад хамрагддаггүй байна. Тиймээс иргэдэд хог хаягдлын талаар хангалттай ойлголт өгч чаддаггүй гэж байлаа. Мөн нийслэлийн дүүргүүдэд олон нийтийн байцаагч жигд ажилладаггүй учраас энэ ажил төдийлөн үр дүнтэй болохгүй байгаа аж. Түүнчлэн дүрэмт хувцас, ажлын үнэмлэх  байхгүй тул тавьсан шаардлагыг иргэд хүлээж авдаггүй, цалин урамшуулал бага учраас  тогтвортой  ажилладаггүй зэрэг асуудал үүсдэг байна.

Тиймээс журмыг сайжруулж, Хог хаягдлын олон нийтийн байцаагчийн ажил үүргийг тодорхой болгож, өвөл, зуны дүрэмт хувцас, ажлын үнэмлэх, цалин, урамшууллын асуудлыг шийдвэрлэх, бусад хууль, тогтоомжтой нийцүүлж журмын төсөл боловсруулсан гэлээ. Хэлэлцэж буй асуудалтай холбогдуулан зөвлөлийн гишүүд асуулт асууж, санал хэлсэн бөгөөд зөвлөлийн гишүүдийн саналыг тусгаад журам гаргахаар болов.

Дэлгэрэнгүй унших
сурталчилгаа
Тод мэдээ1 цаг 49 минут

Богд уулын аяллын маршрутыг тохижуулах төслийг танилцуулав

Тод мэдээ1 цаг 59 минут

Урамшуулал олгох журмын төслийг буцаав

Тод мэдээ2 цаг 3 минут

Хог хаягдлын олон нийтийн байцаагч ажиллуулах, мөнгөн урамшуулал олг...

Тод мэдээ2 цаг 12 минут

Энхтайваны гүүрний замыг нээлээ

Өнөөдөр2 цаг 15 минут

Тээврийн хэрэгслийг замын хөдөлгөөнд 06:00-22:00 цагийн хооронд орол...

Өнөөдөр2 цаг 18 минут

Худалдаа үйлчилгээний байгууллагууд 07:00-20:00 цагийн хооронд ажилл...

Өнөөдөр2 цаг 19 минут

Улаанбаатарт өдөртөө 13 хэм дулаан

Өнөөдөр2 цаг 20 минут

Үс шинээр үргээлгэх буюу засуулбал өлзийтэй сайн

Өнөөдөр2021/05/07

УОК-оос сэрэмжлүүлэг мэдээлэл хүргэж байна /2021.05.07/

Тод мэдээ2021/05/07

Д.Амарбаясгалан: АН эрх мэдэл, албан тушаалын төлөө өлсгөлөн зарлаха...

Тод мэдээ2021/05/07

Л.Оюун-Эрдэнэ:Тавантолгой-Гашуунсухайт чиглэлийн төмөр замыг ирэх он...

Тод мэдээ2021/05/07

Ковид цар тахлын үед хууль, дүрмийн гадуур байж болно гэсэн ямар ч з...

Санал болгох