Дэлхий нийтээр..
“Ногоон нуур 1008 айлын орон сууц” төсөл хэрэгжүүлэх бэлтгэл ажил хангагдлаа
Гэр хорооллын дахин төлөвлөлтийн хүрээнд хэрэгжих “Ногоон нуур 1008 айлын орон сууц” төслийн бүтээн байгуулалтын бэлтгэл ажил бүрэн хангагдлаа. Төслийн бүтээн байгуулалтын шавыг энэ сард тавих байсан ч Коронавирус цар тахлын улмаас хойшлогдоод байгаа юм.
Сүхбаатар дүүргийн 9-р хороо Ногоон нуур 1008 айлын орон сууц” төслийг БНХАУ-ын Засгийн газраас Монгол Улсын Засгийн газарт олгох 350 сая юанийн буцалтгүй тусламжийн хөрөнгөөр хэрэгжүүлэх юм. Төслийн бүтээн байгуулалтын ажлын хүрээнд нийт 84833,6м2 талбай бүхий 21 давхар, зоорьтой, найман блок барилга барихаар төлөвлөөд байна. Мөн авто зам, авто зогсоол, ногоон байгууламж, 960 хүүхдийн сургууль, 240 хүүхдийн цэцэрлэгийн барилга барина.
Дашрамд дурьдахад Улаанбаатар хотын Гэр хорооллын дахин төлөвлөлтийн орон сууцны бүтээн байгуулалтад тусламж үзүүлэх тухай Төсөл хэрэгжүүлэх “Албан протокол”-д 2019 оны 7 дугаар сарын 26-ны өдөр гарын үсэг зурж баталгаажуулсан байдаг. Мөн ТЭЗҮ, Ажлын зураг төсөл, төсөв боловсруулж дуусгах, БНХАУ-ын талд хүлээлгэн өгсөн.
Харин 2020-2021 онд Төсөл хэрэгжүүлэх нэгж БНХАУ-ын Төслийн менежментийн баг, зургийн зохиогчтой удаа дараа уулзалт, хуралдааныг зохион байгуулж төслийн ерөнхий гүйцэтгэгч компанийн тендерийн сонгон шалгаруулалтын баримт бичиг болон зураг төсөлтэй холбоотой тодорхойгүй байсан асуудлуудыг эцэслэн шийдвэрлэсэн. Үүний үр дүнд 2020 оны 10 дугаар сарын 28-нд тендерийг нээж, Тендерийн үнэлгээний хороо үнэлэн “Хятадын 2 дахь Металлурги групп корпораци” ХХК-ийг ерөнхий гүйцэтгэгчээр шалгаруулсан. 2020 оны 12 дугаар сарын 11-ний өдөр Төслийн ерөнхий гүйцэтгэгч компанитай гэрээ байгуулан ажиллаж байна.
Төсөл хэрэгжих барилгын талбайн дээрх 37 нэгж талбар бүхий айлуудаас төслийн барилгын талбайд орсон 11 айлтай гурван талт гэрээ байгуулсан байна. Мөн долоон айл газар чөлөөлөлтөө хийж,дөрвөн айлын газар чөлөөлөлтийн гэрээг холбогдох газруудаар хянуулан, баталгаажуулж 4-р сард багтаан нүүх, ариутгал, цэвэрлэгээг хийх ажил явагдаж байна
Түүнчлэн төсөл хэрэгжүүлэх нэгжийн ИТА болон БНХАУ-ын менежментийн багийн ажилтнуудын байрлах түр байр, инженерийн байгууламжийн угсралтын ажлыг нээлттэй сонгон шалгаруулалт явуулж, улмаар “Сэнх” ХХК-ийг сонгон ажил гүйцэтгэх гэрээ байгуулан барилга угсралтын ажлыг хийж гүйцэтгүүлж бэлэн болгосон байна.Барилгажих талбайн орц чөлөөлөх, дэд станц зөөх, шилжүүлэх, түр цахилгаан буюу барилгын 2-р эх үүсвэрийн ажлыг нээлттэй сонгон шалгаруулалт зарлаж, “Улаанбаатар электро монтаж” ХХК-ийг сонгон гэрээг байгуулан, ажлын явцад хяналт тавьж хийж дуусгаад байгаа юм.
Бүтээн байгуулалтын ажил эхлүүлэх бэлтгэл ажил болох автобусны буудал шилжүүлэх орц гарц хийх ажлыг мөн гүйцэтгэж дуусгаад байгаа юм.Тодруулж хэлбэл “Цагаан байрны зүүн талын автобусны буудал шилжүүлэх орц, гарц гаргах” ажлыг “Мос говь” ХХК батлагдсан зураг төсөл, стандартын дагуу гүйцэтгэж , 2020 оны 11 сарын 10-ны өдөр ашиглалтад хүлээн авчээ
Мөн буурь, хөрс, суурь хөрсний ус шүүрүүлэх ажлыг Усны эрчим ХХК компани гуравдугаарр сарын 1-ний өдрөөс эхэлжээ. Барилгын талбайд хяналтын цооног өрөмдөх, усны ундарга тогтоох, дүгнэлт гаргах ажлууд хийж дуусгасан байна гэж Барилга, хот байгуулалтын яамнаас мэдээллээ.
Дэлхий нийтээр..
Германы прокурорууд “Умардын урсгал”-ын халдлагыг Украины тал захиалсан гэж үзжээ
Германы прокурорууд 2022 онд “Умардын урсгал” хийн хоолойд гарсан дэлбэрэлттэй холбоотойгоор Украины армийн офицер асан этгээдэд яллах дүгнэлт үйлджээ. Түүнийг Украины төрийн байгууллагын нэрийн өмнөөс ажиллаж, хоолойг дэлбэлэх ажиллагаанд оролцсон гэж буруутгаж байна.
Германы хувийн мэдээлэл хамгаалах журмын дагуу Серхий К. гэж нэрлэгдсэн уг этгээдийг иргэний зориулалттай байгууламжид халдсан, дэлбэрэлт үүсгэсэн, дэд бүтэц сүйтгэсэн, нийтийн үйлчилгээг тасалдуулсан бүлэгт багтсан гэж үзжээ. Харин тэрбээр уг хэрэгт холбоогүй гэдгээ мэдэгдсэн байна.
Киевийн эрх баригчид Германы прокуроруудын мэдэгдэлд дэлгэрэнгүй тайлбар өгөх хангалттай мэдээлэл одоогоор байхгүй гэжээ. Украины Ерөнхийлөгч Владимир Зеленский яллах дүгнэлтийн талаар бүрэн мэдээлэл аваагүй тул одоогоор дүгнэлт хийхэд эрт байна гэж мэдэгдсэн байна.
Прокуроруудын мэдээлснээр Серхий К. нь 2022 оны есдүгээр сард шумбагчид, хөлгийн ахмад, тэсрэх бодисын мэргэжилтнээс бүрдсэн багийг удирдан Герман руу хуурамч бичиг баримтаар нэвтэрч, хөлөг түрээслэсэн гэж үзэж байна. Улмаар багийнхан Балтын тэнгист байрлах хоолойн хэсэгт тэсрэх төхөөрөмж байрлуулсан гэх үндэслэлээр шалгагдаж байна.
“Умардын урсгал”-ын дэлбэрэлт 2022 оны есдүгээр сард буюу Орос Украинд бүрэн хэмжээний довтолгоо эхлүүлснээс долоон сарын дараа болсон. Дэлбэрэлтийн улмаас Оросын байгалийн хийг Европ руу дамжуулах гол шугам болох “Умардын урсгал-1” гэмтэж, ашиглалтад ороогүй байсан “Умардын урсгал-2”-ын хэсэг мөн эвдэрсэн юм.
Германы тал уг хэргийг өөрийн харьяалалд хамаарна гэж үзэж байна. Учир нь гэмтсэн хоолойнууд Германы Мекленбург–Өрнөд Померани мужийн Любмин хотод хүрдэг бөгөөд Германы эрчим хүчний аюулгүй байдалд нөлөөлсөн гэж тайлбарлажээ.
Дэлхий нийтээр..
БНСУ-ын Ерөнхийлөгч И Жэ Мён Монгол Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён-ы хамт 2026 оны 07 дугаар сарын 09-11-ний өдрүүдэд Монгол Улсад төрийн айлчлал хийнэ.
Энэ айлчлал БНСУ-ын төрийн тэргүүн 2011 онд манай улсад айлчилснаас хойш 15 жилийн дараа болох юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс:
2006 онд “Сайн хөршийн, найрамдал, хамтын ажиллагааны түншлэл”
2011 онд “Иж бүрэн түншлэл”
2021 онд “Стратегийн түншлэл”-ийн харилцаа тогтоосон.
Монгол Улс, Бүгд Найрамдах Солонгос Улс 1990 оны 03 дугаар сарын 26-ны өдөр дипломат харилцаа тогтоосон. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээжээ.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
-
Дэлхий нийтээр..2025/01/20
Хуулийн хэрэгжилтийг хангуулах албан бичиг хүргүүлэв
-
Дэлхий нийтээр..2024/09/05
Засгийн газрын ээлжит хуралдаан боллоо
-
Дэлхий нийтээр..2024/01/08
Энхийг сахиулах цэргийн багийн бие бүрэлдэхүүнийг МИАТ анх удаа тээвэрлэн хүргэл...
-
Тод зураг2020/06/04
Гоодаль цэцгээр бүсгүй хүний гоо сайхныг бэлгэддэг