Тод мэдээ
“Далайд дусал нэмэр” хандивын аяны хүрээнд хүнсний 2000 ширхэг багцыг зорилтод бүлгийн иргэдэд хүргэж байна
Улсын Их Хурлын гишүүн Э.Бат-Амгалангийн санаачлан зохион байгуулж буй “Далайд дусал нэмэр” аяны хүрээнд Коронавируст халдварт өвчний хөл хорионы улмаас өрхийн орлогогүй болсон иргэдэд хүнсний тусламж олгох үйл ажиллагаа эхэллээ.
Хүнсний хандивын арга хэмжээний үеэр УИХ-ын гишүүн Э.Бат-Амгалан “ДАЛАЙД ДУСАЛ НЭМЭР” аянд иргэд болон ААН байгууллагууд нэгдэж идэвхитэй оролцож байгаа нь хүнд хэцүү цагт нэг нэгэндээ тусалсан шиг туслаж чаддаг ард түмэн гэдгийг батлан харуулж байна. Мөн энэ удаагийн хандивын аян дүүргийг томоор нь харж, нэгдсэн зохион байгуулалтад орж хийж байгаа гэдгээрээ онцлогтой. Мөн зорилтот бүлгийн иргэдээ сонгохдоо ДОК-ын дэргэд ажиллаж байгаа “CALL CENTER”-д ирсэн иргэдийн хүсэлтүүд болон хороо дүүргийн нийгмийн ажилтнуудын гаргасан тусламж, дэмжлэг нэн яаралтай хэрэгтэй айл өрхүүдийн судалгаан дээр үндэслэж байгаа учраас ХҮНСНИЙ БАГЦ яг зорилтот эзэддээ очих боломжтой гэж ойлгож болно” гэлээ.
Баянзүрх дүүргийн хэмжээнд амьжиргааны түвшин доогуур, өдөр тутмын орлого нь зогссон иргэдэд зориулж 2000ш хүнсний багцыг түгээх ажлыг эхлүүллээ. Энэхүү 2000ш хүнсний багцын түгээлтийг дүүргээс сонгогдсон төлөөлөгчид хариуцаж байна. Харин иргэдийн судалгааг Баянзүрх дүүргийн Засаг даргын тамгын газрын нийгмийн халамжийн хэлтэс, “CALL CENTER” 1900-1063 дугаарт тусламж авах хүсэлтэй иргэдийн дуудлагын дагуу бүртгэн авчээ. Түгээгдэж байгаа хүнсний 2000ш багцад Милл Хаус ХХК, Ариг сувд ХХК, Гүрж амт ХХК, Мон давс ХХК, Мон райс органик фүүдс ХХК зэрэг үндэсний үйлдвэрлэгч байгууллагуудаас нийт 34 тонн 460кг гурил, будаа, ургамлын тос, цайны идээ, өрмөнцөр, давс, ёотон зэрэг багтжээ.
“Далайд дусал нэмэр” аян нь 11-р сарын 23ны өдрөөс эхэлсэн, одоогийн байдлаар 32 аж ахуй нэгж, төрийн бус байгууллага, сургууль цэцэрлэгийн удирдлагууд нэгдээд байна. Өнөөдрийн байдлаар нийт 150 орчим сая төгрөгийн бараа бүтээгдэхүүн, эд зүйлс цугласан байна. Тухайлбал 41 сая төгрөг бэлнээр, 71000ш амны хаалт, 6000ш ариутгалын бодис, 10ш халаагуур зэрэг цугласан.
Аяны хүрээнд өмнө нь Баянзүрх дүүргийн хэмжээнд үйл ажиллагаа явуулдаг 28 өрхийн эрүүл мэндийн төвүүдэд шаардлагатай амны хаалт, гар ариутгагч, хамгаалалтын хувцас, нүүрний хаалт зэргийг хандивласан. Мөн дүүргийн хэмжээнд төрийн болон төрийн бус байгууллага, аж ахуй нэгж, Олон улсын байгууллагын хандив тусламжаар 2558 өрхөн хүнс тэжээлийн дэмжлэг, 1499 өрхөнд нийгмийн халамжийн сангаар дамжуулж шахмал түлшний тусламж үзүүлжээ.
“ДАЛАЙД ДУСАЛ НЭМЭР” хандивын аян үргэлжилж байна.
Тод мэдээ
Олон улсын эрдэмтэн, судлаачид тарваган тахлын эсрэг хэрэгжүүлэх гарц шийдлийг хэлэлцэж байна
Олон улсын “Yersinia” симпозиум 15 дахь удаагийн хурал Монгол Улсын нийслэл Улаанбаатар хотноо болж байна. Хурлыг нээж, Эрүүл мэндийн сайд Ж.Чинбүрэн, ДЭМБ-ын Монгол дахь суурин төлөөлөгч Сокорро Эксаланте нар үг хэллээ.
Хоёр өдөр чуулах энэхүү хурлаар 11 улс орны эрдэм шинжилгээ, судалгааны 25 бүтээлийг хэлэлцэх юм.
Хурлын зорилго Монгол төдийгүй дэлхий нийтийн анхаарлын төвд буй тарваган тахлын эсрэг авч хэрэгжүүлэх жишиг туршлага, шинэ санаа солилцох, хамтын ажиллагаа эхлүүлэх, үр дүнтэй гарц шийдлүүдийг эрэлхийлэхэд оршиж байгаа юм.
Учир нь, сүүлийн жилүүдэд амьтнаас хүнд халдварлах зоонозын халдварт өвчин нэмэгдэж, зарим тохиолдол нь дэлхий дахиныг хамарсан цар тахлын хэмжээнд хүрэх болсон. Тодруулбал, ДЭМБ-аас өнгөрсөн онд шинэчлэн гаргасан “Шинэ болон цар тахал үүсгэх эрсдэл бүхий үүсгэгчийн жагсаалт”-д тарваган тахал өвчнөөс гадна вирус, нян, паразитаар үүсгэгддэг зоонозын гаралтай 20 гаруй халдварт өвчин оржээ. Иймд зоонозын гаралтай халдварт өвчнийг тандах, хянах, сэргийлэх, хариу арга хэмжээ авахад шинжлэх ухаанч, шинэ техник технологи иноваци шингэсэн арга хэмжээг хэрэгжүүлэх шаардлага үүссэн. Тиймээс Монгол Улс бодит хэрэгцээ шаардлагыг үнэлж, “Нэг эрүүл мэнд” үзэл баримтлалыг өргөжүүлэх, салбарын оролцоог нэмэгдүүлэх, хамтарсан зөвлөл болон дунд хугацааны төлөвлөгөө боловсруулан хэрэгжүүлэхээр ажиллаж байна.
Тарваган тахал “Yersinia pestis” гэх нянгаар үүсгэгддэг, амьтнаас хүнд халдварладаг аюултай халдварт өвчин юм. Монгол Улсын хувьд, 17 аймгийн 137 сум тарваган тахлын байгалийн голомттой бөгөөд энэ нь нийт нутаг дэвсгэрийн 28.3 хувийг эзэлж байна. Хамгийн сүүлд буюу өнгөрсөн сард Хөвсгөл аймагт тарваган тахал өвчний тохиолдол бүртгэгдэж, нэгдүгээр хавьтал болсон 100 гаруй иргэнийг тусгаарлахын зэрэгцээ тухайн аймаг, орон нутгийг хяналтад авч, хөл хорио тогтоох зэрэг арга хэмжээ аваад буй энэ цаг үед олон улсын эрдэмтэн судлаачид чуулж, гарц шийдэл эрэлхийлж буйгаараа энэхүү хурал онцлог бөгөөд ач холбогдолтой болж байна.
Гурван жил тутам зохион байгуулагддаг олон улсын “Yersinia” симпозиумыг анх 1972 онд Шведийн хант улсын Мальмё хотноо зохион байгуулж байжээ. “Yersinia” нянгийн олон янз байдал, бүтэц, физиологийн онцлог, хувьсал, эзэн амьтдын холбогдол, экологи, тархвар зүй, оношилгоо, хүнсний аюулгүй байдал, дархлаажуулалттай холбоотой асуудлыг голлон хэлэлцдэг тул энэ чиглэлийн олон улсын судлаачдын хамгийн том цугларалт болж байна гэж Зоонозын Өвчин Судлалын Үндэсний Төвөөс мэдээллээ.
Тод мэдээ
Өнөөдрөөс хуучин хязгаарлалтын дагуу тээврийн хэрэгслүүд хөдөлгөөнд оролцоно
Нийслэлийн Засаг даргын А/1176 дугаар захирамжийн дагуу наймдугаар сарын 27-ны өдрөөс есдүгээр сарын 16-ны 20:00 цагийг дуустал тээврийн хэрэгсэл улсын дугаарын тэгш, сондгойгоор замын хөдөлгөөнд оролцсон.
Харин өнөөдөр буюу энэ сарын 17-ны өдрөөс эхлэн хуучин хязгаарлалтын дагуу тээврийн хэрэгслүүд хөдөлгөөнд оролцоно. Тодруулбал,
1, 6-аар төгссөн дугаартай машинууд даваа гараг
2, 7-оор төгссөн дугаартай бол мягмар гараг
3, 8-аар төгссөн дугаартай бол лхагва гараг
4, 9-өөр төгссөн дугаартай бол пүрэв гараг
5, 0-ээр төгссөн дугаартай бол баасан гарагт 08:00-20:00 цагийн хооронд хөдөлгөөнд оролцохгүй.
Дугаарын хязгаарын бүс:
- 32-ын тойргоос 120 мянгатын уулзвар хүртэл,
- Саппорогийн уулзвараас Чулуун овооны тойрог хүртэлх авто зам хамаарна.
Ташрамд, нийслэлийн Засаг даргын 2020 оны А/1037 дугаар захирамжаар Улаанбаатар хотын авто замын ачааллыг бууруулах цогц арга хэмжээний хүрээнд нийслэл хотод бүсчлэл тогтоож, автомашины улсын дугаарын сүүлийн оронгоор хязгаарлаж хөдөлгөөнд оролцуулах зохицуулалтыг хийсэн байдаг.
Жолооч та бүхэн захирамжийн хэрэгжилтийг чандлан мөрдөж, замын хөдөлгөөнд соёлтой, анхаарал болгоомжтой оролцоно уу.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Хоёр эмэгтэйн амь насыг онц хэрцгийгээр хөнөөсөн хэргийн урьдчилсан хэлэлцүүлэг өнөөдөр болно
2024 оны 6 дугаар сард 32 болон 16 настай хоёр эмэгтэйн амь насыг онц хэрцгийгээр хөнөөж, цогцсыг шүүгээ болон чемоданд нууж далдлахыг завдсан ноцтой хэрэг гарсан.
Тус хэргийг шүүхээр хэлэлцэхээс өмнөх урьдчилсан хэлэлцүүлэг өнөөдөр Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд болохоор товлогдоод байна.
Тэгвэл шүүхийн урьдчилсан хэлэлцүүлэг ямар асуудлуудын хүрээнд явагддаг талаар танилцуулъя.
Жич: Шүүхийн урьдчилсан хэлэлцүүлгээр яллах дүгнэлтэд заасан гэмт хэргийн хүрээнд талуудын гаргасан хүсэлт, гомдлоор, эсхүл шүүгч өөрийн санаачилгаар дараах асуудлыг хянан хэлэлцэж шийдвэр гаргана гэж Монгол Улсын Дээд Шүүхээс мэдээллээ.
