Дэлхий нийтээр..
“Эрүү шүүлтээс урьдчилан сэргийлэх нийгэмлэг” олон улсын байгууллагын төлөөллийг хүлээн авч уулзав
Улсын Их Хурлын Хууль зүйн байнгын хорооны дарга Д.Цогтбаатар “Эрүү шүүлтээс урьдчилан сэргийлэх нийгэмлэг” олон улсын байгууллагын Ерөнхий нарийн бичгийн дарга Николь Хогг тэргүүтэй төлөөлөгчдийг хүлээн авч уулзав.
Хүний эрхийн Үндэсний Комиссын Эрүү шүүлтээс урьдчилан сэргийлэх асуудал эрхэлсэн гишүүн Я.Цэлмэнгийн урилгаар манай улсад ажиллаж буй “Эрүү шүүлтээс урьдчилан сэргийлэх нийгэмлэг” олон улсын байгууллагын төлөөлөгчдөд тэрбээр амжилт хүсээд, Монгол Улсын эрүү шүүлтээс урьдчилан сэргийлэх үндэсний ажиллагааны талаар танилцууллаа. Монгол Улс Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэхийн эсрэг конвенцод нэгдэн орсноор хууль тогтоомжоо нийцүүлэх, дагаж мөрдөх үүрэг хүлээсэн болохыг Д.Цогтбаатар дарга дурдаад “Эрүү шүүлт гэхээр цагдан хоригдсон үед ч юм уу, тусгай орчин нөхцөлд үйлдэгддэг гэдэг түгээмэл ойлголт байдаг. Гэтэл конвенцод хаана ч, хэзээ ч үйлдэгдэх эрсдэлтэйг тодотгосон өргөн агуулгатайгаар томьёологдсон. Эрүү шүүлтийн аливаа хэлбэрийг хүлээн зөвшөөрөх ёсгүй бөгөөд таслан зогсоохын тулд дотоодын хууль тогтоомжоо тус конвенцод нийцүүлэн, нэгбүрчлэн хэрэгжүүлэх нь нэн чухал” хэмээн байр сууриа илэрхийллээ. Монгол Улс эрүү шүүлтээс урьдчилан сэргийлэх үндэсний ажиллагааг тууштай хэрэгжүүлж байгааг тэрбээр тэмдэглээд, монгол хүний эрхийг хангах, хамгаалах зорилготой энэхүү үйл ажиллагааны талаарх зөвлөмж, саналыг нээлттэй хүлээн авч ажиллахаа илэрхийлэв.
“Эрүү шүүлтээс урьдчилан сэргийлэх нийгэмлэг” олон улсын байгууллагын Ерөнхий нарийн бичгийн дарга Николь Хогг цаг гарган хүлээн авч уулзсан Байнгын хорооны дарга Д.Цогтбаатарт талархал илэрхийллээ. Төлөөлөгчид эрүү шүүлтээс урьдчилан сэргийлэх үндэсний ажиллагааны талаарх олон улсын туршлагыг хуваалцахын зэрэгцээ Монгол Улс дахь эрүү шүүлтийн нөхцөл байдалтай танилцаж, ажиглалт хийхээр ажиллаж буйгаа танилцуулав. Түүнчлэн бүс нутгийн хэмжээнд хуваалцаж болох Монгол Улсын сайн туршлагуудыг судалж байгаа гэлээ.
Улсын Их Хурлын Хууль зүйн байнгын хорооны дарга Д.Цогтбаатар “Өдгөө бүрэн эрхээ хэрэгжүүлж буй Улсын Их Хурал нь хүн төвтэй эрх зүйн орчныг бүрдүүлэхийг эрхэм зорилго болгон ажиллаж байна” хэмээн тодотгоод, хүний эрхийг хангах, хамгаалах, эрүү шүүлтээс урьдчилан сэргийлэх чиглэлээр батлагдсан хууль тогтоомж, парламентын энэ чиглэлээрх шийдвэр, үйл ажиллагааны талаар мэдээлэл өгөв.
Үргэлжлүүлэн талууд эрүү шүүлтээс ангид байх хүний эрхийг хангах, урьдчилан сэргийлэх чиглэлээр олон улсын сайн туршлагыг Монгол Улсад нэвтрүүлэх, “Эрүү шүүлтээс урьдчилан сэргийлэх нийгэмлэг” олон улсын байгууллагатай хамтын ажиллагааг өргөжүүлэх талаар санал солилцсон юм.
Уулзалтад Хүний эрхийн Үндэсний Комиссын Эрүү шүүлтээс урьдчилан сэргийлэх асуудал эрхэлсэн гишүүн Я.Цэлмэн, “Эрүү шүүлтээс урьдчилан сэргийлэх нийгэмлэг” олон улсын байгууллагын ахлах зөвлөх Бен Бакланд, Нид Сатжипанон болон албаны бусад хүмүүс оролцов хэмээн Улсын Их Хурлын Хэвлэл мэдээллийн газраас мэдээллээ.
Дэлхий нийтээр..
Хятад, АНУ-ын төрийн тэргүүнүүд дахин нүүр тулан уулзана
Хятад улсын дарга Ши Жиньпиний урилгаар АНУ-ын ерөнхийлөгч Дональд Трамп 5-р сарын 13-15-ны хооронд БНХАУ-д төрийн айлчлал хийж байна.
Энэ нь Хятад, АНУ-ын төрийн тэргүүнүүдийн өнгөрсөн оны 10-р сард Пусан хотод уулзсаны дараа хоёр дахь удаагаа нүүр тулан уулзах бөгөөд АНУ-ын Ерөнхийлөгчийн есөн жилийн хугацаанд Хятадад хийсэн анхны айлчлал юм. Хоёр орны тэргүүн Хятад, Америкийн харилцаа, дэлхийн энх тайван, хөгжлийн гол асуудлаар гүнзгий санал солилцох болно.
Дэлхий нийтээр..
Украйн: Батлан хамгаалахын салбарын албан хаагчид 9 жилийн хорих ял оноов
Украин улсын Авлигын эсрэг дээд шүүх “Красиловын агрегатын үйлдвэр” төрийн өмчит компанийн үйлдвэрийн хэлтсийн даргыг хахууль авсан хэрэгт буруутай гэж үзэн 9 жилийн хорих ял оноосон байна.
Уг этгээд нь бизнес эрхлэгчээс 1,990,840 гривень (161,8 сая төгрөг)-тэй тэнцэх хэмжээний хахууль авсан нь мөрдөн шалгах ажиллагаагаар тогтоогджээ. Үүний хариуд бүтээгдэхүүн нийлүүлэх гэрээ байгуулах болон хүлээн авах явцад саад учруулахгүй байх, төлбөрийг баталгаажуулах, цаашдын хамтын ажиллагааг дэмжих талаар амлалт өгсөн байв.
Авлигын эсрэг дээд шүүхээс түүнийг Украины Эрүүгийн хуулийн 368 дугаар зүйлийн 4 дэх хэсэгт заасны дагуу хорих ялаас гадна өмчийн тодорхой хэсгийг хураах, удирдах албан тушаал эрхлэх эрхийг 3 жилийн хугацаагаар хасах шийдвэр гаргасан байна. Мөн шүүхээс гарсан шийдвэрийг 30 хоногийн дотор давж заалдах боломжтой талаар мэдэгджээ.
Дэлхий нийтээр..
АНУ ухарсан уу: Хормузын бүс дэх завсарлага юу өгүүлж байна вэ
Ирантай холбоотой хурцадмал байдал намжаагүй энэ үед АНУ-ын цэргийн ажиллагаа сүүлийн өдрүүдэд саарч, зарим чиглэлд түр зогссон нь анхаарал татаж байна. Үүнтэй зэрэгцэн “АНУ ухарсан уу?” гэсэн асуулт олон нийтийн дунд гарч эхэллээ.
АНУ тавдугаар сарын эхнээс Хормузын хоолойд саатсан хөлөг онгоцуудыг хамгаалан нэвтрүүлэх ажиллагаа явуулсан. Энэ нь дэлхийн нефтийн нийлүүлэлтийн чухал урсгалд үүссэн саатлыг арилгах зорилготой байв. Харин удалгүй уг ажиллагаагаа хэсэгчлэн саатуулж, хэлэлцээрт илүү анхаарах хандлага ажиглагдав.
Гэвч энэ өөрчлөлтийг шууд “ухралт” гэж дүгнэхэд эрт. АНУ бүс нутагт цэргийн хяналтаа хэвээр хадгалж, шаардлагатай тохиолдолд дарамтаа нэмэгдүүлэх боломжтой байр суурь баримталж байна. Өөрөөр хэлбэл, бүрэн зогсолт бус, тодорхой зорилготой завсарлага гэж ойлгож болно.
Хормузын хоолой бол дэлхийн нефтийн урсгалын гол зангилаа. Тус бүсээр дамжих нийлүүлэлтэд саад гарвал олон улсын зах зээлд шууд нөлөөлдөг. Иймээс АНУ-ын алхам зөвхөн цэргийн хүрээнд бус, эдийн засгийн томоохон үр дагавартай.
Нөгөө талд Иран энэ бүс дэх нөлөөгөө хадгалахыг эрмэлзэж, гадаадын цэргийн оролцоог эсэргүүцсээр байна. Энэ нь хэлэлцээрийг урагшлуулахад бэрхшээл учруулж, хоёр талын итгэлцлийг сул хэвээр байлгаж байна.
Одоогийн нөхцөл байдлыг ажиглавал, аль аль тал тодорхой хэмжээнд болгоомжтой байр суурь баримталж, хурцадмал байдлыг хэт өргөжүүлэхээс зайлсхийж буй дүр зураг ажиглагдана. Гэхдээ бүс нутагт эрсдэл бүрэн арилгагдаагүй хэвээр.
Ийнхүү АНУ-ын энэ алхам нь ухралт гэхээс илүүтэй нөхцөл байдлыг ажиглах, дараагийн шийдвэрт бэлтгэх завсарлага мэт харагдаж байна. Харин энэ завсарлага энхийн хэлэлцээнд хүргэх үү, эсвэл дараагийн хурцадмал үеийн өмнөх нам гүм байдал болох уу гэдэг нь ойрын өдрүүдэд тодорхой болох төлөвтэй.
-
Дэлхий нийтээр..2024/12/02
“Хууль, тогтоол хүчингүй болсонтой холбогдуулан авах арга хэмжээний тухай&...
-
Дэлхий нийтээр..2023/06/15
Төсвийн зарлагын хяналтын дэд хороо хуралдав
-
Дэлхий нийтээр..2020/10/19
“Цахим төлбөрийн QRBARIMT”-ыг ашигладаг боллоо
-
Дэлхий нийтээр..2025/12/10
Хилийн боомтуудын амрах хуваарь гарчээ