Тод мэдээ
Найман жил тасраагүй зуурмаг “ХӨӨРХӨН” брэнд
Монголын хүнс үйлдвэрлэлийн салбарт хагас бэлэн боловсруулсан бүтээгдэхүүн маш том байр суурь эзэлдэг болоод буй. Нийгмийн шилжилтийн үеэс хойш импортын бараа, бэлэн бүтээгдэхүүн зах зээлд давамгайлж байсан бол сүүлийн жилүүдэд үндэсний үйлдвэрлэгчдийн хагас боловсруулсан бүтээгдэхүүн олонд танигдаж, зах зээлд байр сууриа олж, тодорхой хувийг эзэлдэг болжээ.
Энэ салбарт социалист нийгмийн үед тавьсан суурин дээр өндийж боссон үндэсний үйлдвэрлэгч компаниудаас гадна хувийн жижиг цех, жижиг дунд үйлдвэрүүд амжилттай ажилласаар байна. Тэд өдөр бүр шахам зах зээлд шинэ, сонин содон бүтээгдэхүүн санал болгож хэрэглэгчдийн цаг зав, мөнгө санхүүг хэмнэх бүхий л талын боломжийг нээж өгсөөр байна.
Техник технологийн дэвшил хөгжлөө дагаад хүмүүсийн амьдралын хэмнэл түргэсэж, цаг зав шаардсан уламжлалт хоол хүнс бэлтгэх арга ажиллагаа эзэгтэйн гал тогооноос шахагдсаар л байна. Саяхан нэг судалгаа уншихад 1960-аад оны үед айлын эзэгтэй гал тогоондоо дор хаяхад дөрвөн цаг зарцуулдаг байсан бол одоо 45 минутаас ихгүй болсон гэжээ. Эзэгтэй нарт гарч байгаа үлдсэн гурван цаг 15 минутыг тэд өөрийн хөгжиж, дэвших боловсролд зарцуулдаг болсон байна. Хөгжил гэж үүнийг л хэлнэ. Хагас боловсруулсан бүтээгдэхүүн бидний хувьд өөрийн үндэсний онцлогоо шингээсэн зарим арга ажиллагааг хэмнэж өгч байдаг. Хагас бэлэн болсон бууз, хуушуур, банш гэх мэт үндэсний хоол хүнсийг хэрэглэгчдийн гар дээр тавьж байдаг.
Саяхан хагас бэлэн бүтээгдэхүүний салбарт өөрийн хүч хөдөлмөр, уйгагүй хичээл зүтгэлээр орж ирээд салбарын тэргүүлэгч компаниудын нэг болоод байгаа “Soso foods” компанийн хамт олон бас нэгэн цоо шинэ төрлийн бэлэн бүтээгдэхүүнээ зах зээлд гаргажээ. Ард иргэдийн дунд “Наадмын хуушуур” нэрээр танил болсон дугуй хуушуурыг хагас боловсруулан савлаж хэрэглэгчдийн гар дээр тавьсан нь үнэхээр содон сонин шийдэлтэй байлаа. “Монголын үнэн” сонин зах зээлд гарч буй бүхий л шинэ сонин, содон бараа бүтээгдэхүүнийг хэрэглэгчдэд таниулах, үйлдвэрлэгч, шинийг санаачлагчдыг алдаршуулах зорилгоор тэдний ажил үйлсийг “Бүтээлч Монгол” хөмсгийн дор бүтэн нүүрээр сурталчлан танилцуулдаг. Энэ удаа бид “Soso foods” компанийн хамт олон, тэдний шинээр танилцуулж буй “Хөөрхөн” гэх дугуй, шардаг хуушуурын үйлдвэрлэлтэй танилцахаар очсон юм.
Хэзээний таньдаг үйлдвэрийн шилэн хаалгыг татан ороход “Soso foods” компанийн хамт олны таатай уур амьсгал намайг бүчин авлаа. Ажил ч нэг буцалж байна аа. “Шинэ бүтээгдэхүүн гаргаад бид чинь 24 цагаар, хоёр ээлжээр тасралтгүй л ажиллаж байна даа” гэж ярих бүсгүй энэ үйлдвэрийн эзэн С.Соёлмаа.
Урдны танилуудын ёсоор элгэмсэн гар бариад, ажил оволзох үйлдвэрийн хэмнэлд автан бахархахдаа “Чи мөн ч галтай бүсгүй юм даа. Ахиад нэг шинэ бүтээгдэхүүн гаргалаа гэдгийг чинь сонсоод ирлээ” гэвэл урдаас инээмсэглэн “Харин ч тайван болчихоод сууж байна.
Үйлдвэрийнхээ байрыг өргөтгөөд, ажил жигдрээд ирэхээр юундаа адгах вэ” хэмээн хариу барьж байна. Одоогоос яг хоёр жилийн өмнө “Soso foods” компанийн “Хөөрхөн мантуу” брэндтэй танилцахаар ирж байсан юм. Үйлдвэрийн ажилчдын зарим нь намайг таньж буй бололтой толгой дохин инээмсэглэнэ. Бараа нийлүүлэлт, үйлдвэрлэлийн тасралтгүй байдлыг ханган хэрэглэгчдийн эрэлтэд нийцсэн компанийн уламжлалт бүтээгдэхүүн тэдний гараас гарт, дамжлагаас дамжлага руу зогсолтгүй хөврөх аж. Үйлдвэрийн технологи, жор нарийн нууцлалтай тул нарийвчлан өгүүлэх боломжгүй. Хүнс үйлдвэрлэл гэдэг ийм л нарийн.
Америкийн алдарт Кока коланы жор гэхэд л 120 гаруй жилийн түүхтэй музейн байгууламжийн нууц хонгилд нууц жор хадгалагчид байрладаг бөгөөд тус нууцыг ердөө хоёрхон хүн л мэдэж байдаг. Кока коланы 100 гаруй жилийн түүхэнд жор бүтээгч ердөө л хоёрхон хүн нууц жорыг бүтээсэн байдаг гэхээр итгэмгүй юм шүү. Энэ бол үнэн баримт.“Soso foods” компанийн “Хөөрхөн мантуу” брэндийн жор гэхэд л найман жилийн турш тасраагүй өөрөөсөө исэгч зуурмаг байдаг. Энэ жороор бүтээсэн “Хөөрхөн” брэнд Монгол Улсын нийслэл, 14 аймагт 2500 гаруй цэгт борлуулагдаж байна гээд бод доо.
Наян жил, зуун дамжин өвлөгдөж яагаад болохгүй гэж. Жор гэснээс “Хөөрхөн” дугуй, шардаг хуушуур мэндэлсэн түүх Томас Эдисоны улайсдаг гэрэл зохион бүтээсэнтэй төстэй. “Хөөрхөн” брэнд ганцхан мантуугаар зогсдоггүй л дээ. Бууз, банш, хэрчсэн гурил гээд төрөл, төрлөөрөө салаад явчихна. “Хөөрхөн” брэндийн хэрэглэгчид бүтээгдэхүүн авахаар ирэхдээ “Танайх хуушуур хийх хэрэгтэй. Цэвэр, сайн чанарын мах, ямар ч нэмэлт амтлагч, нөөшлөгч ороогүй хуушуур идмээр байна. Банш бууз бол танайхаас авдаг болохоор санаа зовдоггүй” гэдэг санал тавьснаар худалдаанд тэр бүр гардаггүй “Наадмын” дугуй хуушуур хийх оролдлого хийж эхэлжээ. “Гадуур байгаа хөлдүү хуушуурууд тосонд шарах болоход хэрэглэгчдийг түлж гэмтээх эрсдэлтэй байдаг.
Миний хийсэн оролдлогууд ч мөн ийм үр дүнд хүргээд байв. Маш олон оролдлого хийж шантрахгүй олон янзаар туршиж үзсээр л байлаа. Хүүхдүүд маань дэлгүүрээс нэг бол хөлдүү хуушуур авч өөрсдийгөө гэмтээчих гээд байдаг. Эсвэл удсан тосонд хайрсан бэлэн хуушуур авч идэж, гэдэс ходоодоо өвтгөх гээд болохгүй. Хэрэглэгчдийн хүсэл, миний хүүхдээ хамгаалах эрмэлзэл хоёр надад шантарч болохгүй гэдэг даалгавар өгсөн гэхэд болно” хэмээн хүүрнээд гал тогоо руу хүн явуулж “Хөөрхөн” хуушуур авчруулж идэж үзэх санал тавив. Саналаас яахан татгалзах билээ. Наадмын уур амьсгал ч орчихсон, дугуй хуушуурын эрэлт өдөр өдрөөр нэмэгдсээр хотын аль ч хэсэгт ширхэг нь 2500 болсон шүү дээ. С.Соёлмаагийн бизнес эрхлэгчдээс ялгарах нэг зан чанар нь надад маш их таалагддаг юм. Тэр хэзээ ч ашгийг эрхэмлэж, орлого хөөцөлддөггүй. Хамгийн эхэнд чанар гэдэг зарчимтай. Ердөө 10-аадхан хоногийн өмнө сүүлийн туршилтаа хийж дууссан бүтээгдэхүүнээ эхлээд эргэн тойрныхоо хүмүүст амсуулж тэрүүхэндээ тестлээд амжиж. Амсаж үзсэн болгон нь анхны хэрэглэгч болохоор шийдэж захиалгаа өгчээ.
С.Соёлмаа бид хоёрыг ярилцаж суух хооронд ширээн дээр “Soso foods” компанийн “Хөөрхөн” брэндийн бүтээгдэхүүнүүд өрөгдөж эхлэв. Миний хараагүй хоёр ч бүтээгдэхүүн байна. Тун удахгүй миний зоог болох “Хөөрхөн” хуушуураас гадна “Тортилла” гэх мексик гамбир хийсэн байна. Үүнийг хийсэн түүх ч бас дээрээс улбаатай гэнэ. “Хөөрхөн” хуушуурын сав баглаа боодлыг харахад л итгэл төрөхүйц байхаар бодож шийджээ. Зузаан тугалган цаасаар хийсэн бөөрөнхий саванд зургаан ширхгээр савлаж лацадсан нь нэг бүрийнх нь үнэ зах зээлийн ханшаас хамаагүй доогуур байх аж.
Брэндийн шаардлага хангах хамгийн эхний алхам, том сүлжээ дэлгүүрийн хяналт, шаардлагад нийцсэн байх юм билээ. Монголдоо л томд орох сүлжээ дэлгүүрүүд рүү санал тавьчихаад хариу хүлээж байгаа гэнэ.
Савласан хуушуурыг сонирхлоо барьж дийлэлгүй задалж үзмээр байгаагаа хэлж онгойлгуулав. Тугалган цаасаар хийсэн таг нь лац сайтай ч нэг их хүч оролгүй онгойх юм байна. Дотроо ширхэг болгоныг хүнсний халуунд тэсвэртэй цаасаар тусгаарлажээ. Энэ цаастай нь шарсан ч болно гэнэ. Цаастай нь шарна гэхээр жаахан гайхасхийн харвал С.Соёлмаа намайг ойлгов бололтой” Манай хуушуурыг уламжлалт аргаар шарахгүй. Хайруулын тавгаа халаагаад маш бага тос хийгээд яг л өндөг шиг хоёр талаас нь шарах юм. Тос үсрэхгүй. Нэг тосондоо олон удаа хайрахгүй гэх мэт олон талын ашигтай. Анхны хэрэглэгчид миний олж хараагүй сайн талуудыг нь олж хараад эхэлсэн байна билээ. Саяхан нэг хэрэглэгч бөөндөж авчихаад наадмаар ирсэн хүмүүст шарж өгөөд сууж байя, амар юм гэж байна. Нээрэн санадаг санаа. Яг наадам болохоор хуушуур олдохоо больдог талтай шүү” хэмээн өгүүлж байна. Түүний ийн ярихыг сонсоод “Наадмаар хуушуурын үнэ дийлдэхээ больдог нь ч үнэн шүү” хэмээн би дотроо тал өгөн бодож суув.
С.Соёлмаа хүүхэд байхдаа “Цагаан” гамбир хийж иддэг байсан тухайгаа хүүрнэж байна. Бидний тэр үед хийж иддэг байсан цагаан гамбир “Тортилла” гэдэг мексик гамбир байсан юм билээ. Гадуур зарагдаж байгаа “Тортилла”амархан хугардаг болохоор яг зориулалтаар нь шанз бэлтгээд хавчуулж идэх болоход үүргээ гүйцэтгэхгүй байна. Яаж энэ гурилыг хугарахгүй болгох вэ гэж нэлээд оролдсоны эцэст хэдэн удаа ч базсан хугарахгүй “Тортилла”-тай болсон гээд базаж үзүүлэв.
Нээрэн эргээд л тэнийж байгаа харагдана. Үнэхээр шантрахгүй хүн юм аа. С.Соёлмаа захиралтай “Soso foods” компанийн хамт олон ийм сонин, содон бүтээгдэхүүнтэй, амжилт бүтээлээр дүүрэн сууж байна.
Зурагчинд бүх л зүйл сонин байгаа бололтой зогсолтгүй зураг дарсаар ядарсан бололтой ирж явна, харьцгаая даа. Хуучны танил шиг болсон шилэн хаалгыг гаднаас нь зөөлхөн хаагаад гарав. Үйлдвэрийн чимээ хаалганы цаана үлдэж өмнөөс бороо үнэртсэн зөөлөн салхи сэвэлзэн тосвой.
Трамп Төмрөө
Эх сурвалж: Монголын үнэн сонин №025/24604/
Тод мэдээ
Хууль бусаар ашигт малтмал олборлох гэмт хэрэг үйлдэж байсныг таслан зогсоожээ
Цагдаагийн байгууллагаас энэ оны 11 дүгээр сард Хууль бусаар ашигт малтмал олборлох гэмт хэрэг үйлдэж байгаа этгээдүүдийн үйлдлийг таслан зогсоох, илрүүлэх зорилгоор хяналт, шалгалт зохион байгууллаа.
Сэлэнгэ аймгийн Ерөө, Мандал, Орхонтуул сумын нутаг дэвсгэрт хууль бусаар тусгай зөвшөөрөлгүй талбайд ашигт малтмал олборлож байсан гэмт хэргийн шинжтэй 6, зөрчлийн 2 үйлдлийг илрүүлэн ууланд нууж байрлуулсан экскаватор 20, ковш 3, Зил-131 маркийн тээврийн хэрэгсэл 3-ыг тус тус олж тогтоон уулнаас татан байршуулж, Сэлэнгэ аймгийн байгаль орчны газарт хүлээлгэн өгч гэмт хэрэг, зөрчлийн шинжтэй үйлдлүүдийг Цагдаагийн байгууллагын гомдол мэдээлэлд бүртгэн мөрдөн шалгах ажиллагааг явуулж байна.
Эрүүгийн хуулийн 24.2 дугаар зүйл 1-д Тусгай зөвшөөрөлгүйгээр ашигт малтмалын эрэл хайгуул, олборлолт, боловсруулалт, ашиглалт явуулсан, эсхүл ашигт малтмал олборлохоос өөр зориулалтаар хууль бусаар газрын хэвлийд халдсан бол 5.400.000-27.000.000 төгрөгөөр торгох, 1-5 жил хүртэл хугацаагаар хорих ял шийтгэнэ.
Иймд иргэн та хүрээлэн байгаа орчны эсрэг гэмт хэргийн талаар Цагдаагийн байгууллагын 102 болон 70191070 тусгай дугаарын утсанд мэдээлж, бидэнтэй хамтран ажиллана уу гэж Экологийн Цагдаагийн Албанаас мэдээллээ.
Тод мэдээ
Оюутолгойн асуудлаарх нотлох баримтыг шинжлэн судлах сонсголд 300 гэрч дууджээ
Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх хянан шалгах түр хороог 2025 оны долдугаар сарын 2-ны өдөр байгуулсан. Өнөөдрийг хүртэлх хугацаанд Хянан шалгах түр хороо 12 хуралдаж, Монгол Улсын Их Хурлын хяналт шалгалтын тухай хуульд заасны дагуу нотлох баримтыг шинжлэн судлах сонсголыг зохион байгуулахаар товлосныг тус Хянан шалгах түр хорооны дарга О.Батнайрамдал мэдээллийнхээ эхэнд дурдав.
Нотлох баримтыг шинжлэн судлах нээлттэй сонсголд 300 гэрчийг оролцуулахаар Хянан шалгах түр хороо шийдвэрлэсэн байна.
“Жавхлант” (MV-15225), "Шивээ толгой" (MV-15226) ашиглалтын тусгай зөвшөөрлийн талбайн нөөцийг тогтоож, үнэлгээг тодорхойлсон болон холбогдох бусад баримтад үндэслэн төрийн эзэмшлийн хувь, хэмжээг тогтоохтой холбогдуулан хяналт шалгалт хийх; "Оюу толгой" ХХК-ийн Хувь нийлүүлэгчдийн гэрээ /Нэмэлт, өөрчлөлт оруулж, дахин тодотгосон/-ний санхүүжилтийн хүүгийн хувь, түүнийг олон улсын зах зээлийн жишигт нийцүүлэн бууруулах талаар авч хэрэгжүүлсэн арга хэмжээ, холбогдох үр дагаврыг судлан хяналт шалгалт хийх, санал, дүгнэлт гаргах тусгай шалгалтын хүрээ хязгаар бүхий хянан шалгах түр хороо 2006 оноос хойш буюу 20 жилийн хугацаанд Оюу толгой төсөлтэй холбоотой асуудлаар ямар нэг шийдвэр гаргасан, ажлын хэсэгт ажилласан албан тушаалтан, холбогдох байгууллагуудын төлөөллийг гэрчээр дуудаж байгааг О.Батнайрамдал гишүүн мэдээлэлдээ онцоллоо. Сонсголын гэрчийн нэрсийн жагсаалтад Монгол Улсын Ерөнхийлөгчөөр ажиллаж байсан гурван хүн, Монгол Улсын Ерөнхий сайдаар ажиллаж байсан долоон хүн, Засгийн газрын гишүүнээр ажиллаж байсан 25 хүн, Улсын Их Хурлын гишүүнээр ажиллаж байсан 39 хүний нэрс багтсан байгааг тэрбээр танилцуулсан. Түүнчлэн Ашигт малтмал, газрын тосны газар, Аж үйлдвэр, эрдэс баялгийн яам, Байгаль орчны яам, Гадаад хэргийн яам, Гаалийн ерөнхий газар, Ерөнхийлөгчийн Тамгын газар, Сангийн яам, Татварын ерөнхий газар, Засгийн газрын Хэрэг эрхлэх газрын албан тушаалтнууд, “Рио Тинто” групп болон “Оюу толгой” ХХК-ийн ТУЗ-ийн төлөөлөл, холбогдох албан тушаалтнууд, “Эрдэнэс МГЛ” ХХК-ийн Төлөөлөн удирдах зөвлөлийн үе үеийн дарга, тус компанийн гүйцэтгэх захирлаар ажиллаж байсан хүмүүс багтсаныг О.Батнайрамдал гишүүн энэ үеэр мэдээллээ.
Тэрбээр, Улсын Их Хурлын хянан шалгах түр хорооны сонсгол нь хэн нэгнийг цоллох биш, тусгай шалгалтын хүрээнд хянан шалгах үйл ажиллагаа явуулж, нотлох баримтуудыг цуглуулан, судлан шинжилж, олон нийтийн мэдэх эрхийг хангах үйл ажиллагаа гэдгийг онцлоод сонсголд дуудагдаж буй гэрчүүдийг иргэдийн мэдэх эрхийг хүндэтгэн Хянан шалгах түр хорооны сонсголд идэвхтэй оролцохыг хүсэв.
“Оюу толгой” төслөөс Монголын ард түмэн нийт үр өгөөжийн 50-иас дээш хувийг хүртэх хүлээлттэй байсан хэдий ч өнгөрсөн хугацаанд 25 орчим хувийн үр ашиг хүртэж байгаа талаарх мэдээллийг П.Ганзориг гишүүн хэлээд “Төслийн үр өгөөжийг нэмэгдүүлэх чиглэлээр гаргаж байсан Улсын Их Хурлын үе үеийн шийдвэрүүд хэрэгжихгүй байгаа. Аль түвшиндээ, ямар шалтгаанаар хэрэгжилт нь хангагдахгүй байсныг Хянан шалгах түр хорооны хянан шалгагч, шинжээчид тогтоохоор 60000 гаруй хуудас материалыг судлан, шинжилж байна. Сонсголоор Монголын ард түмэнд бодитой мэдээллүүдийг хүргэж, шалтгаан нөхцөлийг тодруулж ажиллана” гэв. Нотлох баримтыг цуглуулах хүрээнд цуглуулсан 60000 гаруй хуудас баримтын тэн хагас нь “Онтрэ” ХХК-тай холбоотой, нууцын тамга бүхий баримтууд байгаа учраас шинжээчид, хянан шалгагч нар ажиллах хэдий ч олон нийтэд холбогдох мэдээллийг хүргэх боломжгүй, нотлох баримт болгон ашиглах боломжгүй болоод байгааг дурдсан. Иймд эдгээр баримтыг нууцын ангиллаас гаргуулах хүсэлтээ Засгийн газарт хүргүүлээд байгааг хэвлэлийн бага хурлын үеэр П.Ганзориг гишүүн мэдээлсэн.
Оюу толгой ордыг ашиглах хөрөнгө оруулалтын 30 жилийн хугацаатай гэрээг 2009 онд байгуулсан бөгөөд өдгөө 16 жил болж байгааг Б.Жаргалан гишүүн тэмдэглээд “Энэ цаг мөчид монголчууд энэхүү гэрээтэй холбоотой асуудлуудаар нэгдсэн ойлголтод хүрэх нь нийгэмд итгэлцэл бий болох ач холбогдолтой. Гэрээ хэрэгжсэн 16 жилийн хугацаанд ямар алдаа гарав, түүнээс ямар сургамж авсан гэдгээ дүгнэх цаг болсон гэж үзэж байгаа. Үүнээс суралцсан сайн туршлагаа дараа дараагийн гэрээнүүдэд тусгах, Монголын хөрөнгө оруулалтын орчныг сайжруулах, уул уурхайн салбараас Монголын талд ногдох өгөөжийг нэмэгдүүлэх чиглэлээр эрх зүйн орчныг сайжруулахад нөлөө үзүүлнэ гэж итгэж байна. Ийм ч учраас хянан шалгах түр хороо энэ хугацаатай давхцан байгуулагдаж, ажиллаж буйд их олзуурхаж байгаа” гэлээ. Үүний зэрэгцээ Монгол Улсын Ерөнхий сайдын захирамжаар байгуулагдсан Засгийн газрын ажлын хэсэг болон Рио Тинто группийн эрх бүхий ажлын хэсгийн “Оюутолгой” төслийн хувь нийлүүлэгчдийн зээлийн хүүгийн хувийн зохистой байдлыг хянан үзэх албан ёсны хэлэлцээтэй Улсын Их Хурлын хянан шалгах түр хорооны сонсгол давхцаж байгааг Б.Жаргалан гишүүн хэлсэн. Сонсголын нотлох баримтууд, холбогдох үйл явц нь гэрээний нөхцөлийг сайжруулах, Монголын талын хүртэх өгөөжийг зохих хувьд хүргэхэд эерэг үр нөлөө үзүүлэх боломжтой хэмээн үзэж байгаагаа дурдсан.
Б.Бат-Эрдэнэ гишүүн сонсголд гэрчээр оролцсон хүмүүсийг буруутгахгүй байхыг хүссэн. Гэрчээр оролцох хүмүүс нь тухайн үеийнхээ нөхцөл байдалд хийх ёстой ажлаа боломжийнхоо хэрээр гүйцэтгэж ажилласан гэдгийг ойлгож, дараа дараагийн Засгийн газар илүү сайжруулахад анхаарах шаардлагатай гэдгийг онцоллоо. Сонсголын дараа нотлох баримтаар цуглуулсан 60000 гаруй хуудас материалыг судалсан хянан шалгагч, шинжээчдийн дүгнэлтээр шаардлагатай хэсэг нь хууль хяналтын байгууллагад шилжих ёстой гэдэг байр суурийг Б.Бат-Эрдэнэ гишүүн хэлээд энэ гэрээ Монгол Улсад ашигтай, Монгол Улсын иргэн бүрд өгөөжтэй байх ёстой төсөл хэмээсэн.
Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх хянан шалгах түр хороо таван сар гаруй хугацаанд ажилласныг С.Зулпхар гишүүн тэмдэглэв. Энэ хугацаанд зохих үр дүнгүүд гарсан болохыг тэрбээр хэвлэлийн бага хурлын мэдээллийнхээ үеэр онцоллоо. Тухайлбал, гэрээний талаарх хэлэлцээ эхэлсэн бөгөөд үүнд Улсын Их Хурлын Хянан шалгах түр хорооны үйл ажиллагаа хөшүүрэг болж, нөлөө үзүүлсэн гэв. Хэлэлцээний дүнд зээлийн хүүг бууруулах, цаашлаад менежментийн зардлыг бууруулах боломжтой хэмээгээд “Эрх тэгш байх, харилцан ашигтай байх зарчмын хүрээнд асуудлыг шийдвэрлэх байр суурийг баримталж байна. Үүний зэрэгцээ “Онтрэ” ХХК-ийн асуудал хөндөгдөж байгаа. Тодорхойгүй энэ нөхцөл байдлын талаар Монгол Улсын Засгийн газар хэлэлцээрийн явцад тодорхой байр суурийг илэрхийлсэн, Улсын Их Хурлын хянан шалгах түр хороо адил. Стратегийн ач холбогдолтой орд, Монголын ард түмний баялаг учраас тусдаа хэлэлцээ хийж, эрх тэгш, харилцан ашигтай байх зарчимд нийцсэн тухайлсан гэрээ байгуулагдах ёстой” гэлээ. Үргэлжлүүлэн тэрбээр “Оюу толгой” төсөл нь Монгол Улс дахь хамгийн том төсөл, хөрөнгө оруулалт бөгөөд Монгол Улсын хууль тогтоомж, төрийн аливаа шийдвэрүүд хэрэгждэг байхыг чухалчилж буйгаа илэрхийлсэн хэмээн Улсын Их Хурлын Хэвлэл мэдээллийн газраас мэдээллээ.
Тод мэдээ
А.Ууганбаяр: Хүүхдийг зам тээврийн ослоос урьдчилан сэргийлэх “Шар дарцаг” аянд идэвхтэй оролцохыг уриалж байна
Нийслэлийн Засаг даргын Тамгын газраас санаачлан, нийслэлийн Боловсролын газар, нийслэлийн Цагдаагийн удирдах газар, Тээврийн цагдаагийн албатай хамтран “Шар дарцаг” аяныг тав дахь жилдээ зохион байгуулж байна.
Энэхүү аян нь замын хөдөлгөөнд оролцогчийн аюулгүй байдлыг хангах, хүүхдийг гэмт хэрэг, зөрчилд өртөхөөс урьдчилан сэргийлэх, хохирогч болох эрсдэлийг бууруулах, Замын хөдөлгөөний аюулгүй байдлын тухай хууль, дүрмийг сурталчлах, зөв дадал хэвшлийг төлөвшүүлэх зорилготой юм.
НЗДТГ-ын Хууль тогтоомж, гэрээ, эрх зүйн газрын ахлах мэргэжилтэн А.Ууганбаяр “Шар дарцаг” аяныг 11 дүгээр сарын 7-ны өдрөөс 12 дугаар сарын 7-ны өдрийг дуустал нэг сарын хугацаатай зарлаж байна. Анх гэрлэн дохиогүй явган хүний гарцан дээр шар дарцаг байрлуулж, замын хөдөлгөөнд оролцогчдын аюулгүй байдлыг хангах зорилгоор аяныг санаачилж байсан. Гэвч шар дарцгуудыг авч явах, алга болох тохиолдол их байсан тул энэ жилээс сургууль орчмын бүсэд School police хийж буй эцэг, эхчүүд барьж ашиглаж байна. Мөн ААН-үүд байгууллагынхаа логог дарцган дээр хэвлэн, ойр орчмын гэрлэн дохиогүй гарцан дээр ашиглах боломжтой. School police хийж буй эцэг, эхчүүд авто замын гол хүртэл явган зорчигчтой хамт явж, хөдөлгөөн бүрэн зогсох хүртэл шар дарцгийг өргөнө” гэлээ.
Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн, цагдаагийн хошууч Г.Отгонтамир “Нийслэлийн Засаг даргын Тамгын газраас санаачлан “Шар дарцаг” аяныг жил бүр зохион байгуулдаг. Энэхүү аян нь сургууль орчимд хүүхдийн аюулгүй байдлыг хангах, School police хийж буй эцэг, эхчүүдэд туслах зорилготой. Шөнийн цагаар жолооч нарт явган зорчигч харагдахгүй, гэрлийн гялбаанд орж осол гарах тохиолдол байдаг. Улсын хэмжээнд гарч буй ослын 60-70 хувь нь нийслэл хотод бүртгэгддэг. Хүүхэд гарц, гарамтай хэсгээр гарч байхад нь жолооч мөргөж гэмтээх тохиолдол нэлээдгүй гардаг. Иймээс сургууль орчимд гэлтгүй хороолол, хотхон, ААН байгууллагууд ч шар дарцаг ашиглах боломжтой. Шар дарцгийн цацруулагч нь жолоочид 150–200 метрийн цаанаас тодорч харагддаг. Мөн замын хөдөлгөөнд оролцож буй жолооч уулзвар, гарц руу дөхөхөд хурдаа сааруулах, хүүхэд багачууд, эцэг эхчүүд шар дарцаг өргөж ашиглахыг ТЦА-аас уриалж байна” гэв.
Нийслэлийн Боловсролын газрын Бодлогын хэрэгжилтийн хэлтсийн дарга Б.Болормаа “Нийслэлийн хэмжээнд 971 боловсролын байгууллагад 536 мянган хүүхэд, багачууд суралцаж байна. Энэхүү аяныг зохион байгуулснаар хүүхдүүдийг болзошгүй зам тээврийн ослоос урьдчилан хамгаалах боломж бүрддэг. Нийслэлийн боловсролын газар энэхүү төрлийн аянуудыг дэмжиж, хамтран зохион байгуулдаг. “Шар дарцаг” аяны хүрээнд сүүлийн дөрвөн жилийн хугацаанд 2000 гаруй эцэг, эх сургуулийн орчинд ажилласан. Судалгаагаар хүүхэд өртсөн зам тээврийн осолд 7 хүртэлх насны хүүхэд 19.7 хувь, 8–14 насны хүүхэд 28.5 хувь, 14–17 насны хүүхэд 14 хувийг эзэлж байна. Зам тээврийн осол Баасан гарагт хамгийн их буюу 82 удаа бүртгэгдсэн байна. Явган зорчигчийн хайхрамжгүй үйлдэл, эцэг эх, асран хамгаалагчийн хараа хяналт сул, жолооч нарын сахилга бат сул зэргээс зам тээврийн осол гардаг. Иймд хүүхдийг зам тээврийн ослоос урьдчилан сэргийлэх, зөв дадал хэвшил төлөвшүүлэхэд эцэг эх, асран хамгаалагч, иргэд, төрийн болон төрийн бус байгууллагын оролцоо, хариуцлага, хамтын ажиллагаа чухал юм. Тиймээс эцэг эх, асран хамгаалагч, жолооч болон аж ахуйн нэгж байгууллага, иргэд энэхүү аянд идэвхтэй оролцож, үлгэр дуурайлал үзүүлэхийг уриалж байна” гэсэн юм.
Зам тээврийн осол, зөрчлөөс урьдчилан сэргийлэх “Шар дарцаг” аянд идэвх, санаачилга гарган оролцсон иргэн, ААН байгууллагыг нийслэлийн Гэмт хэргээс урьдчилан сэргийлэх салбар зөвлөл болон НЗДТГ-ын газраас урамшуулах аж.
-
Өнөөдөр2021/07/19
Үс шинээр үргээлгэх буюу засуулбал эрч, хүч нэмнэ
-
Өнөөдөр2022/04/01
Үс шинээр үргээлгэх буюу засуулахад тохиромжгүй
-
Тод мэдээ2023/07/03
Гангийн үйлдвэр байгуулах чиглэлд БНХАУ-ын Жөжян мужийн Нинбо хоттой хамтран ажи...
-
Өнөөдөр2020/05/06
Европын холбооны Элчин сайд нарыг хүлээн авч уулзав