Сонгуулийн ерөнхий хороонд Ардчилсан нам, Монголын Уламжлалын Нэгдсэн нам, Монголын Социал Демократ нам, Монголын хүний төлөө нам, МИДАС төрийн бус байгууллага хамтран  шаардлага ирүүлэв.

Нэг хүн нэг санал өгөх зарчмыг хангах, хурууны хээ давхцахаас сэргийлэх, сонгогчдын нэрийн жагсаалтыг онлайн болгох, санал авахад иргэний үнэмлэх шалгах, сонгогчдын нэрийн жагсаалт, бүртгэлийг шалгах, тулгах чиглэлээр намуудын төлөөллөөс бүрдсэн ажлын хэсэг байгуулах зэрэг шаардлагыг Ардчилсан намын дэд дарга Ж.Баярмаа танилцуулсан юм. Түүнчлэн хяналтын тооллогыг дэлгэцээр гаргах, видео бичлэг хийх эрх олгох, санал тоолох төхөөрөмжийн үйлдлийн систем болон программ хангамжийг мэргэжлийн хөндлөнгийн байгууллагаар баталгаажуулах, сонгогчдын боловсролыг дээшлүүлэх зэрэг шаардлага хүргүүлж байгаагаа мэдээллээ.

Сонгууль зохион байгуулах үйл ажиллагааны ил тод, нээлттэй байдлыг хангах зорилгоор нам, эвсэл, нэр дэвшигч, иргэд, ажиглагчдын оролцоог бүрэн хангаж ажиллана гэдгийг Сонгуулийн ерөнхий хорооны Тамгын газрын дарга Д.Бат-Эрдэнэ шаардлагыг хүлээн авахдаа танилцуулав. Сонгуулийн ерөнхий хороо нь шударга сонгуулийн төлөө нам, эвсэл, иргэд, төрийн болон төрийн бус аль ч байгууллагатай хамтран ажиллахад хэзээд бэлэн гэдгээ илэрхийлээд хууль бус үйл ажиллагаа, үйлдэл байгаа бол гагцхүү баримттай, бодитой мэдээлэл ирүүлэхийг хүслээ. Сонгуулийн автоматжуулсан системийг туршиж, баталгаажуулахад хяналт тавьж, нягтлан шалгах хүсэлтийг ээлжит сонгуульд оролцож байгаа бүх нам, эвсэлд хүргүүлсэн. Шалгаж, хянаж, баталгаажуулахад хамтран ажиллаж, эргэлзээг мухарлах боломжийг хангаснаар сонгогчдод үнэн зөв бодит мэдээлэл өгөх боломж бүрдэх юм гэдгийг онцлов.

Хуульд заасны дагуу давхардал, зөрчил байгаа эсэхийг нягтлан шалгуулах зорилгоор нийт сонгогчдын нэрийн жагсаалтыг сонгуульд оролцож буй улс төрийн нам, эвсэлд хоёр удаа хүргүүлэхээс гадна шаардлагад дурдсан сонгогчдын нэрийн жагсаалтын нэгдсэн санг ажиллуулах талаар Монгол Улсын Их Хурлын сонгуулийн тухай хуульд тодорхой зохицуулалтыг нэмэлт, өөрчлөлтөөр оруулж баталсан гэдгийг онцолсон. Өөрөөр хэлбэл, шаардлагад дурдагдсан нэг хүн нэг л удаа санал өгөх нь хуульд заасан сонгогчдын нэгдсэн сангийн тухай ойлголтод хамаарч байгааг тайлбарлав. Гадаад улсад байгаа иргэдээс авсан саналыг тоолох үйл ажиллагаа бүрэн нээлттэй, бөгөөд уг үйл ажиллагаанд нам, эвслийн ажиглагчид нээлттэй оролцоно. Мөн энэ удаагийн сонгуулиар хяналтын тооллогыг бүх хэсэгт 100 хувь зохион байгуулах бөгөөд гар аргаар тоолох үйл ажиллагаа нь хяналтын камерын дор зохион байгуулагдана, үүнд нам эвслийн ажиглагчдаас гадна хэвлэл мэдээллийн байгууллага иргэд нээлттэйг оролцох, хяналт тавих бүрэн боломжтойг танилцуулсан юм.

Сонгуулийн ерөнхий хороо сонгуульд оролцож талуудын шаардлагыг нээлттэй хүлээн авч, сонгогчдыг эргэлзүүлсэн, төөрөлдүүлсэн, худал мэдээллийг мухарлаж, сонгогчдод үнэн зөв, бодит мэдээлэл өгч нээлттэй ажиллана. Гагцхүү эх сурвалжаа нягталж шалгасан, бодитой мэдээлэл гомдол ирүүлж байхыг хүслээ гэж Сонгуулийн ерөнхий хорооноос мэдээллээ.

Өнгөрсөн долоо хоногт нийслэлийн 7 дүүрэг, 20 аймгийн 57 суманд аюулт үзэгдэл, ослын 125 удаагийн дуудлага бүртгэгдсэн байна.

Дуудлагын дагуу төв, орон нутгийн Онцгой байдлын байгууллагын алба хаагчид үүрэг гүйцэтгэж, 9 иргэний амь насыг авран хамгааллаа. 

Харин гамшиг, аюулт үзэгдлийн улмаас 8 хүн нас барж, 7 хүн гэмтэж бэртсэн байна.

Нийт дуудлагын 101 нь гал түймэр, 17 нь хүний үйл ажиллагаатай холбоотой осол, 5 нь геологийн гаралтай аюулт үзэгдэл, нэг нь ус цаг уурын гаралтай аюулт үзэгдэл, нэг нь биологийн гаралтай аюулт үзэгдэл байна гэж ОБЕГ-аас мэдээллээ. 

Зам, тээврийн хөгжлийн яамны Төрийн нарийн бичгийн дарга С.Батболд Дэлхийн банкны төлөөлөгчидтэй уулзаж, “Монгол Улсын тээврийн холболт болон логистикийг сайжруулах төсөл”-ийн хэрэгжилтийн явцын талаар санал солилцлоо.

Зам, тээврийн хөгжлийн сайд С.Бямбацогт Монгол Улсын тээврийн холболт, логистикийг сайжруулах төслийн зээлийн хэлэлцээрийг өнгөрсөн 2023 онд УИХ-аар батлуулсан.

Энэ хүрээнд Дэлхийн банкны санхүүжилтээр 361 км авто зам, найман байршилд 1205 у/метр гүүрэнд их засвар хийхээр болсон.

Монгол Улсад барилгын ажил гүйцэтгэх боломжтой хугацаа маш богино учраас төслийн бэлтгэл ажлыг хангаж, зөвлөх, гүйцэтгэгчийг сонгон шалгаруулах, зураг төсөл боловсруулах ажлыг шуурхай зохион байгуулахаар ажиллаж байна.

Улаанбаатар-Арвайхээр, Улаанбаатар-Өндөрхаан, Хархорин-Цэцэрлэг, Булган-Мөрөн, Цэцэрлэг-Тосонцэнгэл, Арвайхээр-Баянхонгор, Өндөрхаан-Чойбалсан чиглэлийн хамгийн их эвдрэлтэй замд их засвар хийх тул төслийн үр ашиг нэн чухал ач холбогдолтой тул хэрэгжилтэд Зам, тээврийн хөгжлийн яамны зүгээс онцгойлон анхаарч байгааг Төрийн нарийн бичгийн дарга С.Батболд хэллээ.

Ташрамд дурдахад, Дэлхийн банкны хөрөнгө оруулалтаар 1996-2002 онд “Тээврийг сэргээх төсөл”, “Тээврийг хөгжүүлэх төсөл” хэрэгжсэн. Тус төслүүд нь Монгол Улсын авто замын сүлжээг хөгжүүлэхэд чухал дэмжлэг болсон байдаг.

Тухайлбал, баруун аймаг чиглэлийн хамгийн их бартаа, саадтай, өндөр даваа, намагтай хэсгийг сонгож хайрган хучилттай зам, мөн Улаанбаатар-Арвайхээр чиглэлийн 200 км авто замыг хатуу хучилттай замыг барьсан гэж Зам, тээврийн хөгжлийн яамнаас мэдээллээ.