Дэлхий нийтээр..
Нийслэлийн шилдгүүдийг шалгарууллаа
НЗДТГ, Нийслэлийн Гэр бүл, хүүхэд, залуучуудын хөгжлийн газраас Нийслэлийн шилдгүүдийг шалгаруулах арга хэмжээг өнөөдөр зохион байгуулж, “Нийслэлийн шилдэг хүүхэд”, “Шилдэг залуу”, Залуучуудын хөгжлийг дэмжигч ээлтэй байгууллага”, “Хүүхэд, гэр бүлд ээлтэй байгууллага”, “Шилдэг эцэг, эхийн зөвлөл”-ийг шалгаруулав. Ёслолд НЗДТГ-ын Нийгмийн бодлогын хэлтсийн дарга И.Баатархүү, Нийслэлийн Гэр бүл, хүүхэд, залуучуудын хөгжлийн газрын дарга Ө.Ган-Өлзий, тус газрын Хүүхдийн хөгжил, хамгааллын хэлтсийн дарга Н.Хөхөө болон холбогдох албаныхан оролцож, шагнал гардууллаа.
Энэ жил “Ковид-19” цар тахлын үед өөрийн мэдлэг, авьяас чадвар, хичээл зүтгэлээрээ бүтээлч шинэлэг санаачилга өрнүүлэн, урлаг, спортын төрлөөр анги хамт олноо манлайлан суралцаж байгаа хүүхдүүдийг “Нийслэлийн шилдэг хүүхэд”-ээр шалгаруулжээ. Мөн Залуучуудын хөгжлийг дэмжих тухай хуулийн “Залуучуудын хөгжлийг хангахад дэмжлэг үзүүлж, амжилт гаргасан хуулийн этгээдийг алдаршуулах, шагнаж, урамшуулах” заалтыг үндэслэн “Нийслэлийн шилдэг залуу”, “Залуучуудын хөгжлийг дэмжигч ээлтэй байгууллага”-ыг шалгаруулан, шагнав.
Энэ үеэр Нийслэлийн Гэр бүл, хүүхэд, залуучуудын хөгжлийн газрын Хүүхдийн хөгжил, хамгааллын хэлтсийн дарга Н.Хөхөө “Нийслэлийн есөн дүүргийн Гэр бүл, хүүхэд залуучуудын хөгжлийн хэлтсээр дамжуулан аж ахуйн нэгж байгууллага, оюутан залуус, хүүхэд, сургуулиудын дунд шилдгүүдийг шалгаруулах шалгуур үзүүлэлтийг бид оны эхэнд зарладаг. Ажлын хэсэг гарч дүүргийн хэмжээнд байгаа аж ахуйн нэгж байгууллага, хүүхэд залуучуудынхаа материалыг хүлээн авч, шалгаруулалтыг хийдэг. Цар тахлын үед нийгэмд эерэг өөрчлөлт гаргасан, санал, санаачилгаараа бусдыг уриалсан, олон хүний амьдралд тус дэм үзүүлсэн хүүхэд, залуусыг шалгарууллаа” хэмээв.
НЗДТГ-ын Нийгмийн бодлогын хэлтсийн дарга И.Баатархүү “Цар тахалтай байсан хэдий ч хүүхэд, залуус хөгжих, хөгжлийн оролцоог хангах, бусдыг уриалах ажлууд их хийсэн. Энэ хүнд цаг үед бусдад сайн сайхныг хүргэсэн олон шалгуураар хүүхэд, залуусын төлөөлөл тодорлоо. Тэднээс гадна маш олон хүн нийгмийнхээ, Улаанбаатар хотынхоо хөгжлийн төлөө гар бие оролцон явж байгаа. Тэдгээрийн төлөөлөл өнөөдөр шалгарлаа” гэлээ.
Нийслэлийн шилдэг хүүхдээр:
- “Нийслэлийн шилдгийн шилдэг хүүхэд”- Мөнгөнцоожийн Бэхбат /Багануур дүүргийн “Боловсрол” цогцолбор сургуулийн 10-1 анги/
- “Нийслэлийн шилдгийн шилдэг хүүхэд”- Отгонбаярын Нандин /Монгол улсын Консерваторын Ерөнхий боловсролын сургуулийн 7а анги/
- “Нийслэлийн шилдгийн шилдэг хүүхэд”- Энхтөрийн Эрхэс /”Орчлон” сургуулийн 8в анги/
- “Нийслэлийн шилдэг хүүхэд”- Ганхөлөгийн Цасанболор /Багахангай дүүргийн Хангай цогцолбор сургууль, 12а анги/
- “Нийслэлийн шилдэг хүүхэд”- Баярсайханы Энхжин /Налайх дүүргийн лаборатори 119 дүгээр сургуулийн 12-3 бүлэг/
- “Нийслэлийн шилдэг хүүхэд”-Эрхбатын Эрххулан /Нийслэлийн 51 дүгээр сургуулийн 12б анги/
- “Нийслэлийн шилдэг хүүхэд”- Ням-Очирын Бадармаа /Нийслэлийн лаборатори 23 дугаар сургууль, 11а анги/
- “Нийслэлийн шилдэг хүүхэд”- Эрдэнэцогтын Өдөр /”Бритиш” сургууль, 9у бүлэг/
- “Нийслэлийн шилдэг хүүхэд”-Заминдийн Мөнх-Эрдэнэ /Нийслэлийн лаборатори 151 дүгээр сургууль, 5а анги/-ийн сурагчид тус тус тодорлоо.
“Шилдэг залуу”-д есөн залуу шалгарлаа. Үүнд:
- “Хотын соёлыг түгээгч залуу”- Л.Лхагважаргал
- “Спортын түүчээ залуу”- Б.Бат-Оргил
- “Уран бүтээлч залуу”- Г.Алтандуулга
- “Инновац-шинийг санаачлагч залуу”- Т.Мөнхбаяр
- “Хүмүүнлэгийн үйлстэн залуу” – Б.Бадамцэцэг
- “Ногоон хөгжлийг дэмжигч залуу”- Я.Энхбаатар
- “Интрепенер залуу”- Ж.Ганхуяг
- “Нийгмийн салбарын манлайлагч залуу” – Н.Булгантамир
- “Төрийн албан хаагч залуу”- Х.Алтаншагай нар шалгарав.
“Залуучуудын хөгжлийг дэмжигч ээлтэй байгууллага”-аар дараах байгууллагууд шалгарав.
- “Мөнххада” ХХК
- Дэлхийн монголчуудын- MGLRADIO 88.3
- Монголын Бодибилдинг фитнесийн холбоо ТББ
- Медальд хүрэх зам ХХК
- Монгол Контент ХХК mn
“Хүүхэд, гэр бүлд ээлтэй байгууллага”-аар:
- Хүүхэд, гэр бүлд ээлтэй дүүрэг – Баянгол дүүрэг
- Хүүхэд, гэр бүлд ээлтэй хороо – Сүхбаатар дүүрэг, 16 дугаар хороо
- Хүүхэд, гэр бүлд ээлтэй сургууль – Баянзүрх дүүргийн 120-р сургууль
- Хүүхэд, гэр бүлд ээлтэй цэцэрлэг – Баянгол дүүргийн 262-р цэцэрлэг
- Хүүхэд, гэр бүлд ээлтэй цэцэрлэг – Чингэлтэй дүүргийн 43-р цэцэрлэг
- Хүүхэд, гэр бүлд ээлтэй цэцэрлэг – Баянгол дүүргийн 11-р цэцэрлэг
- Хүүхэд, гэр бүлд ээлтэй төрийн бус байгууллага – Good Neighbors /Гүү Нэйборс/
- Хүүхэд, гэр бүлд ээлтэй аж ахуйн нэгж байгууллага – Хан-Уул дүүргийн И-Март худалдааны төв
- Хүүхэд, гэр бүлд ээлтэй банк санхүүгийн байгууллага – Багануур дүүргийн Хаан банк салбар шалгарав.
“Шилдэг эцэг эхийн зөвлөл”-д:
- Нэгдүгээр байрт Чингэлтэй дүүрэг 9-р цэцэрлэг
- Хоёрдугаар байрт Хан-Уул дүүрэг 114-р сургууль
- Гуравдугаар байрт Сонгинохайрхан дүүрэг 104-р цэцэрлэг шалгарлаа.
- Тусгай байрт Чингэлтэй дүүргийн 173-р цэцэрлэг, Налайх дүүргийн Эрдмийн цогцолбор сургууль тус тус шалгарлаа.
Дэлхий нийтээр..
Европын хэд хэдэн улсад Палестиныг дэмжсэн жагсаал боллоо
Жагсагчид Их Британийг Израильд зэвсэг нийлүүлэхээ зогсоохыг шаардсан, Палестиныг чөлөөлөхийг уриалсан, Газын зурвас дахь цэргийн ажиллагааг зогсоохыг шаардсан олон төрлийн уриа лоозон барьсан юм. Мөн олон жагсагч эгнэн зогсож, Газын зурвас дахь мөргөлдөөний үеэр амь үрэгдсэн хүмүүсийн нэрсийг цээжиндээ зүүсэн юм. Тэд ийм аргаар дайны харгис хэрцгий байдлыг олон нийтэд илүү тодорхой ойлгуулахыг зорьж байна.
Дэлхий нийтээр..
Балбын үер, нурангийн улмаас амиа алдсан хүний тоо 1451-д хүрчээ
Балбын хойд хэсэгт өнгөрсөн сард болсон гамшгийн улмаас амиа алдсан хүний тоо 1451-д хүрснийг тус улсын цагдаагийн байгууллага мэдээлжээ. Есдүгээр сарын 20-ны 17:00 цагийн байдлаар аврах, эрэн хайх ажиллагаа үргэлжилж, 6000 орчим хүн сураггүй хэвээр байна.
Гамшиг наймдугаар сарын 26-нд Балба, Хятадын Төвөдийн хил орчмын өндөр уулын бүсэд мөсөн гол, хад чулуулгийн их хэмжээний нуранги үүссэнээс эхэлжээ. Нурангиас үүссэн лаг шавар, мөс, чулуулгийн урсгал Бхоте Коши болон Тришули голын сав дагуу бараг 100 км үргэлжилж, суурин газар, зам, гүүр, усан цахилгаан станцуудыг сүйтгэсэн байна.
АНУ-ын Геологийн албаны урьдчилсан дүгнэлтээр энэ үйл явдал нь ердийн газар хөдлөлт бус, мөсөн гол оролцсон уулын хажуугийн асар их нуралтаас эхэлсэн бөгөөд үүний дараа хүчтэй үер, хурдас чулуулгийн урсгал үүсчээ.
Олон мянган хүн сураггүй хэвээр байгаа тул эрэн хайх, цогцос таних ажиллагаа үргэлжилж байна. Эрх баригчид танигдаагүй цогцоснуудын ДНХ-ийн дээжийг авч, ар гэрийнхний сорьцтой тулган тогтоох ажлыг явуулж байгаа юм.
Дэлхий нийтээр..
Герман нисэх буудлын дроны хэрэгт Оросыг буруутгав
Германы эрх баригчид өнгөрсөн наймдугаар сард Лейпциг-Халле нисэх буудлаас тэсрэх бодис бүхий дрон илэрсэн хэрэгт Оросын тал холбоотой гэж дүгнэжээ. Харин Москва уг мэдээллийг няцааж, Германы буруутгалыг үндэслэлгүй хэмээн мэдэгдсэн байна.
Наймдугаар сарын 4-ний орой Украины “Антонов Эйрлайнс” компанийн ачааны онгоц байрлаж байсан хэсгийн ойролцоо тэсрэх бодис тээсэн дрон илэрч, нисэх буудлын үйл ажиллагааг түр хугацаанд зогсоожээ. Тэсрэх бодисыг тусгай робот ашиглан аюулгүй болгосон бол өөр нэг дрон нисэх онгоцтой мөргөлдсөний дараа устсан гэх мэдээлэл байна.
Германы Дотоод хэргийн сайд Александер Добриндтын мэдээлснээр, мөрдөн шалгалтаар дроны хийц, ашигласан эд анги нь Орос-Украины дайнд хэрэглэгдэж буй зарим төхөөрөмжтэй ижил төстэй байсныг тогтоосон байна. Тэрбээр цагдаагийн мөрдөн шалгалт болон тагнуулын байгууллагын мэдээлэл Оросын оролцоог нотолж байна гэж мэдэгджээ. Гэхдээ Германы Засгийн газар Москваг уг хэрэгтэй шууд холбосон бүх нотлох баримтаа олон нийтэд дэлгээгүй байна.
Үүний дараа Герман Бонн хот дахь Оросын консулын газрыг есдүгээр сарын 18-наас хаах, Берлин дэх Оросын соёлын төвийн үйл ажиллагааг зогсоохоор шийдвэрлэжээ. Мөн ОХУ-ын Элчин сайдыг Гадаад хэргийн яамандаа дуудан тайлбар шаардсан бөгөөд Европын холбооны хориг арга хэмжээний жагсаалтыг өргөжүүлэх санал гаргахаар болсон байна.
ОХУ-ын Берлин дэх Элчин сайдын яам Германы буруутгалыг “утгагүй” гэж няцаасан байна. ОХУ-ын Ерөнхийлөгч Владимир Путин мөн Германы Засгийн газар дотоодын улс төрийн асуудлаасаа анхаарал сарниулахын тулд Москваг буруутгаж байна хэмээн мэдэгджээ.
Польш, Их Британи, Итали, Швед, Чех зэрэг НАТО-гийн хэд хэдэн улс Германы байр суурийг дэмжсэн бол Европын холбоо уг асуудлаар нэгдсэн хариу арга хэмжээ хэлэлцэхээр төлөвлөж байна.
-
Дэлхий нийтээр..2025/04/15
Монгол, Хятадын Парламент хоорондын Байнгын уулзалтын механизмын VI уулзалт болл...
-
Хэн юу хэлэв...2019/10/21
Эрүүгийн хуулийн өөрчлөлт буюу эрхийн "балайрал" хууль тогтоогчид
-
Үйл явдал2025/04/08
Улаанбаатарт өдөртөө 15 хэм дулаан
-
Дэлхий нийтээр..2025/01/29
“Шинэ хоршоо” хөдөлгөөн хэрэгжиж эхэлснээс хойш 700 тэрбум төгрөгийн зээл ол...