Тод мэдээ

Албан татварын хувь хэмжээний талаарх тогтоолын төсөлд санал авч байна..

Огноо:

3 жил 5 сар.өмнө

2020/12/11

Сэтгүүлч:

Тодотгол

Монгол Улсын Их Хурлаас 2019 оны 03 дугаар сарын 22-ны өдөр шинэчлэн батлагдсан Хувь хүний орлогын албан татварын тухай хууль 2020 оны 01 дүгээр сарын 01-ний өдрөөс хүчин төгөлдөр үйлчилж байна. Тус хуулийн 21 дүгээр зүйлд заасны хүрээнд хуулиар олгогдсон эрх хэмжээний дагуу аймгийн иргэдийн Төлөөлөгчдийн Хурлаас Өмнөговь аймгийн нутаг дэвсгэрт мөрдөгдөх бичил худалдаа, ажил, үйлчилгээний орлогын сард төлөх албан татварын хувь хэмжээг тогтоосон шийдвэр гаргахаар төлөвлөн ажиллаж байна.

Аймгийн иргэдийн Төлөөлөгчдийн Хурлаас бичил худалдаа, ажил, үйлчилгээний орлогоос сард төлөх татварын хэмжээ тогтоосон шийдвэр нь захиргааны хэм хэмжээний акт болохын хувьд Захиргааны ерөнхий хуулийн 62 дугаар зүйлийн 62.1 дэх хэсэгт “Захиргааны хэм хэмжээний актын төслийг тухайн захиргааны байгууллагын цахим хуудас болон мэдээллийн самбарт 30-аас доошгүй хоногийн хугацаанд байрлуулж санал авна” гэсний дагуу цахим хуудсаар дамжуулан санал авах ажиллагааг зохион байгуулж байна.

Иймд тогтоолын төсөлтэй танилцаж, бичил худалдаа, ажил, үйлчилгээний орлогоос сард төлөх албан татварын хувь хэмжээний талаарх саналаа комент хэсэгт болон аймгийн Засаг даргын Тамгын газрын Хууль, эрх зүйн хэлтсийн 70532120 дугаарын утсанд ирүүлнэ үү.

ТОГТООЛЫН ТӨСӨЛ

ӨМНӨГОВЬ АЙМГИЙН ИРГЭДИЙН ТӨЛӨӨЛӨГЧДИЙН

ХУРЛЫН ТОГТООЛ

2020 оны ... сарын … өдөр Дугаар ….

Бичил худалдаа, ажил, үйлчилгээний

орлогын албан татварын хувь, хэмжээ

тогтоох тухай

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 18 дугаар зүйлийн 18.1.2 “д”, 19 дүгээр зүйлийн 19.1, 25 дугаар зүйлийн 25.1, Хувь хүний орлогын албан татварын тухай хуулийн 21 дүгээр зүйлийн 21.4, Захиргааны ерөнхий хуулийн 64 дүгээр зүйлийн 64.1 дэх заалт, Хувь хүний орлогын албан татварын тухай хуулийн 21 дүгээр зүйлийн 21.4 дэх заалтуудыг тус тус үндэслэн аймгийн Иргэдийн Төлөөлөгчдийн Хурлын хуралдаанаас ТОГТООХ НЬ:

1. Аймгийн нутаг дэвсгэрт мөрдөгдөх бичил худалдаа, ажил, үйлчилгээний орлогын сард төлөх албан татварын хувь хэмжээг дор дурьдсанаар тогтоосугай.

1.1. Ажлын байр, лангуу зэрэг тодорхой байршилд байрлахгүй ил задгай худалдаа, үйлчилгээ эрхэлж байгаа хувь хүний сард төлөх албан татварын хувь хэмжээг хөдөлмөрийн хөлсний доод хэмжээний 2 хувиар

1.2. Хувиараа зорчигч, эсвэл ачаа тээврийн үйлчилгээ эрхэлж байгаа хувь хүний сард төлөх албан татварыг дараах хувь хэмжээгээр тус тус тогтоосугай.

1.2.1. Хувиараа зорчигч тээврийн болон жижиг оврын ачааны машин /5 тонн хүртэл/ үйл ажиллагаа явуулж буй хувь хүний албан татварыг хөдөлмөрийн хөлсний доод хэмжээний 5 хувиар

1.2.2. Ачаа тээврийн үйлчилгээ эрхэлж байгаа /5-10 тонн бол/ хувь хүний албан татварыг хөдөлмөрийн хөлсний доод хэмжээний 7 хувиар

1.2.3. Ачаа тээврийн үйлчилгээ эрхэлж байгаа /10 тонн дээш бол/ хувь хүний татварыг хөдөлмөрийн хөлсний доод хэмжээний 15 хувиар тус тус тогтоосугай.

2. Бичил худалдаа, ажил, үйлчилгээний орлогын албан татварыг тогтоосон хувиар ногдуулж, хураан авч төсөв төвлөрүүлэх ажлыг зохион байгуулж, хяналт тавьж ажиллахыг аймгийн Засаг дарга /Р.Сэддорж/-д даалгасугай.

ХУРЛЫН ДАРГА Б.БАДРАА

Эх сурвалж:Өмнөговь аймаг

Дараах мэдээ

Их аварга М.Ананд Япон улсын иргэншилтэй болжээ

Өмнөх мэдээ

Эрчим хүчний сайдын зөвлөл хуралдлаа

Дэлгэрэнгүй унших

Тод мэдээ

Богдхан уулын ойн сангийн 3000 га талбайд хөнөөлт шавжтай тэмцэнэ

Огноо:

6 цаг 15 минут

2024/05/06

2024 онд Богдхан уулын дархан цаазат газрын ойн сангийн 3000 га-д ойн хөнөөлт, хортон шавжтай тэмцэх ажил хийнэ.

Монгол Улсад хэрэгжиж буй “Эрүүл ой” төслийн хүрээнд Монгол Улсад газраар ойн хөнөөлт шавж, өвчинтэй тэмцэж байгаа арга технологитой газар дээр нь танилцах, гадаадын эрдэмтдээс туршлага судлах сургалтад МУИС-ийн судлаачид, ЗГХА Ойн газар, Богдхан уулын дархан цаазат газрын хамгаалалтын захиргаа, “Ойн хөнөөлт шавжтай тэмцэх үйл ажиллагаа эрхлэгчдийн холбоо” зэрэг байгууллагууд хамтран оролцлоо.

Америк, Канад улсаас ирсэн эрдэмтэд Монгол орон хөнөөлт шавжтай тэмцэхдээ дэвшилтэт технологи ашиглаж байгааг онцоллоо. Цаашид Монгол орны ойн эрүүл байдлыг хамгаалах, хадгалах талаар зөвлөмж боловсруулж хүргүүлнэ.

2024 онд Богдхан уулын ойн сангийн 3000 га талбайд хөнөөлт шавжтай онгоцоор тэмцлийн ажил хийхээр төлөвлөөд байна гэж Богдхан уулын дархан цаазат газрын Хамгаалалтын захиргаанаас мэдээллээ.

Дэлгэрэнгүй унших

Тод мэдээ

Нийтийн тээврийн 3 чиглэлд өөрчлөлт орууллаа

Огноо:

6 цаг 18 минут

2024/05/06

Нийслэлийн авто зам өргөтгөл шинэчлэлтийн ажил хийж байгаатай холбоотойгоор Баянзүрх дүүргийн 25-р хороо Соёолжийн нүхэн гарцаас Нарантуул олон улсын худалдааны төвийн уулзвар хүртэлх авто замыг 2024 оны тавдугаар сарын 6-ны өдрийн 22:00 цагаас тавдугаар сарын 9-ний 06:00 цаг хүртэл хаана.

Тухайн замаар зорчдог нийтийн тээврийн үйлчилгээний

М:5 “10-р хороолол-Нарны зам-Ботаник”

Ч:17А “Баруун 4 зам-/Их тойрог/”

Ч:17Б “Баруун 4 зам-нарны зам-Зүүн 4 зам-их тойруу /Их тойрог/” чиглэлүүдэд түр хугацаанд өөрчлөлт оруулан Нийслэлийн хүрээ өргөн чөлөө, Их Монгол гудамж, Ллимпын гүүрээр Нарны зам руу тойрч явах зохицуулалт хийсэн тул иргэд зорчигчид та бүхэн дараах маршрутын дагуу нийтийн тээврээр үйлчлүүлээрэй гэж Нийтийн тээврийн газраас мэдээллээ.

Дэлгэрэнгүй унших

Тод мэдээ

Өмнөговь аймгийн Даланзадгад суманд 14 га талбайтай цэцэрлэгт хүрээлэн байгуулна

Огноо:

6 цаг 31 минут

2024/05/06

Монгол Улсын Ерөнхийлөгчийн Тамгын газар, Өмнөговь аймгийн Даланзадгад сум, “Буян-Од” ХХК хамтран “Тэрбум мод” үндэсний хөдөлгөөний хүрээнд мод тарьж, ургуулах аян өрнүүлнэ.

Энэ тухай Санамж бичигт Монгол Улсын Ерөнхийлөгчийн Тамгын газрыг төлөөлж Ерөнхийлөгчийн Хэвлэл мэдээллийн албаны дарга Ө.Золбаяр, Өмнөговь аймгийн Даланзадгад сумыг төлөөлж тус сумын Засаг дарга бөгөөд хотын захирагч Х.Батболд, “Буян-Од” ХХК-ийг төлөөлж тус компанийн ерөнхий захирал В.Буянтогтох нар гарын үсэг зурлаа.

Санамж бичгийн хүрээнд Өмнөговь аймгийн Даланзадгад суманд 14 га талбай бүхий “Говь хангай төгөл” цэцэрлэгт хүрээлэн байгуулж, хангайн бүсээс 4,000 ширхэг улиас, хайлаас модны тарьц, суулгац авчирч, тарьж, ургуулахаар боллоо.

Шаардагдах хөрөнгийг “Буян-Од” ХХК гаргах бөгөөд Даланзадгад сумын Засаг даргын Тамгын газар усалгаа, арчилгаа, тордлогоог нь бүрэн хариуцна. “Буян-Од” ХХК “Тэрбум мод” үндэсний хөдөлгөөнийг дэмжин, цэцэрлэгт хүрээлэн байгуулах, тарьц, суулгац нийлүүлэх санаачилга гаргасан юм.

Тус компани 2001-2014 онд Сэлэнгэ аймгийн Тужийн нарсыг нөхөн сэргээхэд хувь нэмрээ оруулж, 20 гаруй сая мод тарьж, ургуулан, ойн санд хүлээлгэн өгч байжээ.

“Тэрбум мод” үндэсний хөдөлгөөний хүрээнд байгууллага, аж ахуйн нэгж, иргэдийн гаргаж байгаа аливаа санал, санаачилгыг Ерөнхийлөгчийн Тамгын газар бүх талаар дэмжиж, хамтран ажиллана гэдгийг Ерөнхийлөгчийн Хэвлэл мэдээллийн албаны дарга Ө.Золбаяр хэллээ.