Тод мэдээ
МҮОНТ “Монгол хүүхэд” 5 цагийн шууд нэвтрүүлэг бэлтгэн хүргэнэ
Монголын Үндэсний Олон Нийтийн Телевиз “Олон улсын хүүхдийн эрхийг хамгаалах” өдрийг тохиолдуулан “Монгол хүүхэд” нэртэй 5 цагийн шууд нэвтрүүлгийг бэлтгэн хүргэхээр ажиллаж байна.
“Монгол хүүхэд” баярын үйл ажиллагаанд Улаанбаатар хотоос гадна орон нутгийн тал бүрийн авьяастай, оюунлаг, чадварлаг хүүхдүүд, хариуцлагатай аав, ээжийн төлөөлөл, хүүхэд хамгааллын мэргэжилтэн болон дуучид гэр бүлийн хамт зочноор оролцоно.
Тухайлбал, 6 настайгаасаа Монгол бичгээр уншиж, бичиж сурсан З.Мөнх-Эрдэнэ, пара олимпийн тамирчин хүүхдүүд, боксчин эгч, дүүс оролцож байна.
Энэ жилийн баярын хөтөлбөрт байгалийн үнэт өв, хэл соёл, ахуй зан заншлын талаар “Малчны удам”, “Тайгын охин”, “Нуур бид хоёр” зэрэг нэвтрүүлгүүд мөн Төв цэнгэлдэх хүрээлэнд Улаанбаатар хотын хамгийн том дүрслэх урлагийн нээлттэй фестиваль буюу “Kids Art Festival”, “Тумбаахайн өдөрлөг”, “ABU-Робокон-2024” , “Браво цирк-4” зэрэг хөтөлбөрүүд багтсан байна.
Энэхүү өдөрлөгийг Хүүхэд, гэр бүлийн хөгжил, хамгааллын ерөнхий газартай хамтран зохион байгуулж байна.
Хүүхэд багачуудад ном унших дадлыг суулгах, боловсрол олгох, танин мэдүүлэх зорилго бүхий “Тумбаахайн найзууд” нэвтрүүлэг нь нийт 80 дугаарыг үзэгч хүүхдүүдэд хүргэжээ.
Тус нэвтрүүлгийн Тумбаахай, Дэгдүүнэ, Хувдай нар үзэгч хүүхдүүдтэйгээ уулзан өдөрлөг зохион байгууллаа.
“Kids Art Festival” нь “More Art, More Fun” уриатайгаар хүүхдийн сэтгэн бодох, өөрийгөө илэрхийлэх, бүтээлч байдлыг дэмжсэн, дүрслэх урлагийн төрөл бүрийн хөтөлбөрүүдийг багтааж байна.
Хүрэлцэн ирснээр хүүхэдтэйгээ хамт зурж, будаж, хайчилж, урлах боломжтойгоос гадна урлагийн боловсрол олгох байгууллага, сургалт, студиудтэй танилцах боломжтой юм.
МҮОНТ нь жил бүр олон улсын хүүхдийн эрхийг хамгаалах өдрөөр хүүхэд багачуудад зориулсан нэвтрүүлэг, хөтөлбөрүүдийг үзэгчдэдээ хүргэдэг билээ.
Үзэгч та бүхэн эх үрсийн баяраар дээрх баярын хөтөлбөрүүдийг хүлээн авч үзнэ үү.
Тод мэдээ
Сүхбаатар дүүрэгт 37228 ам.метр явган хүний замын засвар, арчлалтыг энэ сарын 20-ноос эхлүүлнэ
Нийслэлээс явган замын арчлалтыг сайжруулах үүднээс байршлууд дээр нь очиж тогтмол ажиллаж байгаа. Тухайлбал, энэ сарын 17-ны өдөр Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг болон холбогдох албаныхан хотын гол, гудамж замын зарим байршилд явган замын нөхцөл байдалтай танилцаж, үүрэг чиглэл өглөө.
Сүхбаатар дүүргийн 8 дугаар хороонд ажиллахдаа явган замгүй байршлуудад хэрхэн явган зам гаргах, иргэдийн хөдөлгөөний аюулгүй байдлыг хангах асуудлаар Сүхбаатар дүүргийн Засаг даргын орлогч У.Өнөрцэцэг болон албаны хүмүүстэй ярилцлаа.
Энэ үеэр Сүхбаатар дүүргийн Засаг даргын орлогч У.Өнөрцэцэг “Нийслэлийн Засаг даргаас өгсөн үүрэг даалгаврын дагуу өнгөрсөн амралтын өдрүүдээр дүүргийн Тамгын газар, хороодын ажлын албатай хамтарч Сүхбаатар дүүргийн 1-11 дүгээр хорооны 355 байршилд 37228 ам.метр талбайн явган хүний зам талбайн арчлалтыг шалгасан. Явган хүний замын хавтангуудын арчлалтыг сайжруулах, засварлах шаардлагатай хэсгүүдэд ажлыг энэ сарын 20-ноос эхлүүлж, үе шаттай явуулна. Эхний ээлжид Сүхбаатар дүүргийн Бага тойруугаас Их тойруу доторх явган хүний замыг засварлана. Багшийн дээдийн хойно Спортын төв ордны арк дээр иргэдээс гомдол их ирдэг. Автомашин явах хоёр урсгал замтай ч хажуугаар нь явган хүний зам байдаггүй. Тиймээс иргэд, орчмоор нь зорчиж байгаа оюутнуудад зорчиход хүндрэлтэй. Энэ хэсэгт мэргэжлийн байгууллагын дүгнэлт гаргуулж, явган хүний замыг хийхээр төлөвлөж байна” гэлээ.
Сүхбаатар дүүргийн хэмжээнд Энхтайваны өргөн чөлөө буюу Арслантай гүүрний баруун талаас Баруун 4 зам хүртэлх явган хүний замыг шинэчлэх ажлыг эхлүүлсэн. Гэрээнд заасан хугацааны дагуу ажлууд хийгдэнэ. МУИС-ийн баруун талаас Засгийн газрын ордны зүүн талд байрлах “Галлериа Улаанбаатар”-ын урд талын хэсэг, СТӨ-ний ард талын хэсгийн явган замын ажлуудыг нийслэлийн Хөрөнгө оруулалтын газраас хяналт тавин гүйцэтгэж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ
Нийслэлийн Засаг даргын 2025 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийг хэрэгжүүлэх ажлын хүрээнд өнөөдрөөс Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ.
Тодруулбал, нийслэлийн Онцгой байдлын газар, нийслэлийн Цагдаагийн удирдах газар, дүүргүүдийн Хүүхэд, гэр бүлийн хөгжлийн хэлтсийн алба хаагчид Туул, Тэрэлж, Хэрлэн гол дагуу 9 чиглэлд ирэх есдүгээр сарын 21-ний өдрийг дуустал хөдөлгөөнт болон завьт эргүүл ажиллах юм. Энэ жилээс Сэлбэ гол дагуу хөдөлгөөнт эрүүл ажиллана. Нийслэлийн хэмжээнд гол, усны ослоос аврах, урьдчилан сэргийлэх завьт болон хөдөлгөөнт эргүүл 15 дахь жилдээ ажиллаж байна.
НИЙСЛЭЛИЙН ОНЦГОЙ КОМИСС
Тод мэдээ
Сүхбаатарын талбайн хоёр талын явган хүний замыг шинэчлэх ажил үргэлжилж байна
Нийт 15 байршилд явган хүний замыг байгалийн чулуун хавтангаар шинэчлэх ажил үргэлжилж байна. Үүний нэг болох Сүхбаатарын талбайн хоёр талын 5012 ам.метр талбай бүхий явган хүний зам засварын байршилд холбогдох албаныхан ажиллалаа.
Тухайн байршилд ажилласан УБЗАА-ны Тохижилт, хог хаягдлын удирдлагын газрын дарга Г.Билгүүн “Нийслэл хотын хэмжээнд төв магистрал зургаан гудамжинд байгалийн чулуун хавтангаар явган хүний зам хийж байна. Тухайлбал, Төв шуудангийн уулзвараас Сүхбаатарын талбайг тойрсон явган хүний замыг тодорхой хэсгүүдэд хувааж, ажлыг үргэлжлүүлж байгаа юм. Ажил гүйцэтгэхдээ явган зорчигчийн хөдөлгөөнд саад учруулахгүйн тулд иргэд чөлөөтэй зорчих гарцыг гаргасан” гэлээ.
Түүнчлэн явган замыг байгалийн боржин чулуун хавтангаар шинэчлэхдээ галаар шатаах, цохилттой дрилл ашиглан барзгар гадаргуу үүсгэх байдлаар технологийн шинэчлэлтийн ажлыг зарим шаардлагатай хэсэгт оруулж өгч байгааг ажил гүйцэтгэгчид хэллээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
