Тод мэдээ
Өсвөрийн шатарчдын тэмцээнд Дорноговь аймгийн баг тамирчид тэргүүллээ
Монгол Улсын Их Хурлын дарга асан, шатрын спортын нэрт зүтгэлтэн Данзангийн Лүндээжанцангийн нэрэмжит хангай, говийн бүсийн аймгуудын өсвөрийн шатарчдын багийн аварга шалгаруулах уламжлалт тэмцээн есдүгээр сарын 24, 25-ны өдрүүдэд Өвөрхангай аймгийн Арвайхээр хотод боллоо.
Энэ удаагийн тэмцээнд Архангай, Баянхонгор, Дорноговь, Дундговь, Өвөрхангай, Өмнөговь зэрэг хангайн болон говийн бүсийн зургаан аймгаас 13 багийн 6-18 насны 182 тамирчин эрэгтэй, эмэгтэй 7 насны ангилалд оюун ухаан, авхаалж самбаагаа сорилоо. Шатарчид Швейцарь системийн дагуу долоон өрөг тоглосон юм.
УИХ-ын дарга асан, шатрын спортын зүтгэлтэн Д.Лүндээжанцан тэмцээнийг нээж хэлсэн үгэндээ уламжлал болсон энэхүү тэмцээнээс олон олон шатрын спортын их мастерууд төрөн гарсныг дурдаад, тэмцээнийг анх санаачлан зохион байгуулсан Монгол Улсын гавьяат багш, доктор, профессор Ж.Жанцандорж, дэмжин ажилладаг Өвөрхангай аймгийн Засаг дарга, аймгийн шатрын холбооны тэргүүн А.Ишдорж, аймгийн шатрын холбооны нарийн бичгийн дарга Ө.Баттөр, Политехник коллежийн удирдлага, хамт олонд талархал дэвшүүлэв.
Түүнчлэн “Оюуны спорт, оюуны тулаанд ялагч нь байж, амьдралд өөрийгөө ялан дийлж, эх орондоо ихийг бүтээх их үйлсэд шатрын спорт нөр их нөлөөтэй. Үр хүүхдийнхээ оюуны царааг тэлж, шатрын спортоор хичээллэхэд нь үргэлж дэмжиж байдаг эцэг, эхчүүдэд талархаж байна. Тэмцээнд оролцож байгаа нийт тамирчдадаа амжилт хүсье” хэмээлээ.
Хөдөө орон нутагт шатрын спортыг хөгжүүлэх, өсвөрийн шатарчдын хувийн болон багаар тоглох ур чадварын дээшлүүлэхэд энэхүү тэмцээний зорилго оршиж буй юм. Тэмцээний шилдгүүдээр багийн дүнгээр Дорноговь аймгийн баг зургаа хожиж нэг тэнцсэнээр тэргүүн байр, Өмнөговь аймгийн баг зургаа хожиж, нэг хожигдсоноор дэд байранд орсон бол Өвөрхангай аймгийн “Ирээдүй” клуб тав хожиж, хоёр хожигдсоноор гуравдугаар байрт шалгарлаа.
Мөн ширээний дүнгээр эмэгтэй, эрэгтэй 6, 8, 10, 12, 14, 16, 18 насанд тус тус эхний гурван байрыг шалгаруулж шагнал гардуулсан юм.
Өвөрхангай аймгийн Засаг дарга, шатрын холбооны тэргүүн А.Ишдорж “2006 оноос хойш уламжлал болон зохион байгуулагдаж буй УИХ-ын дарга асан, шатрын спортын нэрт зүтгэлтэн Д.Лүндээжанцангийн нэрэмжит шатрын тэмцээн амжилттай боллоо. Жил бүр оролцогчдын тоо нэмэгдэж байгаа нь чансаа өндөр тэмцээн болсныг илтгэж байна. Хамгийн холоос Дорноговь аймгийн баг тамирчид ирж оролцсон” хэмээлээ. Мөн “Өвөрхангай аймгийн удирдлагын зүгээс хүүхэд багачуудыг шатрын спортоор хичээллүүлэхэд анхаарч, тодорхой арга хэмжээнүүдийг үе шаттайгаар хэрэгжүүлж байгаа” гэв.
Хөдөө орон нутагт шатрын спортыг хөгжүүлэн дэлгэрүүлэхэд энэ тэмцээн маш их үр дүнтэй. УИХ-ын дарга асан Д.Лүндээжанцан энэ тэмцээнийг ивээн тэтгэж, дэмжиж байдагт талархалтай байна. Хангайн болон говийн бүсийн аймгуудад шатрын спортоор хичээллэгсдийн тоо сүүлийн жилүүдэд илүү олон болж байгаа хэмээн Өвөрхангай аймгийн шатрын холбооны нарийн бичгийн дарга Ө.Баттөр хэллээ.
Тэмцээний үеэр УИХ-ын дарга асан Д.Лүндээжанцан энэхүү тэмцээнийг санаачлагч Монгол Улсын Гавьяат багш, Шатрын спортын нэрт зүтгэлтэн Ж.Жанцандоржид хүндэтгэл үзүүлж, дурсгалын зүйл гардуулав.
Нээлтийн үйл ажиллагаанд Өвөрхангай аймгийн Засаг дарга, аймгийн шатрын холбооны тэргүүн А.Ишдорж, Өвөрхангай аймгийн ИТХ-ын нарийн бичгийн дарга Т.Гончигдорж, Арвайхээр сумын Засаг дарга Б.Ганбат, Өвөрхангай аймгийн Засаг Даргын дэргэдэх Биеийн тамир спортын газрын дарга Ө.Жамдүдсансум, Өвөрхангай аймаг дахь Политехник коллежийн захирал С.Санчир, Монгол Улсын Гавьяат багш, Шатрын спортын нэрт зүтгэлтэн Ж.Жанцандорж, Шатрын их мастер Г.Мөнхгал, Өвөрхангай аймгийн шатрын холбооны нарийн бичгийн дарга Ө.Баттөр болон багш дасгалжуулагчид, эцэг эхчүүд оролцлоо гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.
Тод мэдээ
Сүхбаатар дүүрэгт 37228 ам.метр явган хүний замын засвар, арчлалтыг энэ сарын 20-ноос эхлүүлнэ
Нийслэлээс явган замын арчлалтыг сайжруулах үүднээс байршлууд дээр нь очиж тогтмол ажиллаж байгаа. Тухайлбал, энэ сарын 17-ны өдөр Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг болон холбогдох албаныхан хотын гол, гудамж замын зарим байршилд явган замын нөхцөл байдалтай танилцаж, үүрэг чиглэл өглөө.
Сүхбаатар дүүргийн 8 дугаар хороонд ажиллахдаа явган замгүй байршлуудад хэрхэн явган зам гаргах, иргэдийн хөдөлгөөний аюулгүй байдлыг хангах асуудлаар Сүхбаатар дүүргийн Засаг даргын орлогч У.Өнөрцэцэг болон албаны хүмүүстэй ярилцлаа.
Энэ үеэр Сүхбаатар дүүргийн Засаг даргын орлогч У.Өнөрцэцэг “Нийслэлийн Засаг даргаас өгсөн үүрэг даалгаврын дагуу өнгөрсөн амралтын өдрүүдээр дүүргийн Тамгын газар, хороодын ажлын албатай хамтарч Сүхбаатар дүүргийн 1-11 дүгээр хорооны 355 байршилд 37228 ам.метр талбайн явган хүний зам талбайн арчлалтыг шалгасан. Явган хүний замын хавтангуудын арчлалтыг сайжруулах, засварлах шаардлагатай хэсгүүдэд ажлыг энэ сарын 20-ноос эхлүүлж, үе шаттай явуулна. Эхний ээлжид Сүхбаатар дүүргийн Бага тойруугаас Их тойруу доторх явган хүний замыг засварлана. Багшийн дээдийн хойно Спортын төв ордны арк дээр иргэдээс гомдол их ирдэг. Автомашин явах хоёр урсгал замтай ч хажуугаар нь явган хүний зам байдаггүй. Тиймээс иргэд, орчмоор нь зорчиж байгаа оюутнуудад зорчиход хүндрэлтэй. Энэ хэсэгт мэргэжлийн байгууллагын дүгнэлт гаргуулж, явган хүний замыг хийхээр төлөвлөж байна” гэлээ.
Сүхбаатар дүүргийн хэмжээнд Энхтайваны өргөн чөлөө буюу Арслантай гүүрний баруун талаас Баруун 4 зам хүртэлх явган хүний замыг шинэчлэх ажлыг эхлүүлсэн. Гэрээнд заасан хугацааны дагуу ажлууд хийгдэнэ. МУИС-ийн баруун талаас Засгийн газрын ордны зүүн талд байрлах “Галлериа Улаанбаатар”-ын урд талын хэсэг, СТӨ-ний ард талын хэсгийн явган замын ажлуудыг нийслэлийн Хөрөнгө оруулалтын газраас хяналт тавин гүйцэтгэж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ
Нийслэлийн Засаг даргын 2025 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийг хэрэгжүүлэх ажлын хүрээнд өнөөдрөөс Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ.
Тодруулбал, нийслэлийн Онцгой байдлын газар, нийслэлийн Цагдаагийн удирдах газар, дүүргүүдийн Хүүхэд, гэр бүлийн хөгжлийн хэлтсийн алба хаагчид Туул, Тэрэлж, Хэрлэн гол дагуу 9 чиглэлд ирэх есдүгээр сарын 21-ний өдрийг дуустал хөдөлгөөнт болон завьт эргүүл ажиллах юм. Энэ жилээс Сэлбэ гол дагуу хөдөлгөөнт эрүүл ажиллана. Нийслэлийн хэмжээнд гол, усны ослоос аврах, урьдчилан сэргийлэх завьт болон хөдөлгөөнт эргүүл 15 дахь жилдээ ажиллаж байна.
НИЙСЛЭЛИЙН ОНЦГОЙ КОМИСС
Тод мэдээ
Сүхбаатарын талбайн хоёр талын явган хүний замыг шинэчлэх ажил үргэлжилж байна
Нийт 15 байршилд явган хүний замыг байгалийн чулуун хавтангаар шинэчлэх ажил үргэлжилж байна. Үүний нэг болох Сүхбаатарын талбайн хоёр талын 5012 ам.метр талбай бүхий явган хүний зам засварын байршилд холбогдох албаныхан ажиллалаа.
Тухайн байршилд ажилласан УБЗАА-ны Тохижилт, хог хаягдлын удирдлагын газрын дарга Г.Билгүүн “Нийслэл хотын хэмжээнд төв магистрал зургаан гудамжинд байгалийн чулуун хавтангаар явган хүний зам хийж байна. Тухайлбал, Төв шуудангийн уулзвараас Сүхбаатарын талбайг тойрсон явган хүний замыг тодорхой хэсгүүдэд хувааж, ажлыг үргэлжлүүлж байгаа юм. Ажил гүйцэтгэхдээ явган зорчигчийн хөдөлгөөнд саад учруулахгүйн тулд иргэд чөлөөтэй зорчих гарцыг гаргасан” гэлээ.
Түүнчлэн явган замыг байгалийн боржин чулуун хавтангаар шинэчлэхдээ галаар шатаах, цохилттой дрилл ашиглан барзгар гадаргуу үүсгэх байдлаар технологийн шинэчлэлтийн ажлыг зарим шаардлагатай хэсэгт оруулж өгч байгааг ажил гүйцэтгэгчид хэллээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
-
Тод мэдээ2020/08/08
Оёдлын цехэд ажлын шинэ загварын хувцас үйлдвэрлэж байна
-
Тод мэдээ2022/07/22
Газрын тос боловсруулах үйлдвэрийн EPC-1 төслийн явц 63 хувийн гүйцэтгэлтэй байн...
-
Тод мэдээ2023/04/28
“Эрчим хүчний хангамжийн найдвартай байдлыг хангах чиглэлээр авч хэрэгжүүл...
-
Тод мэдээ2025/04/18
“Yutong Bus” компанид үйлдвэрлэсэн 10 шинэ автобусыг хот орчмын чиглэлд үйлч...