Тод мэдээ
МҮОНРТ “Интернэшнл Медиабэй” компанитай Санамж бичиг байгууллаа
Монголын үндэсний олон нийтийн радио, телевизийн Ерөнхий захирал А.Бүрэнбаатар 2022 оны 9 дүгээр сарын 1-ний өдөр “Интернэшнл Медиабэй” компанийн ерөнхий зөвлөх Иззат Ариповтай Харилцан ойлголцлын санамж бичиг байгууллаа.
Дээрх санамж бичгийн хүрээнд МҮОНТ, МҮОНР-ийн нэвтрүүлгийг “Интернэшнл Медиабэй” компанийн “Медиабэй” аппликейшнээр олон улсад цацаж, Монголын соёлын өв болсон уран бүтээлийг дэлхий дахинд сурталчлах, олон улсад эргэлтэд оруулах чиглэлээр хамтран ажиллах юм.
Энэ үеэр МҮОНРТ-ийн Ерөнхий захирал А.Бүрэнбаатар: “Өнөөдөр байгуулсан Харилцан ойлголцлын санамж бичгийн хүрээнд Монголын үндэсний олон нийтийн радио, телевиз олон улсын үзэгчдийн цар хүрээгээ нэмж байна. Дэлхийн маш олон орны радио, телевизүүд нэгдсэн “Медиабэй” аппликейшнийг олон улсад таван сая гаруй хүн татан авч ашигладаг юм байна. Энэ аппликейшнээр дамжуулан МҮОНТ-ийн уран бүтээл, шоу, олон ангит киног англи, орос, хятад зэрэг 5-6 орны хэлээр хадмал орчуулгатайгаар “Медиабэй” аппликейшнд байршуулж, олон улсын зах зээл дээр гаргах боломж бий болж байгаа.
Мөн “Медиабэй” аппликейшнд олон улсын 70 гаруй радио нэгдсэн байна. МҮОНР “Медиабэй” аппликейшнаар дамжуулан дэлхийн өнцөг булан бүрт суугаа монголчууддаа болон дэлхийн үзэгчдэд радио долгионоо хүргэх боломжтой болж байна” гэсэн юм.
“Интернэшнл Медиабэй” компанийн ерөнхий зөвлөх Иззат Арипов: “Монголын үндэсний олон нийтийн радио, телевизтэй байгуулж буй Харилцан ойлголцлын санамж бичгийг МҮОНР-ийн 88, МҮОНТ-ийн 55 жилийн ойгоор байгуулж байгаадаа байртай байна. Энэ санамж бичгийн хүрээнд МҮОНРТ-ийн мэдээ, нэвтрүүлэг, уран бүтээлийг “Медиабэй” аппликейшнээр дэлхий дахинд дамжуулах боломжийг нээж байна. МҮОНРТ “Медиабэй”-д нэгдсэнээр уран бүтээлүүдээ нэн түрүүнд дэлхий дахинд тархан суурьшсан монголчууддаа болон монгол хэлээр ярьдаг гадаадын иргэдэд хүргэх юм” гэлээ.
Тод мэдээ
Сүхбаатар дүүрэгт 37228 ам.метр явган хүний замын засвар, арчлалтыг энэ сарын 20-ноос эхлүүлнэ
Нийслэлээс явган замын арчлалтыг сайжруулах үүднээс байршлууд дээр нь очиж тогтмол ажиллаж байгаа. Тухайлбал, энэ сарын 17-ны өдөр Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг болон холбогдох албаныхан хотын гол, гудамж замын зарим байршилд явган замын нөхцөл байдалтай танилцаж, үүрэг чиглэл өглөө.
Сүхбаатар дүүргийн 8 дугаар хороонд ажиллахдаа явган замгүй байршлуудад хэрхэн явган зам гаргах, иргэдийн хөдөлгөөний аюулгүй байдлыг хангах асуудлаар Сүхбаатар дүүргийн Засаг даргын орлогч У.Өнөрцэцэг болон албаны хүмүүстэй ярилцлаа.
Энэ үеэр Сүхбаатар дүүргийн Засаг даргын орлогч У.Өнөрцэцэг “Нийслэлийн Засаг даргаас өгсөн үүрэг даалгаврын дагуу өнгөрсөн амралтын өдрүүдээр дүүргийн Тамгын газар, хороодын ажлын албатай хамтарч Сүхбаатар дүүргийн 1-11 дүгээр хорооны 355 байршилд 37228 ам.метр талбайн явган хүний зам талбайн арчлалтыг шалгасан. Явган хүний замын хавтангуудын арчлалтыг сайжруулах, засварлах шаардлагатай хэсгүүдэд ажлыг энэ сарын 20-ноос эхлүүлж, үе шаттай явуулна. Эхний ээлжид Сүхбаатар дүүргийн Бага тойруугаас Их тойруу доторх явган хүний замыг засварлана. Багшийн дээдийн хойно Спортын төв ордны арк дээр иргэдээс гомдол их ирдэг. Автомашин явах хоёр урсгал замтай ч хажуугаар нь явган хүний зам байдаггүй. Тиймээс иргэд, орчмоор нь зорчиж байгаа оюутнуудад зорчиход хүндрэлтэй. Энэ хэсэгт мэргэжлийн байгууллагын дүгнэлт гаргуулж, явган хүний замыг хийхээр төлөвлөж байна” гэлээ.
Сүхбаатар дүүргийн хэмжээнд Энхтайваны өргөн чөлөө буюу Арслантай гүүрний баруун талаас Баруун 4 зам хүртэлх явган хүний замыг шинэчлэх ажлыг эхлүүлсэн. Гэрээнд заасан хугацааны дагуу ажлууд хийгдэнэ. МУИС-ийн баруун талаас Засгийн газрын ордны зүүн талд байрлах “Галлериа Улаанбаатар”-ын урд талын хэсэг, СТӨ-ний ард талын хэсгийн явган замын ажлуудыг нийслэлийн Хөрөнгө оруулалтын газраас хяналт тавин гүйцэтгэж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ
Нийслэлийн Засаг даргын 2025 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийг хэрэгжүүлэх ажлын хүрээнд өнөөдрөөс Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ.
Тодруулбал, нийслэлийн Онцгой байдлын газар, нийслэлийн Цагдаагийн удирдах газар, дүүргүүдийн Хүүхэд, гэр бүлийн хөгжлийн хэлтсийн алба хаагчид Туул, Тэрэлж, Хэрлэн гол дагуу 9 чиглэлд ирэх есдүгээр сарын 21-ний өдрийг дуустал хөдөлгөөнт болон завьт эргүүл ажиллах юм. Энэ жилээс Сэлбэ гол дагуу хөдөлгөөнт эрүүл ажиллана. Нийслэлийн хэмжээнд гол, усны ослоос аврах, урьдчилан сэргийлэх завьт болон хөдөлгөөнт эргүүл 15 дахь жилдээ ажиллаж байна.
НИЙСЛЭЛИЙН ОНЦГОЙ КОМИСС
Тод мэдээ
Сүхбаатарын талбайн хоёр талын явган хүний замыг шинэчлэх ажил үргэлжилж байна
Нийт 15 байршилд явган хүний замыг байгалийн чулуун хавтангаар шинэчлэх ажил үргэлжилж байна. Үүний нэг болох Сүхбаатарын талбайн хоёр талын 5012 ам.метр талбай бүхий явган хүний зам засварын байршилд холбогдох албаныхан ажиллалаа.
Тухайн байршилд ажилласан УБЗАА-ны Тохижилт, хог хаягдлын удирдлагын газрын дарга Г.Билгүүн “Нийслэл хотын хэмжээнд төв магистрал зургаан гудамжинд байгалийн чулуун хавтангаар явган хүний зам хийж байна. Тухайлбал, Төв шуудангийн уулзвараас Сүхбаатарын талбайг тойрсон явган хүний замыг тодорхой хэсгүүдэд хувааж, ажлыг үргэлжлүүлж байгаа юм. Ажил гүйцэтгэхдээ явган зорчигчийн хөдөлгөөнд саад учруулахгүйн тулд иргэд чөлөөтэй зорчих гарцыг гаргасан” гэлээ.
Түүнчлэн явган замыг байгалийн боржин чулуун хавтангаар шинэчлэхдээ галаар шатаах, цохилттой дрилл ашиглан барзгар гадаргуу үүсгэх байдлаар технологийн шинэчлэлтийн ажлыг зарим шаардлагатай хэсэгт оруулж өгч байгааг ажил гүйцэтгэгчид хэллээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
