Тод мэдээ
Энэ жилийн зуныг цастай угтлаа
Энэ талаар иргэн Д.Лхамаа: "Өмнөх зунтай харьцуулахад сэрүүхэн зун болж байна. Зургаан сар гарчихсан гэхэд сэрүүн намрын өдөр шиг л байна. Бороо ч хомс, гандуу зун үргэлжилж байна.Хүйтэнд хөдөөгүүр тариалан эрхэлж буй иргэдэд хүндрэлтэй байгаа болов уу. Малчин өрхүүдэд ч мөн ирэх өвлийн ургац, идэш тэжээл хомстохоос эхлүүлээд малын тарга тэвээрэг муудаад хэцүү байгаа." гэж байв.
Мөн иргэн Н.Дөлгөөн: "Энэ жил их сонин хүйтэн зун болж байна. Эрт өвөл болох болов уу гэж бодож байна. Монголын амьдралд энэ байдал нь ямар сөрөг үр дагавартайг сайн мэдэхгүй ч, тариалан, ургац хураалтад асуудал учруулах байх. Эрт хүйтрэх байх. Би өөрөө орон сууцанд амьдардаг учир гэр хороололд амьдардаг иргэдийг бодвол гайгүй ч, сэрүүхэн л байна." гэлээ.
Цаг уур, орчны шинжилгээний газрын Урьдчилан мэдээлэх хэлтсийн дарга Л.Оюунжаргал, Өнгөрсөн хавар нэлээд салхи шуургатай байсан. Энэ таван сар нэлээд сэрүүхэн боллоо. Салхи шуурганы хувьд өмнөх жилүүдтэй харьцуулахад нэлээд онцлог байна. Ер нь салхи шуурга гуравдугаар сарын дунд үеэс эхлээд олон удаагийн давтамжтай боллоо. Дөрөвдүгээр сард дөрвөн ч удаа хүчтэй шороон болон цасан салхи шуурлаа. Тавдугаар сард дөрвөн удаагийн салхи, шуурганы үзэгдэл ажиглагдсан. Бусад жилүүдээс 5 дугаар сар хүйтэн байлаа. 2019 онд бас иймэрхүү хүйтэн байсан. Зургадугаар сарын эхээр хэдий дулаарах ч, 6-ны өдрөөс эхлээд баруун аймгуудаар хүйтэрч, уулаараа нойтон цас орно, 7-нд төвийн аймгуудаар, зүүн аймгийн нутгийн баруун хэсгээр, 8-нд нутгийнхаа зүүн хагас руу үзэгдэл шилжинэ.
Өмнөх хүйтрэлтийг бодоход арай зөөлөн байх хэдий ч уулаараа нойтон цастай, салхи шуургатай байна. Баруун аймгуудад аюултай үзэгдлээс сэргийлэх мэдээг гаргана. гэж ярьж байлаа.
Тод мэдээ
Сүхбаатар дүүрэгт 37228 ам.метр явган хүний замын засвар, арчлалтыг энэ сарын 20-ноос эхлүүлнэ
Нийслэлээс явган замын арчлалтыг сайжруулах үүднээс байршлууд дээр нь очиж тогтмол ажиллаж байгаа. Тухайлбал, энэ сарын 17-ны өдөр Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг болон холбогдох албаныхан хотын гол, гудамж замын зарим байршилд явган замын нөхцөл байдалтай танилцаж, үүрэг чиглэл өглөө.
Сүхбаатар дүүргийн 8 дугаар хороонд ажиллахдаа явган замгүй байршлуудад хэрхэн явган зам гаргах, иргэдийн хөдөлгөөний аюулгүй байдлыг хангах асуудлаар Сүхбаатар дүүргийн Засаг даргын орлогч У.Өнөрцэцэг болон албаны хүмүүстэй ярилцлаа.
Энэ үеэр Сүхбаатар дүүргийн Засаг даргын орлогч У.Өнөрцэцэг “Нийслэлийн Засаг даргаас өгсөн үүрэг даалгаврын дагуу өнгөрсөн амралтын өдрүүдээр дүүргийн Тамгын газар, хороодын ажлын албатай хамтарч Сүхбаатар дүүргийн 1-11 дүгээр хорооны 355 байршилд 37228 ам.метр талбайн явган хүний зам талбайн арчлалтыг шалгасан. Явган хүний замын хавтангуудын арчлалтыг сайжруулах, засварлах шаардлагатай хэсгүүдэд ажлыг энэ сарын 20-ноос эхлүүлж, үе шаттай явуулна. Эхний ээлжид Сүхбаатар дүүргийн Бага тойруугаас Их тойруу доторх явган хүний замыг засварлана. Багшийн дээдийн хойно Спортын төв ордны арк дээр иргэдээс гомдол их ирдэг. Автомашин явах хоёр урсгал замтай ч хажуугаар нь явган хүний зам байдаггүй. Тиймээс иргэд, орчмоор нь зорчиж байгаа оюутнуудад зорчиход хүндрэлтэй. Энэ хэсэгт мэргэжлийн байгууллагын дүгнэлт гаргуулж, явган хүний замыг хийхээр төлөвлөж байна” гэлээ.
Сүхбаатар дүүргийн хэмжээнд Энхтайваны өргөн чөлөө буюу Арслантай гүүрний баруун талаас Баруун 4 зам хүртэлх явган хүний замыг шинэчлэх ажлыг эхлүүлсэн. Гэрээнд заасан хугацааны дагуу ажлууд хийгдэнэ. МУИС-ийн баруун талаас Засгийн газрын ордны зүүн талд байрлах “Галлериа Улаанбаатар”-ын урд талын хэсэг, СТӨ-ний ард талын хэсгийн явган замын ажлуудыг нийслэлийн Хөрөнгө оруулалтын газраас хяналт тавин гүйцэтгэж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ
Нийслэлийн Засаг даргын 2025 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийг хэрэгжүүлэх ажлын хүрээнд өнөөдрөөс Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ.
Тодруулбал, нийслэлийн Онцгой байдлын газар, нийслэлийн Цагдаагийн удирдах газар, дүүргүүдийн Хүүхэд, гэр бүлийн хөгжлийн хэлтсийн алба хаагчид Туул, Тэрэлж, Хэрлэн гол дагуу 9 чиглэлд ирэх есдүгээр сарын 21-ний өдрийг дуустал хөдөлгөөнт болон завьт эргүүл ажиллах юм. Энэ жилээс Сэлбэ гол дагуу хөдөлгөөнт эрүүл ажиллана. Нийслэлийн хэмжээнд гол, усны ослоос аврах, урьдчилан сэргийлэх завьт болон хөдөлгөөнт эргүүл 15 дахь жилдээ ажиллаж байна.
НИЙСЛЭЛИЙН ОНЦГОЙ КОМИСС
Тод мэдээ
Сүхбаатарын талбайн хоёр талын явган хүний замыг шинэчлэх ажил үргэлжилж байна
Нийт 15 байршилд явган хүний замыг байгалийн чулуун хавтангаар шинэчлэх ажил үргэлжилж байна. Үүний нэг болох Сүхбаатарын талбайн хоёр талын 5012 ам.метр талбай бүхий явган хүний зам засварын байршилд холбогдох албаныхан ажиллалаа.
Тухайн байршилд ажилласан УБЗАА-ны Тохижилт, хог хаягдлын удирдлагын газрын дарга Г.Билгүүн “Нийслэл хотын хэмжээнд төв магистрал зургаан гудамжинд байгалийн чулуун хавтангаар явган хүний зам хийж байна. Тухайлбал, Төв шуудангийн уулзвараас Сүхбаатарын талбайг тойрсон явган хүний замыг тодорхой хэсгүүдэд хувааж, ажлыг үргэлжлүүлж байгаа юм. Ажил гүйцэтгэхдээ явган зорчигчийн хөдөлгөөнд саад учруулахгүйн тулд иргэд чөлөөтэй зорчих гарцыг гаргасан” гэлээ.
Түүнчлэн явган замыг байгалийн боржин чулуун хавтангаар шинэчлэхдээ галаар шатаах, цохилттой дрилл ашиглан барзгар гадаргуу үүсгэх байдлаар технологийн шинэчлэлтийн ажлыг зарим шаардлагатай хэсэгт оруулж өгч байгааг ажил гүйцэтгэгчид хэллээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
-
Тод мэдээ2021/06/16
Ерөнхий боловсролын сургуулийн эзэмшлийн газрыг зориулалтын дагуу ашиглахад анха...
-
Тод мэдээ2023/06/13
УИХ: Байнгын болон түр хороод өнөөдөр хуралдана
-
Тод мэдээ2023/11/15
Онцын шаардлагагүй бол холын тээвэрт явахгүй байхыг анхааруулж байна
-
Тод мэдээ2022/02/10
ЕБС, цэцэрлэгүүд ирэх даваа гарагаас танхимаар хичээллэнэ