Тод мэдээ
Ши Жиньпин: Авлига бол Коммунист намын хамгийн том аюул
БНХАУ-ын дарга Ши Жиньпин даваа гарагт хийсэн мэдэгдэлдээ авлигыг “Хятадын Коммунист намын хамгийн том аюул” гэж тодорхойлоод, эрх баригч намд урт хугацааны туршид тулгарсаар ирсэн энэ асуудлыг шийдвэрлэх хатуу зорилготой байгаагаа анхаарууллаа.
Өнгөрсөн онд Хятад улсад Төв банкны дэд захирлаас эхлээд хамгийн том газрын тос, хийн компанийн дарга хүртэл өндөр түвшний албан тушаалтнуудын авлигатай холбоотой хийсэн мөрдөн байцаалтын ажиллагаа нь олон нийтийн анхаарлыг татсан билээ.
Дарга Ши авлигын эсрэг кампанит ажлаа шинэ түвшинд хүргэж, Коммунист намын засаглалд ёс зүй, үр нөлөөг сахин хамгаалах чухал алхмуудыг үргэлжлүүлэхээ мэдэгдсэн байна. Тэрээр авлигын хэргүүд нь нийгмийн олон давхаргыг хамарсан, эдийн засгийн болон нийгмийн хөгжилд ноцтой сорилт болж байгааг онцоллоо.
Хятад улсад авлигын түвшин улам бүр гүнзгийрээд зогсохгүй харин ч өсөх хандлагатай байна гэж Ши Жиньпин Коммунист намын Сахилга бат сахиулах төв комиссын (CCDI) Авлигын эсрэг гурван өдрийн чуулганы эхэнд мэдэгдээд “Авлига бол манай намын хамгийн том аюул юм” гэж анхааруулжээ.
Энэ нь авлигын эсрэг тэмцэлд шинэ арга хэмжээ, бодлогын эрчимжүүлэлт шаардлагатай болж буйн илрэл бөгөөд Хятадын дотоод засаглалын тогтвортой байдалд тулгарч буй гол сорилт хэвээр байна.
Хятадын авлигын асуудлын цар хүрээг тодруулах үүднээс Коммунист намын сахилга бат сахиулах төв комисс (CCDI) өнгөрсөн жил 58 өндөр албан тушаалтныг буюу "бар"-ыг мөрдөн шалгасан нь дээд хэмжээнд хүрч рекорд тогтоожээ.
Эдгээр мөрдөн шалгагдсан хүмүүсийн дунд 47 нь дэд сайд түүнээс дээш албан тушаалын зэрэглэл, түвшинтэй бөгөөд үүнд Хөдөө аж ахуй, хөдөөгийн хөгжлийн сайд асан Тан Рэньжянь, Спортын ерөнхий газрын дарга асан Гоу Жуньвэнь нар багтсан байна. Түүнчлэн өндөр албан тушаал хашиж байсан хүмүүс ч өршөөгдөөгүйн дээр Хятадын төрийн өмчит Үндэсний газрын тосны корпорацийн даргын албан тушаалаас 2020 онд тэтгэвэрт гарах насанд хүрч буусан Ван Илин мөн оржээ.
Авлигын эсрэг арга хэмжээ нь Хятадын Коммунист нам авлигыг үндэс сууриар нь таслан зогсоох, сахилга бат, хариуцлагыг сахиулах эрмэлзэлтэй байгааг харуулж байна.
Тод мэдээ
Сүхбаатар дүүрэгт 37228 ам.метр явган хүний замын засвар, арчлалтыг энэ сарын 20-ноос эхлүүлнэ
Нийслэлээс явган замын арчлалтыг сайжруулах үүднээс байршлууд дээр нь очиж тогтмол ажиллаж байгаа. Тухайлбал, энэ сарын 17-ны өдөр Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг болон холбогдох албаныхан хотын гол, гудамж замын зарим байршилд явган замын нөхцөл байдалтай танилцаж, үүрэг чиглэл өглөө.
Сүхбаатар дүүргийн 8 дугаар хороонд ажиллахдаа явган замгүй байршлуудад хэрхэн явган зам гаргах, иргэдийн хөдөлгөөний аюулгүй байдлыг хангах асуудлаар Сүхбаатар дүүргийн Засаг даргын орлогч У.Өнөрцэцэг болон албаны хүмүүстэй ярилцлаа.
Энэ үеэр Сүхбаатар дүүргийн Засаг даргын орлогч У.Өнөрцэцэг “Нийслэлийн Засаг даргаас өгсөн үүрэг даалгаврын дагуу өнгөрсөн амралтын өдрүүдээр дүүргийн Тамгын газар, хороодын ажлын албатай хамтарч Сүхбаатар дүүргийн 1-11 дүгээр хорооны 355 байршилд 37228 ам.метр талбайн явган хүний зам талбайн арчлалтыг шалгасан. Явган хүний замын хавтангуудын арчлалтыг сайжруулах, засварлах шаардлагатай хэсгүүдэд ажлыг энэ сарын 20-ноос эхлүүлж, үе шаттай явуулна. Эхний ээлжид Сүхбаатар дүүргийн Бага тойруугаас Их тойруу доторх явган хүний замыг засварлана. Багшийн дээдийн хойно Спортын төв ордны арк дээр иргэдээс гомдол их ирдэг. Автомашин явах хоёр урсгал замтай ч хажуугаар нь явган хүний зам байдаггүй. Тиймээс иргэд, орчмоор нь зорчиж байгаа оюутнуудад зорчиход хүндрэлтэй. Энэ хэсэгт мэргэжлийн байгууллагын дүгнэлт гаргуулж, явган хүний замыг хийхээр төлөвлөж байна” гэлээ.
Сүхбаатар дүүргийн хэмжээнд Энхтайваны өргөн чөлөө буюу Арслантай гүүрний баруун талаас Баруун 4 зам хүртэлх явган хүний замыг шинэчлэх ажлыг эхлүүлсэн. Гэрээнд заасан хугацааны дагуу ажлууд хийгдэнэ. МУИС-ийн баруун талаас Засгийн газрын ордны зүүн талд байрлах “Галлериа Улаанбаатар”-ын урд талын хэсэг, СТӨ-ний ард талын хэсгийн явган замын ажлуудыг нийслэлийн Хөрөнгө оруулалтын газраас хяналт тавин гүйцэтгэж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ
Нийслэлийн Засаг даргын 2025 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийг хэрэгжүүлэх ажлын хүрээнд өнөөдрөөс Туул, Тэрэлж, Хэрлэн гол дагуу хөдөлгөөнт болон завьт эргүүл ажиллаж эхэллээ.
Тодруулбал, нийслэлийн Онцгой байдлын газар, нийслэлийн Цагдаагийн удирдах газар, дүүргүүдийн Хүүхэд, гэр бүлийн хөгжлийн хэлтсийн алба хаагчид Туул, Тэрэлж, Хэрлэн гол дагуу 9 чиглэлд ирэх есдүгээр сарын 21-ний өдрийг дуустал хөдөлгөөнт болон завьт эргүүл ажиллах юм. Энэ жилээс Сэлбэ гол дагуу хөдөлгөөнт эрүүл ажиллана. Нийслэлийн хэмжээнд гол, усны ослоос аврах, урьдчилан сэргийлэх завьт болон хөдөлгөөнт эргүүл 15 дахь жилдээ ажиллаж байна.
НИЙСЛЭЛИЙН ОНЦГОЙ КОМИСС
Тод мэдээ
Сүхбаатарын талбайн хоёр талын явган хүний замыг шинэчлэх ажил үргэлжилж байна
Нийт 15 байршилд явган хүний замыг байгалийн чулуун хавтангаар шинэчлэх ажил үргэлжилж байна. Үүний нэг болох Сүхбаатарын талбайн хоёр талын 5012 ам.метр талбай бүхий явган хүний зам засварын байршилд холбогдох албаныхан ажиллалаа.
Тухайн байршилд ажилласан УБЗАА-ны Тохижилт, хог хаягдлын удирдлагын газрын дарга Г.Билгүүн “Нийслэл хотын хэмжээнд төв магистрал зургаан гудамжинд байгалийн чулуун хавтангаар явган хүний зам хийж байна. Тухайлбал, Төв шуудангийн уулзвараас Сүхбаатарын талбайг тойрсон явган хүний замыг тодорхой хэсгүүдэд хувааж, ажлыг үргэлжлүүлж байгаа юм. Ажил гүйцэтгэхдээ явган зорчигчийн хөдөлгөөнд саад учруулахгүйн тулд иргэд чөлөөтэй зорчих гарцыг гаргасан” гэлээ.
Түүнчлэн явган замыг байгалийн боржин чулуун хавтангаар шинэчлэхдээ галаар шатаах, цохилттой дрилл ашиглан барзгар гадаргуу үүсгэх байдлаар технологийн шинэчлэлтийн ажлыг зарим шаардлагатай хэсэгт оруулж өгч байгааг ажил гүйцэтгэгчид хэллээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
