Тод мэдээ
Зүүн бүсийг хөгжүүлэх төлөвлөгөө нь бэлэн учраас Ерөнхий сайдаа багаар нь дэмжихээ илэрхийллээ
Монгол Ардын намын дарга, Ерөнхий сайд Л.Оюун-Эрдэнээр ахлуулан УИХ-ын сонгуулийн VI тойрог буюу зүүн бүсийн Дорнод, Сүхбаатар, Хэнтий аймагт Монгол Ардын намаас нэр дэвшиж буй Лхагвасүрэнгийн Соронзонболд, Мөнгөнцогийн Ганхүлэг, Пүрэв-Очирын Анужин, Ухнаагийн Отгонбаяр, Мягмарсүрэнгийн Бадамсүрэн, Цагаанхүүгийн Идэрбат нар аймаг, сум, бүс нутгаа хөгжүүлэх 2024-2028 оны мөрийн хөтөлбөрөө иргэдэд танилцуулж, тулгамдаж буй асуудлыг нь сонсож байна. Тэд Дорнод аймгийн Чулуунхороот, Гурванзагал, Сэргэлэн, Чойбалсан сумын иргэдтэй уулзсан юм.
Нэр дэвшигчид энэ удаагийн сонгуулийн онцлог, зүүн бүс нутгийг ирэх дөрвөн жилд хөгжүүлэх шийдэл, Монгол Улсын Засгийн газраас зарлан хэрэгжүүлж буй бүсчилсэн хөгжлийн бодлоготой салшгүй холбоотойг дурдаад гурван аймгийг салангиад байдлаар бус бүс нутгийн хэмжээнд том бодлогоор хөгжүүлэх боломжууд, энэ хүрээнд Дорнод аймагт хийж, хэрэгжүүлэхээр мөрийн хөтөлбөрт тусгасан ажлуудыг танилцуулав.
Чулуунхороот суманд зүүн бүсийн хилийн “0” тоот багана болон Эрээнцав боомт байрладаг. 100 гаруй мянган га нутагт Монгол дагуурын дарцан цаазат газар, нэн ховор шувууд, эртний хэрэгсүүрүүд байдаг. Иймд МАН-ын хөтөлбөрт тусгасан түүхэн аялал жуулчлал, хил орчмын аялал жуулчлалын хүрээнд тус сумыг хөгжүүлэх бүрэн боломжтой юм. “Шинэ сэргэлтийн бодлого”-ын хүрээнд Чойбалсан-Хөөт-Бичигт чиглэлийн төмөр замын төсөл, МАН-ын мөрийн хөтөлбөрт Эрээнцав, Бичигт, Сүмбэр боомтыг өргөжүүлж, нэвтрүүлэх хүчин чадлыг нэмэгдүүлэх заалт тусгагдсан.
Орон нутгийн иргэд Ерөнхий сайдыг цар тахлын дараах эдийн засгийн хүндрэлийг давахдаа “Шинэ сэргэлтийн бодлого”, тэр дундаа боомтын сэргэлтийг санаачлан эхлүүлсэн нь зоригтой, зөв зүйтэй алхам болсон гэдгийг хэлж байлаа. Энэ талаар УБТЗ-ын Баянтүмэн тасгийн орлогч дарга С.Батбадар “Баянтүмэн тасаг 85 жилийн түүхтэй. Эрээнцав-Баянтүмэн өртөө 238 км гол замыг хариуцан урсгал засвар, их засвар хийж, галт тэрэгний хөдөлгөөний аюулгүй байдлыг хангаснаар Эрээнцав боомтоор экспорт, импортын тээврийн ажлыг зохион байгуулдаг. Таван өртөө, гурван зөрлөгтэй. Босоо чиглэлийн төмөр замтай холбогдохын тулд иж бүрнээр нь хүччүүлж засах шаардлагатай. УБТЗН-ээс ТЭЗҮ боловсруулж хүргүүлсэн” гээд босоо тэнхлэгийн төмөр замтай холбогдож, боомтын үйл ажиллагаа өргөжсөнөөр иргэдийн аж амьдралд цаашлаад улс орон, аймаг, сумды хөгжилд өндөр ач холбогдолтойг хэлэв.
Манлайбаатар Дамдинсүрэнгийн төрсөн нутаг Гурванзагал сумын хувьд буриад, барга, халх, дөрвөд зэрэг олон ястан амьдардаг онцлогтой. Тус суманд улсын төсвийн хөрөнгө оруулалтаар найман айлын орон сууц, 250 хүний суудалтай Соёлын төв ашиглалтад орсон байна. Мөн аймаг, орон нутгийн санхүүжилтээр сургуулийн дотуур байр, эмнэлгийн засвар хийгдэж байна. Цаашид бүсийн хөгжлийн дагуу мал аж ахуйд түшиглэж хөгжих боломжтой. “Шинэ хоршоо” хөдөлгөөний хүрээнд 10 хоршоо байгуулагдсан. Үүнээс дөрөв нь 200-400 сая төгрөгийн санхүүжилт авчээ.
Чойбалсан суманд хилийн Хавирга боомт байрладаг. Эдийн засгийн тэргүүлэх чиглэл нь мал аж ахуй бөгөөд зудын улмаас 33 мянган толгой мал хорогджээ. Иймд иргэд, малчид нэгдэж малынхаа таваарлаг байдлыг нэмэгдүүлэх, аж ахуй эрхлэх, малын хашаа хорооны стандарт, өвс тэжээл бэлтгэх, хоёрдогч түүхий эд боловсруулах чиглэлээр найман хоршоо байгуулжээ. Одоогийн байдлаар 17-57 хүнтэй хоёр хоршоо 360-510 сая төгрөгийн санхүүжилт авсан байна.
Дорнод аймгийн Сэргэлэн сумыг Хонгирад аймгийн нутаг, Бөртэ хатны төрхөм нутаг хэмээн түүхчид тодорхойлдог аж. Манжийн дарлалын эсрэг цогтой тэмцэгч, Гүнсаваа баатрын бэхлэлт, Чингисийн хэрмэн зам, Сэнжит хад, Сэргэлэн Хараат зэрэг түүхэн газруудтай. Иймд “Монголын нууц товчоо”-ны газруудыг мөнхлөх, дэд бүтцээр холбох, жуулчдыг татах маршрутад хамруулах боломжтой. Түүх соёлоо хадгалж, таниулан сурталчлах замаар хөгжих нь маш зөв шийдэл гэдгийг нутгийн ахмадууд хэлж байлаа.
Монгол Улсын Ерөнхий сайдаар ахлуулсан МАН-ын багийнхан хийсэн ажлаа тайлагнаж, хийх ажлаа танилцуулж байгаад дээрх сумдын иргэд талархалтай хандаж байлаа. МАН нэгдсэн бодлоготой, хэрэгжүүлэхэд бэлэн төлөвлөгөөтэй сайн ажиллаж байгааг тодотгоод Ерөнхий сайдаа багаар нь сонгохоо илэрхийлж байв.
Ялангуяа сүүлийн 30 жилийн алдааг засах гэж системийн авлигатай тэмцэж, хөгжлийн тушаа болсон олон зүйлийг өөрчлөхийн төлөө идэвхтэй ажиллаж буй Ерөнхий сайдынхаа эхлүүлсэн ажлын үр дүнг үзэж, үр өгөөжийг хүртэхийн төлөө нэр дэвшигчдийг багаар нь сонгоно гэдгээ Дорнод аймгийн иргэд илэрхийлж байв. Тиймээс Ерөнхий сайдын манлайлал дор МАН-аас нэр дэвшигчид багаараа гар нийлэн ажиллаж, зүүн бүсээ хөгжүүлж чадна хэмээн үзэж байна.
Тод мэдээ
Тээвэр логистикийн нэгдсэн төв байгуулах ажлын хүрээнд ААН-үүдийн үйлдвэртэй танилцаж, туршлага судлав
Хөшигийн хөндийн нисэх онгоцны буудлыг түшиглэсэн анхны дагуул хот Хүннү хотод тээвэр логистикийн нэгдсэн төвийг нийт 1019 га талбайд барина.
Үүнээс 400 га талбайд тээвэр логистикийн бүсийг байгуулах юм.
Уг төлөвлөлтийн хүрээнд нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяраар ахлуулсан ажлын хэсэг нийслэлд үйл ажиллагаа явуулж буй ААН-үүдийн үйлдвэр, терминалтай танилцлаа.
Энэ үeэр "Ти Ай Ложистик" XXK-ийн Тээврийн газрын захирал П.Ариунзаяа “Манай компани үүсгэн байгуулагдаад 14 жил болж байна. Импорт, экспортын бараа, бүтээгдэхүүнийг боловсруулах, гаалийн хяналтын бүс болон олон улсын тээвэр зуучлалын чиглэлээр үйл ажиллагаа явуулдаг. Өнөөдрийн хувьд НЗДТГ-ын ажлын хэсгийн зүгээс Хүннү хотод шинээр байгуулах логистик, ХАБЭА-н талаар бидэнтэй уулзаж, манай үйл ажиллагаатай танилцлаа.
Хүннү хотын логистик төвийг олон улсын стандартад нийцүүлсэн жишиг төв болгож хөгжүүлнэ гэдэгт итгэлтэй байна. Иймд, одоогийн үйл ажиллагаагаа илүү сайжруулж, хамтран ажиллахад бэлэн байна” гэв.
"Ландбридж" ХХК-ийн захирал Д.Энхтүвшин “Миний хувьд тээвэр, логистикийн салбарт 27 жил ажиллаж байна. Манай компани нь 22-ын товчоо буюу СХД-ийн 36 дугаар хороонд бараа бүтээгдэхүүнийг суурьшлын бүс рүү задалж оруулах, орон нутагт түгээх агуулахын чиглэлээр үйл ажиллагаа явуулдаг. НЗДТГ-ын Хүннү хотыг хөгжүүлэх ажлын хэсгээс логистикийн дэд бүтэц, агуулахын чанар зэргийг цаашдын төлөвлөлтдөө оруулах зорилгоор туршлага судалж, ирж үзлээ. Энэ салбарт олон жил ажиллаж, амьдарч буй хүний хувьд Хүннү хот болон нийслэлийн захын дүүргүүдэд түгээлт, ачаа бараа боловсруулах дэд бүтэц сайжраасай гэж хүсдэг. Энэ талаараа бид өөрсдийн хийсэн бүтээснийг үзүүлж, мэддэг чаддаг бүхнээ зөвлөлдөж байгаадаа баяртай байна” гэв.
Нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр “Тээвэр логистикийн төвийг Хүннү хотод нүүлгэн шилжүүлэхтэй холбоотойгоор ажлын хэсэг байгуулагдсан. Хоёр өдрийн өмнө энэхүү үйлчилгээг үзүүлдэг ААН-үүдтэй хэлэлцүүлэг хийсэн. Хэлэлцүүлгийн хүрээнд тодорхой саналууд гарсан учраас энэ төрлийн үйлчилгээ үзүүлдэг ААН-үүд дээр ирж, үйл ажиллагаатай нь танилцлаа.
Хотод төвлөрсөн логистикийн хөдөлгөөнийг сааруулахад аж ахуй эрхэлж байгаа компанийн захирлууд болон үйлчилгээ үзүүлж байгаа хүмүүс хүлээн зөвшөөрч буйгаа илэрхийллээ. Хамгийн чухал нь Хүннү хотод төлөвлөж байгаа байршил дээр ямар үйлчилгээг нэвтрүүлэх, терминалаа хаана үлдээх зэрэг олон бодитой ажил хэрэгч саналуудыг гаргаж байна. Тиймд, логистикийн төвийг шинээр байгуулахдаа үйлчилгээ эрхэлдэг ААНБ-ын бүх саналыг аль болох тусгаж, олон улсын стандартад нийцсэн ажил төлөвлөж гүйцэтгэнэ” гэлээ.
Тод мэдээ
“Улаанбаатар марафон 2025” олон улсын гүйлтэд 5000 гаруй хүн бүртгүүлээд байна
“Улаанбаатар Марафон 2025”-ын хамгийн бага зай болох 1.5 км-т гэр бүлээрээ болон тэргэнцэртэй, хараагүй иргэд гүйх боломжтой бөгөөд энэ төрөлд нийт 954 хүн гүйхээр бүртгүүлжээ. 5 км-ийн зайд 2451 иргэн гүйхээр бүртгүүлсэн бол 10 км-ийн зайд 794 хүн бүртгүүлсэн байна.
Хагас марафон буюу 21 км-ийн гүйлтэд 18-34 нас, 35-54 нас, 55-аас дээш насныхан, хөгжлийн бэрхшээлтэй иргэд гэсэн ангиллаар оролцох боломжтой. Энэ төрөлд 700 хүн бүртгүүлээд байна. Бүтэн марафон буюу 42 км-ийн зайд 18 болон түүнээс дээш насныхан, хөгжлийн бэрхшээлтэй иргэд гэсэн ангиллаар гүйх бөгөөд одоогийн байдлаар 135 хүн бүртгүүлжээ.
Бүртгэлийн хураамж нь зай тус бүрээс хамааран 5000 төгрөгөөс 90,000 төгрөгийн хооронд байна. Тусгай олимп төрөл буюу 500, 800 метр зайд гүйгчдээс бүртгэлийн хураамж авахгүй. Та бүхнийг "Улаанбаатар Марафон 2025" олон улсын гүйлтэд найз нөхөд, гэр бүл, хамт олноороо оролцож, нэгэн өдрийг эрүүл мэндийнхээ төлөө үр бүтээлтэй өнгөрүүлэхийг уриалж байна.
Марафонд гүйх хүсэлтэй иргэд https://ulaanbaatar.marathon.mn цахим хаягаар болон “Hipay” аппликейшнээр бүртгүүлэх боломжтой. Бүртгүүлсэн хүмүүст энгэрийн дугаар олголт 2025.05.10-20-ний хооронд үргэлжилнэ.
Тод мэдээ
“Эрүүл мэндийн ажилтны гарын эрүүл ахуй сахих дэлхийн өдөр” өнөөдөр тохиож байна
ДЭМБ-аас жил бүрийн тавдугаар сарын 5-ны өдрийг “Эрүүл мэндийн ажилтны гарын эрүүл ахуй сахих дэлхийн өдөр” болгон тэмдэглэж, эрүүл мэндийн ажилтнуудад гарын эрүүл ахуйг сахихын ач холбогдлыг сурталчлан, мэдлэг, хандлага, дадлыг дээшлүүлэхэд чиглэсэн нөлөөлөл, сурталчилгаа зохион байгуулдаг.
Энэ 2025 онд дэлхий дахинд энэ өдрийг "Бээлийг зохистой хэрэглэе. Гарын эрүүл ахуйг сахья" уриан дор тэмдэглэх бөгөөд дараах үйл ажиллагааг зохион байгуулахыг улс орнуудад зөвлөжээ. Үүнд:
-"Гарын эрүүл ахуй сахих 5 мөч"-ийг хэрэгжүүлж эрүүл мэндийн тусламж үйлчилгээний явцад халдвар тархахаас сэргийлэх, гарын эрүүл ахуйн зөв дадлыг түгээн дэлгэрүүлэх;
-Бээлийг шаардлагатай үед хэрэглэх нь чухал боловч энэ нь гарын эрүүл ахуйг орлохгүй, бээлийг зохистой зөв хэрэглэхийг сурталчлан таниулах;
-Бээлийг зохисгүй, хэт их хэрэглэх нь хог хаягдлыг ихэсгэж хүрээлэн буй орчныг бохирдуулдаг тул зохистой хэрэглээнд уриалах;
-Эрүүл мэндийн ажилтан бүр гарын эрүүл ахуй сахих заавар, журмыг мөрдөхийг зөвлөсөн гэж Халдварт Өвчин Судлалын Үндэсний Төвөөс мэдээллээ.
