Тод мэдээ
Түрүү булчирхайн өвчлөлийн оношилгоо, эмчилгээг шинэ түвшинд гаргах боломж бүрдлээ
“Хүрээ ротари” клубээс санаачлан "Rotary Club of Tokyo-Arakawa", "Asahikawa Morning", "Ulaanbaatar Khangarid" зэрэг найман клуб, дүүрэг хамтран хэрэгжүүлсэн төслийн үр дүнд хандивлаж буй 74,600 ам.долларын өртөг бүхий түрүү булчирхайн өвчлөлийн оношилгоо, эмчилгээний сүүлийн үеийн шинэ лазер тоног төхөөрөмжийг Улсын нэгдүгээр төв эмнэлгийн Урологи-андрологийн төвд гардуулах ёслол боллоо.
УНТЭ-т төвлөрөн үзүүлдэг байсан урологийн тусламж, үйлчилгээний төвлөрлийг сааруулж, ачааллыг бууруулах зорилгоор Эрүүл мэндийн яамнаас өнгөрсөн онд 15 аймгийг бөөрний дурангийн аппараттай болгосон. Ингэснээр тус эмнэлэгт урологийн тусламж үйлчилгээ авахаар орон нутгаас ирэх өвчтөний ачаалал гурав дахин буурсан бол өнөөдөр хүлээн авч буй шинэ тоног төхөөрөмжийн тусламжтайгаар эрчүүдэд элбэг тохиолддог түрүү булчирхайн өвчлөлийн оношилгоо, эмчилгээг шинэ шатанд гаргах, илүү орчин үеийн аргаар тусламж үйлчилгээг үзүүлэх боломж бүрдэж байгааг тус эмнэлгийн захирал Б.Хишигжаргал тоног төхөөрөмж гардуулах ёслолын үеэр онцолж байлаа.
Тэрбээр мөн “УНТЭ-ийн Урологи-Андрологийн төв нь улсын хэмжээнд тусламж, үйлчилгээ үзүүлдэг. Манай төвд бөөр, шээсний зам болон эрэгтэйчүүдийн өвчлөлтэй бүх үйлчлүүлэгч ханддаг. Тийм учраас хүлээгдэл үүсэх нь бий. Өмнө нь “Хүрээ ротари” клубээс санаачлан 227,654 ам.долларын өртөг бүхий бөөрний чулуу бутлах, лазерын мэс заслын тоног төхөөрөмжийг дагалдах хэрэгслийн хамт хандивлаж байсан” хэмээгээд төслийг хэрэгжүүлсэн ротаричуудад болон Урологи-андрологийн төвийн хамт олонд талархал илэрхийлэв.
Мөн энэ үеэр Урологи-андрологийн төвийн эрхлэгч Д.Баян-Өндөр “Манай эмнэлэгт түрүү булчирхайн хортой хавдрын тохиолдол жилдээ 1-2 л бүртгэгддэг байсан бол 2022 онд 17 тохиолдол бүртгэгдсэн. Өнөөдөр хүлээн авч буй энэхүү аппаратын тусламжтайгаар эдийн шинжилгээг оновчтой авах боломж нээгдэх юм. Өмнө нь мэс засал хийх үед бөөр, шээсний замын чулууг хараад буталж чадахгүй, гадны оронд очиж эмчлүүлэх шаардлагатай гэж өвчтөндөө хэлэх хамгийн хэцүү байсан бол бид өнөөдөр дээрх эмчилгээг эх орондоо нэвтрүүлээд багагүй хугацаа өнгөрчээ. Ротаричуудын хэрэгжүүлсэн төслийн үр дүнд эмчилгээг улам төгөлдөр болгох шинэ тоног төхөөрөмжтэй болсондоо баяртай байна. Энэхүү шинэ аппаратын тусламжтайгаар энэ төрлийн эмчилгээ, оношилгоог ард иргэдэд хүлээгдэл, чирэгдэлгүй үзүүлэх, гадагш гарах урсгалыг зогсоох бүрэн боломжтой боллоо” хэмээн сэтгэгдлээ хуваалцсан.
Энэхүү ажлыг санаачлан хэрэгжүүлэгч ротаричуудыг төлөөлж үг хэлсэн Олон улсын Ротари клубийн 10 дугаар бүлгийн захирагч Галбадрах “Ротари клуб нь нийгэмд чиглэсэн ялангуяа эрүүл мэнд, боловсролын салбарт анхаарч, өрх толгойлсон эмэгтэйчүүд рүү чиглэсэн олон төсөл, хөтөлбөр хэрэгжүүлдэг. Эдгээр төслийн мань нэг УНТЭ-т амжилттай хэрэгжиж түрүү булчирхайн өвчлөлийн оношилгоо, эмчилгээний лазер тоног төхөөрөмжийг гардуулж байгаадаа баяртай байна. Япон улсаас таван дүүргийн захирагч ирсний гурав нь уг төсөлд оролцсон. УНТЭ-ийн хувьд бидний нийлүүлсэн багаж, тоног төхөөрөмжийг маш сайн үр дүнтэй ашиглаж, мэдээллийг үнэн зөв гаргадаг нь дараа дараагийн төсөл хэрэгжих үндэс болж байна” хэмээсэн юм.
Тод мэдээ
Энхтайваны өргөн чөлөө дагуух автобусны буудлуудыг халаас зогсоолгүй болгоно
Энэ онд нийслэлийн хэмжээнд 10 байршилд шинээр зам барих бол 41 байршилд авто замыг шинэчилнэ. Тодруулбал, Саппорогийн уулзвараас Офицеруудын ордон хүртэлх авто замыг бүрэн шинэчлэх юм. Энэ хүрээнд Энхтайваны өргөн чөлөө дагуу автобусны буудлуудыг халаас зогсоолгүй болгоно. Ингэснээр нийтийн тээврийн автобус нэгдүгээр эгнээгээр чөлөөтэй зорчих боломж бүрдэх юм.
Замын хөдөлгөөний аюулгүй байдлыг хангах, зохиомол түгжрэлийн шалтгааныг арилгах, нийтийн тээвэр хоорондын зайг алдагдуулахгүй байх зорилгоор 2022 оноос эхлэн зам дагуух зогсоолуудыг үе шаттай хааж байгааг нийслэлийн Замын хөгжлийн газрын дарга Б.Одбаяр онцолж байлаа.
Түүнчлэн Энхтайваны өргөн чөлөөний авто замын засвар, шинэчлэлтийн ажлыг өнгөрсөн дөрөвдүгээр сарын 2-ны өдрөөс эхэлсэн. Ингэхдээ иргэдэд саад учруулахгүйгээр шөнийн цагаар буюу 22:00-06:00 цагийн хооронд авто замыг засварлан шинэчилж байна. Харин асфальтбетон хучилтыг амралтын өдрүүдэд хийж байгаа юм.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
“Зээлийн апплейкешны эрх нэмэгдүүлж өгнө” гэж бусдыг залилжээ
Иргэн Б.П нь фэйсбүүк цахим орчинд “Nary Narut, Shimer shimka, Suki Nay, Anujin, Marlaa Marlaa, kimmyya InkIop” гэх нэртэй хуурамч хаяг нээн, түүнийгээ ашиглаж, “Токи.мн, Ленд.мнь Hipay” зэрэг зээлийн аппликейшны эрх нэмэгдүүлнэ" гэх зар оруулж хэрэглэгчийн нэвтрэх нэр, нууц үгийг хууль бусаар авч тухайн мэдээллээр иргэдийн цахим мэдээллийн сүлжээнд зөвшөөрөлгүйгээр нэвтэрч, олон удаагийн үйлдлээр зээл авч залилах, хулгайлах гэмт хэргийг үйлдэн их хэмжээний ашиг олж, амьдралын эх үүсвэрээ болгосон хэргийг илрүүлж, мөрдөн шалгах ажиллагааг үргэлжлүүлж байна.
Шалгалтын явцад гэмт этгээдүүд нь тухайн үйлдлийн аргыг ашиглаж, олон иргэдийг хохироосон байж болзошгүй нөхцөл байдал тогтоогдож байгаа тул дээрх нэр бүхий цахим фэйсбүүк хаягтай холбогдон зээлийн аппликейшны эрхээ нэмэгдүүлэх гэж хувийн мэдээллээ өгч, залилах гэмт хэргийн хохирогч болсон иргэд цагдаагийн байгууллагын 8822-2255 дугаарт холбогдохыг зөвлөлөө.
Хувийн мэдээллээ алдах нь цахим гэмт хэргийн хохирогч болох гол шалтгаан болж таныг санхүүгийн эрсдэлд оруулах аюул дагуулдаг гэдгийг ямагт анхаарч, таатай санал бүхий мэдээллүүдэд хянуур байж, дээр дурдагдсан эрсдэлээс урьдчилан сэргийлэхийг анхааруулж байна.
Тод мэдээ
Хүннү хотын тээвэр логистикийн талаарх мэргэжлийн холбоод, компаниудын саналыг сонсож, ажлын хэсэг байгууллаа
Улаанбаатар хотын хүн ам өсөх тусам тээвэр логистикийн цогц, шинэлэг шийдэл хэрэгтэй болсон. Тиймээс Хөшигийн хөндийн нисэх онгоцны буудлыг түшиглэсэн анхны дагуул хот Хүннү хотод тээвэр логистикийн нэгдсэн төвийг нийт 1019 га талбайд барина. Үүнээс 400 га талбайд тээвэр логистикийн бүсийг байгуулах юм.
Тээвэр логистикийн бүс байгуулахтай холбогдуулан мэргэжлийн холбоод, үйл ажиллагаа эрхлэгч компаниуд, экспертүүдтэй өнөөдөр хотын дарга Х.Нямбаатар болон нийслэлийн холбогдох албан тушаалтнууд уулзаж, санал бодлыг нь сонсож, хэлэлцүүлэг хийлээ. “Хүннү хотын тээвэр логистикийн бүсийн хөгжлийн стратеги” хэлэлцүүлгээр оролцогчдын санал хүсэлтийг сонсож, тээвэр логистикийн төвийн төлөвлөлтөд тусгах ажлын хэсгийг байгууллаа. Ажлын хэсгийн ахлагчаар нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр ажиллана.
Хэлэлцүүлгийн үеэр хотын дарга Х.Нямбаатар үг хэлэхдээ Улаанбаатар хотыг 2040 он хүртэл хөгжүүлэх хөгжлийн ерөнхий төлөвлөгөөнд одоогийн суурьшлыг задлах дагуул хотын төлөвлөлтийг тусгасан. Хөшигийн хөндийн олон улсын нисэх онгоцны буудлыг түшиглэсэн анхны дагуул хотод тээвэр логистикийн бүсийг бий болгох нь олон давуу талтайг онцоллоо.
Өнөөгийн Улаанбаатар тээвэр логистикийн хувьд үр ашиг, бүтээмж багатай, ажиллагаа ихтэй. Төмөр замын өртөөн дээр ирсэн чингэлгүүдийг гар аргаар ангилан ялгаж, 10 терминал руу цөөн тооны вагоноор түгээдэг. Нэг чингэлэгт ногдох зардал өндөр. 10 терминал бүрийн тоног төхөөрөмжийг бүрэн хүчин чадлаар ашигладаггүй. Терминалууд дээр буусан ачааны 40 орчим хувийг эргэж орон нутагт түгээдэг. Логистик компани бүр өөрийн талбайтай болох хүсэлтэй боловч нийслэлд зай талбай байхгүй. Хүннү хотын тээвэр логистикийн нэгдсэн төв байгуулагдсанаар эдгээр асуудлыг бүрэн шийдвэрлэх боломжтойг хэлэлцүүлэгт оролцогчид хэлж байлаа.
Хэлэлцүүлэгт Хүннү хотын Захирагчийн чиг үүргийг хэрэгжүүлэгч, Засгийн газрын бүрэн эрхт төлөөлөгч М.Батбаяр “Хүннү хотын тээвэр, логистикийн бүсийн төлөвлөлт”, Улаанбаатар хотын Ерөнхий архитектор Ч.Төгсдэлгэр “Улаанбаатар хотын 2040 он хүртэлх хөгжлийн ерөнхий төлөвлөгөөний тээвэр, логистикийн төлөвлөлт”, Монголын тээвэр логистикийн түншлэл мэргэжлийн холбооны ерөнхийлөгч А.Мөнхболд “Төр-хувийн хэвшлийн түншлэлийн эрх зүйн орчин: Боломж ба сорилтууд” сэдвээр илтгэл хэлэлцүүлэв.
Хүннү хотын тээвэр логистикийн нэгдсэн төв байгуулагдсанаар дараах ач холбогдолтой.
- Монгол Улсын худалдаа, тээврийн дэд бүтцийг сайжруулж, өрсөлдөх чадварыг нэмэгдүүлэх,
- Тээвэр логистикийн зардлыг бууруулж, эдийн засаг, бизнесийн өсөлтөд эерэг нөлөө үзүүлэх,
- Олон улсын техник, технологийг нутагшуулан, хотын доторхи ачаа урсгалыг зохион байгуулах,
- Улаанбаатар хотын түгжрэлийг бууруулах, төмөр замын эрчмийг зохицуулах,
- Логистик төвүүдийн агуулахуудыг хотоос гаргаж, хадгалалтын зардлыг бууруулах,
- Орон нутаг руу чиглэсэн барааны урсгалыг хотын гадна талд төвлөрүүлэх давуу талтай.
-
Өнөөдөр2020/04/21
Хуурамч шатахууны түүхий эд болдог бодисыг онцгой албан татварт хамруулах хуулий...
-
Тод мэдээ2024/08/15
Багш нарын мэргэжил дээшлүүлэх сургалт солилцоог эхлүүлэх талаар санал солилцов
-
Тод мэдээ2022/10/10
Ц.Цогтбаатар дэлхийн аварга боллоо
-
Тод зураг2020/01/22
Үс шинээр үргээлгэх буюу засуулахад тохиромжгүй