Тод мэдээ
Нийгмийн түншлэл хамтын хэлэлцээрийн талаар санал солилцлоо
Хөдөлмөр, нийгмийн түншлэлийн гурван талт 2023-2024 оны Улсын хэлэлцээрийг байгуулахын өмнө Хөдөлмөр, нийгмийн хамгааллын яам, МҮЭХ-той хамтран түншлэгч талууд байр сууриа илэрхийлэх, санал солилцох уулзалтыг зохион байгууллаа.
Уулзалтад Хөдөлмөр, нийгмийн хамгааллын сайд Х.Булгантуяа, яамны удирдлагууд, Монголын Үйлдвэрчний Эвлэлийн Холбооны ерөнхийлөгч С.Эрдэнэбат МҮЭ-ийн холбооны аймаг, нийслэл, салбарын ҮЭ-ийн холбоодын дарга, анхан шатны хороодын тэргүүлэгч 100 гаруй хүн оролцлоо.
Хүний эрхийн үндэсний комиссын 2022 оны тайлангийн хөдөлмөрлөх эрхийн төлөв байдлын талаарх илтгэл мэдээллийг ХЭҮК-ийн гишүүн, доктор Д.Сүнжид танилцуулж, оролцогчид нөхцөл байдал, тулгамдсан болон анхаарах асуудлын талаарх саналуудаа сайдад уламжилж, тодорхой асуултуудад хариулт авлаа.
Тэд хөдөлмөрийн нөхцөл, цалин хөлс, нийгмийн даатгалын шимтгэл, мэргэжлээс шалтгаалах өвчин, хөдөлмөрийн аюулгүй байдал, хүний нөөц зэрэг олон асуудлыг хөндөж, хэлэлцээрээр шийдвэрлэх боломжтой саналуудаа дэвшүүлсэн.
Хөдөлмөр, нийгмийн хамгааллын сайд Х.Булгантуяа, улсын хэлэлцээрт баримтлах бодлогын чиглэлийг тодорхойлох, хөдөлмөрлөх эрхийг хангах, зохистой хөдөлмөр эрхлэлт, нийгмийн хамгаалал, хөдөлмөрийн аюулгүй байдал, эрүүл ахуйн асуудлын талаарх гарц шийдлийг хэлэлцэхэд түншлэгч талуудтай зөвшилцөн хамтран ажиллахаа илэрхийллээ.
Уулзалтаар талууд Хөдөлмөр, нийгмийн түншлэлийн гурван талт улсын хэлэлцээрийг шинэ шатанд гаргаж, хэнийг ч хөгжлийн гадна үлдээхгүй гэрээ хэлэлцээг хийх шаардлагатай гэдэгт санал нэгдлээ гэж ХНХЯ-наас мэдээллээ.
Тод мэдээ
Соёлын биет өвийн эд зүйлсийг хууль бусаар худалдахыг завдсан хэргийг шүүхэд шилжүүллээ
Прокурорын байгууллага 2024 оны тавдугаар сарын 6-10-ны өдрүүдэд 223 хэрэгт яллах дүгнэлт үйлдэн шүүхэд шилжүүлж шийдвэрлэлээ.
Тодруулбал, Эрүүл мэндийн халдашгүй байдлын эсрэг 94, Өмчлөх эрхийн эсрэг 61, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 39, Хүний бэлгийн эрх чөлөө, халдашгүй байдлын эсрэг 13, Хүний амьд явах эрхийн эсрэг 8, Хүрээлэн байгаа орчны эсрэг болон Авлига, албан тушаалын тус бүр 3, Мансууруулах эм, сэтгэцэд нөлөөт бодисыг хууль бусаар ашиглах 2, Улсын хилээр барааг хууль бусаар нэвтрүүлэх 1 хэргийг шүүхэд шилжүүлсэн байна.
Яллах дүгнэлт үйлдэн шүүхэд шилжүүлсэн зарим хэргээс дурдвал:
Нийслэлийн прокурорын газраас Баянзүрх дүүргийн 26 дугаар хорооны Засаг дарга О.Т нь эрх мэдэл, албан тушаалын байдлаа урвуулан ашиглаж, хэсгийн ахлагчаар Г.Ч-г ажилд томилон цалин олгож, өөртөө авч зарцуулсан гэх хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-т зааснаар яллах дүгнэлт үйлдэн Баянзүрх дүүргийн эрүүгийн хэргийн анхан шатны шүүхэд;
-Баянгол дүүргийн 309 дүгээр цэцэрлэгийн эрхлэгч Э.А нь эрх мэдэл, албан тушаалын байдлаа урвуулан ашиглаж, ой тогтоолтын сургалтад хамрагдсан хүүхдүүдийн төлбөрийн 20 хувийг цэцэрлэг хөгжүүлэх санд төвлөрүүлэх нэрийдлээр өөртөө шилжүүлэн авсан гэх хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-т зааснаар яллах дүгнэлт үйлдэн Баянгол дүүргийн эрүүгийн хэргийн анхан шатны шүүхэд;
-Иргэн Б.Б нь Монгол Улсад ашиглахыг хязгаарласан химийн хорт аюултай бодисын жагсаалтад багтсан мөнгөн усыг зориулалтын бусаар ашигласан гэх хэрэгт Эрүүгийн хуулийн 24.3 дугаар зүйлийн 1 /Химийн хорт, аюултай бодисыг хууль бус эргэлтэд оруулах/-т зааснаар яллах дүгнэлт үйлдэн Баянхонгор аймаг дахь сум дундын эрүүгийн хэргийн анхан шатны шүүхэд,
-Сүхбаатар дүүргийн прокурорын газраас иргэн Т.Э, Э.Г нар нь Хүннүгийн үеийн НТӨ II зуунаас НТ I зуунд хамаарах соёлын биет өв, XVII-XIX зууны үеийн бурхны шашны сүм хийдэд ашиглагдаж байсан эдлэлийг хууль бусаар худалдаалахыг завдсан гэх хэрэгт Эрүүгийн хуулийн 25.5 дугаар зүйлийн 1 /Соёлын биет өвийн хууль бус худалдааг зохион байгуулах/-т зааснаар яллах дүгнэлт үйлдэн тус дүүргийн эрүүгийн хэргийн анхан шатны шүүхэд тус тус шилжүүлжээ.
Тод мэдээ
"Давсны мэдээлэл сурталчилгааны 7 хоног" эхэллээ
Энэ сарын 13-ны өдрөөс "Давсны мэдээлэл сурталчилгааны 7 хоног" "Эрүүл зүрхний төлөө давсаа багасгацгаая" уриан дор эхэлж байна. Давс хэтрүүлэн хэрэглэх нь зүрх судасны өвчин, цусны даралт ихсэлт, чихрийн шижин, хавдар зэрэг халдварт бус өвчнөөр өвчлөх шалтгаан болдог байна.
Монгол Улсад 2019 онд хийгдсэн “Халдварт бус өвчин, осол гэмтлийн шалтгаан, эрсдэлт хүчин зүйлсийн тархалтын үндэсний IV судалгаа”-гаар нийт хүн амын давсны дундаж хэрэглээ 10.5 г байгаа нь 2013 оны судалгааны үр дүнтэй харьцуулахад үндэсний хэмжээнд 0.6 г, баруун бүсэд 5.1 г, Улаанбаатар хотод 1.2 г -аар тус тус буурсан үзүүлэлттэй байгаа ч монгол хүний давсны хоногийн хэрэглээ нь ДЭМБ-ын зөвлөмж хэмжээнээс 2 дахин их хэвээр байна гэж НЭМҮТ-өөс мэдээллээ.
Тод мэдээ
Бүх боомтоор ХАА-н гаралтай бүтээгдэхүүн экспортлох боломжийг бүрдүүлнэ
Боомтын сэргэлтийн үндэсний хорооноос 2024 онд экспортыг нэмэгдүүлэх чиглэлээр хийж хэрэгжүүлэх ажлаа товч танилцууллаа. Ингэхдээ бүсчилсэн хөгжлийн бодлогод нийцүүлж бүсийн эдийн засаг, худалдааны хэрэгцээ шаардлагад үндэслэн боомтуудыг хөгжүүлнэ. Бүс нутгийн эдийн засгийн интеграцид Монгол Улсын оролцоог нэмэгдүүлж, тээвэр логистикийн эрсдэл зардлыг бууруулна гэлээ.
Мөн олон улсын жишигт нийцсэн боомтын тоог нэмэгдүүлнэ. "Ханги", "Бичигт", "Булган", "Хавирга", "Цагаандэл-Уул" зэрэг 5 боомтыг өргөтгөж, хүчин чадлыг нэмэгдүүлнэ.
Түүнчлэн "Эрээнцав" боомтыг олон улсын зэрэглэлтэй болгоно. Тэсэрч, дэлбэрэх аюултай барааг импортлох зөвшөөрөлтэй боомтын тоог нэмэгдүүлнэ.
Бүх боомтоор ХАА-н гаралтай бүтээгдэхүүнийг экспортлох боломжийг бүрдүүлнэ гэж Боомтын сэргэлтийн үндэсний хорооноос мэдээллээ.
-
Тод зураг2020/04/10
Шинэ коронавируст халдвартай холбоотой хөрш орнуудын нөхцөл байдал
-
Тод индэр2023/05/18
Дотооддоо 3 сая гутал үйлдвэрлэх боломжийг эрэлхийлэв
-
Тод мэдээ2024/01/15
Алслагдсан гурван дүүрэгт 200 тн хорголжин тэжээл, 100 тн хивэг олгоно
-
Тод мэдээ2022/04/08
“Хөшигийн хөндийн эдийн засгийн чөлөөт бүс байгуулах тухай” УИХ-ын т...
Сэтгэгдэл