Дэлхий нийтээр..
Төрийн бодлогод анхан шатны нэгжийн удирдлагуудын санал, санаачилгыг тусгана
Монгол Улсын Ерөнхий сайд Л.Оюун-Эрдэнэ, Барилга, хот байгуулалтын сайд Ц.Даваасүрэн, Нийслэлийн Засаг дарга бөгөөд Улаанбаатар хотын Захирагч Д.Сумъяабазар тэргүүтэй албаныхан өнөөдөр Чингэлтэй дүүргийн 14 дүгээр хороонд ажиллалаа. Энэ хүрээнд Улаанбаатар хотын гэр хорооллын бүсийн 30 хорооны Засаг дарга нартай уулзаж, тулгамдаж буй асуудлын талаар хэлэлцсэн юм. Нийслэлийн хэмжээнд үйл ажиллагаа явуулж байгаа хороодын Засаг дарга нараас санамсаргүй түүврийн аргаар 30-ийг сонгон гэр хорооллыг орон сууцжуулах, дахин төлөвлөх, дэд бүтцийг нь сайжруулах, төрийн үйлчилгээг хүргэхэд тулгарч буй асуудлуудын талаар нээлттэй санал солилцсон нь энэ юм.
Монгол Улсын Ерөнхий сайд Л.Оюун-Эрдэнэ:
-Засгийн газрын бодлого, шийдвэрүүд нийслэлтэй, нийслэлийн нэгжүүдтэй хэрхэн уялдаж, хөрсөн дээр хэрхэн бууж байгаа талаар санал солилцож байна. Төрийн бодлого гэдэг дээрээс доош чиглэсэн бус, харин дороос ирж буй санаачилгад суурилсан байвал илүү үр дүнтэй байж, иргэдэд тулгамдаж буй асуудлыг шийдэх юм. Нөгөө талаас, надад ирж буй албаны мэдээлэл бодит байдалтай нийцэж байна уу гэдгийг сонсох, мөн эргэх холбоо тогтоох нь чухал. Төрийн үйлчилгээг анхан шатанд хүргэж, ачааны хүндийг үүрч байгаа та бүхний санал, санаачилгыг сонсож, бодлого, шийдвэрт тусгах нь энэ уулзалтын зорилго хэмээв.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар:
-Улаанбаатар хотын гэр хороололд дэд бүтэц, орон сууц, зам талбай, хэсэгчилсэн инженерийн байгууламжийн асуудал тулгамддаг. Нөгөө талаас сургууль, цэцэрлэгийн хүртээмж тэргүүтэй нийгмийн асуудал ч бий. Тэгэхээр бид эдгээрийг хэлэлцэж, дүүрэг, хороодын түвшинд асуудлыг хэрхэн шийдэх вэ гэдэг гарц, гаргалгааг олох ёстой. Ийм ч учраас төрийн үүргийг анхан шатанд гүйцэтгэж байгаа хороодын Засаг дарга нарыг сонсох зорилгоор энэхүү уулзалтыг зохион байгуулж байна. Хороодын Засаг дарга нарын төлөөлөл та бүхэн асуудлаа илэн далангүй хэлж, хамтдаа шийдэл гаргахыг уриалж байна гэсэн юм.
Төрийн үйлчилгээг анхан шатанд хүргэж буй хороодын Засаг дарга нар асуудал, бэрхшээлүүдийнхээ талаар онцолж байв. Тухайлбал, хороодын нутаг дэвсгэрт байгуулж буй цэцэрлэг, сургуулийн барилгыг хугацаанд нь барьж ашиглалтад оруулдаггүйн улмаас олон бэрхшээл тулгардаг тухай өгүүлсэн. Мөн алслагдсан хороонд шинээр суурьшиж байгаа иргэд зөвшөөрөлгүй газар буусан тул хүүхдүүд нь сургууль, цэцэрлэгт хамрагдаж чаддаггүй, эмнэлгийн үйлчилгээ авдаггүй зэрэг асуудал тулгамддаг аж.
Гэр хорооллыг дахин төлөвлөх, орон сууцжуулах хүрээнд дэд бүтцийн мөн асуудлууд тулгамдаж байна. Тухайлбал, хэсэгчилсэн инженерийн байгууламж, бохирын системийн асуудал үүсэж байгааг уулзалтын үеэр хороодын Засаг дарга нар хэлж байлаа.
Гэр хорооллын хороодод тулгамдаж буй нийтлэг асуудлын тухайд төрийн үйлчилгээг хүргэх боловсон хүчин хомс, нэг ажилтанд ногдох ачаалал их, тэдний нийгмийн асуудал шийдэгдэлгүй орхигддог гэдгийг өгүүлж байсан юм. Түүнчлэн гэмт хэрэг, зөрчлийг бууруулах, хяналтыг сайжруулахад анхаарч ажиллах, нийтийн тээврийн хүртээмжийг нэмэгдүүлэх, утаа, хөрсний бохирдлыг багасгахын тулд эко шийдэл, ногоон зээлийг дэмжих зэргээр санал, хүсэлтээ илэрхийлсэн.
Дэлхий нийтээр..
Германы прокурорууд “Умардын урсгал”-ын халдлагыг Украины тал захиалсан гэж үзжээ
Германы прокурорууд 2022 онд “Умардын урсгал” хийн хоолойд гарсан дэлбэрэлттэй холбоотойгоор Украины армийн офицер асан этгээдэд яллах дүгнэлт үйлджээ. Түүнийг Украины төрийн байгууллагын нэрийн өмнөөс ажиллаж, хоолойг дэлбэлэх ажиллагаанд оролцсон гэж буруутгаж байна.
Германы хувийн мэдээлэл хамгаалах журмын дагуу Серхий К. гэж нэрлэгдсэн уг этгээдийг иргэний зориулалттай байгууламжид халдсан, дэлбэрэлт үүсгэсэн, дэд бүтэц сүйтгэсэн, нийтийн үйлчилгээг тасалдуулсан бүлэгт багтсан гэж үзжээ. Харин тэрбээр уг хэрэгт холбоогүй гэдгээ мэдэгдсэн байна.
Киевийн эрх баригчид Германы прокуроруудын мэдэгдэлд дэлгэрэнгүй тайлбар өгөх хангалттай мэдээлэл одоогоор байхгүй гэжээ. Украины Ерөнхийлөгч Владимир Зеленский яллах дүгнэлтийн талаар бүрэн мэдээлэл аваагүй тул одоогоор дүгнэлт хийхэд эрт байна гэж мэдэгдсэн байна.
Прокуроруудын мэдээлснээр Серхий К. нь 2022 оны есдүгээр сард шумбагчид, хөлгийн ахмад, тэсрэх бодисын мэргэжилтнээс бүрдсэн багийг удирдан Герман руу хуурамч бичиг баримтаар нэвтэрч, хөлөг түрээслэсэн гэж үзэж байна. Улмаар багийнхан Балтын тэнгист байрлах хоолойн хэсэгт тэсрэх төхөөрөмж байрлуулсан гэх үндэслэлээр шалгагдаж байна.
“Умардын урсгал”-ын дэлбэрэлт 2022 оны есдүгээр сард буюу Орос Украинд бүрэн хэмжээний довтолгоо эхлүүлснээс долоон сарын дараа болсон. Дэлбэрэлтийн улмаас Оросын байгалийн хийг Европ руу дамжуулах гол шугам болох “Умардын урсгал-1” гэмтэж, ашиглалтад ороогүй байсан “Умардын урсгал-2”-ын хэсэг мөн эвдэрсэн юм.
Германы тал уг хэргийг өөрийн харьяалалд хамаарна гэж үзэж байна. Учир нь гэмтсэн хоолойнууд Германы Мекленбург–Өрнөд Померани мужийн Любмин хотод хүрдэг бөгөөд Германы эрчим хүчний аюулгүй байдалд нөлөөлсөн гэж тайлбарлажээ.
Дэлхий нийтээр..
БНСУ-ын Ерөнхийлөгч И Жэ Мён Монгол Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён-ы хамт 2026 оны 07 дугаар сарын 09-11-ний өдрүүдэд Монгол Улсад төрийн айлчлал хийнэ.
Энэ айлчлал БНСУ-ын төрийн тэргүүн 2011 онд манай улсад айлчилснаас хойш 15 жилийн дараа болох юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс:
2006 онд “Сайн хөршийн, найрамдал, хамтын ажиллагааны түншлэл”
2011 онд “Иж бүрэн түншлэл”
2021 онд “Стратегийн түншлэл”-ийн харилцаа тогтоосон.
Монгол Улс, Бүгд Найрамдах Солонгос Улс 1990 оны 03 дугаар сарын 26-ны өдөр дипломат харилцаа тогтоосон. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээжээ.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
-
Дэлхий нийтээр..2026/02/05
“Малын индексжүүлсэн даатгалын нэгдүгээр босго үзүүлэлтийг таван хувь болгож б...
-
Дэлхий нийтээр..2020/08/07
Өнөөдөр Япон улсаас 257 иргэн эх орондоо ирнэ
-
Тод зураг2019/07/17
Өнөөдөр цахилгаан шугам тоноглолд засвар үйлчилгээ хийх хуваарь
-
Үйл явдал2021/02/23
Улаанбаатарт өдөртөө 4 хэм хүйтэн